ڕۆژی یەکشەممە، پەرلەمانی هەرێمی کوردستان کۆدەبێتەوە و بە ئامادەبوونی وەزیری ناوخۆ و وەزیری پێشمەرگە، قسە لەسەر هێرشی چەتەکانی داعش لەناوچە کێشە لەسەرەکانی باشوری کوردستان و پرسی سنوورەکانی هەرێمی کوردستان و داواکاریی دەستلەکارکێشانەوەی سۆران عومەر دەکات.
ئەمڕۆ دەستەی سەرۆکایەتی پەرلەمانی هەرێمی کوردستان بەبێ ئامادەبوونی سەرۆکی پەرلەمان کۆبوویەوە و دواتر بەناوی هێمن هەورامییەوە بانگهێشتنامەیەک ئاڕاستەی پەرلەمانتاران کرد بۆ کۆبوونەوەی ڕۆژی ٢٦ی ئەم مانگە.
بەپێی ئەو کارنامەیەی بڵاوکراوەتەوە ڕۆژی یەکشەممە پەرلەمانی هەرێمی کوردستان قسە لەسەر ئەم پرسانە دەکات.
یەكەم: خوێندنەوەی یەكەم بۆ ئەم پڕۆژەو پێشنیازە یاسایانەی خوارەوە پشت بەستن بە بڕیاری ژمارە (٥)ی ساڵی ٢٠٢٠ و حوكمی ماددەكانی (٧٩، ٨٠)و بڕگەی (یەكەم) لەماددەی (٨٣)ی پەیڕەوی ناوخۆی پەرلەمانی كوردستان.
١- پرۆژە یاسای (لە ئەستۆكردنی فەرمانبەران لەهەرێمی كوردستان).
٢- پێشنیازی یاسای (بەڕێوەبردن و پاراستنی شوێنەوارو كەلەپوور لەهەرێمی كوردستان-عیراق).
٣ – پێشنیازی یاسای (ڕێكخستنی میدیای ئەلیكترۆنی لەهەرێمی كوردستان-عیراق).
دووەم: دەنگدان لەسەر داواكاریی دەستلەكاركێشانەوەی ئەندامی پەرلەمان بەڕێز (سۆران عمر سعید) لەئەندامیەتیی پەرلەمان بەپێی حوكمی خاڵی ( ١، ٢) لەبرگەی دووەمی ماددەی (٢٥) لەپەیڕەوی ناوخۆی پەرلەمانی كوردستان.
سێیەم: خوێندنەوەی ڕاپۆرت و گفتوگۆكردن سەبارەت بەم بابەتانەی خوارەوە:
١ـ خوێندنەوەی ڕاپۆرتی كۆبوونەوەی هاوبەشی لیژنەی (كاروباری پێشمەرگەو ناوچە كورستانییەكانی دەرەوەی هەرێم) سەبارەت بەدۆخی ناوچە كوردستانییەكانی دەرەوەی ئیدارەی هەرێم و هێرشەكانی تیرۆریستانی داعش بۆ سەر ناوچەكه، بەئامادەبوونی بەرێز (وەزیری ناوخۆ)و (وەزیری كاروباری پێشمەرگە)و (وەزیری هەرێم بۆ كاروباری دانووستاندن لەنێوان هەرێم و بەغدا)و دەستەی گشتیی ناوچە كوردستانییەكانی دەرەوەی ئیدارەی هەرێم لەحكومەتی هەرێمی كوردستان-عیراق.
٢ـ خوێندنەوەی ڕاپۆرتی هاوبەشی لیژنەی (كاروباری پێشمەرگە)و (ناوخۆ و ئاسایش و ئەنجوومەنە خۆجێیەكان)و (پەیوەندییەكان و ڕەوەندی كوردستانی) سەبارەت بەدۆخی ناوچە سنوورییەكان.
٣ـ خوێندنەوەی ڕاپۆرتی لێژنەی تەندروستی سەبارەت بەپەتای (كۆڕۆنا) كۆڤید19، بەئامادەبوونی (وەزیری ناوخۆ)و (وەزیری تەندروستی) لەحكومەتی هەرێمی كوردستان-عیراق.
چوارەم: خوێندنەوەی دووەم بۆ پێشنیازی یاسای (ماف و ئەركی نەخۆش لەهەرێمی كوردستان) بەپێی حوكمی ماددەكانی (٨٧، ٨٨، ٨٩) لەپەیڕەوی ناوخۆی پەرلەمانی كوردستان.
پێنجەم: خوێندنەوەی ڕاپۆرتی لیژنەی دارایی و كاروباری ئابووری سەبارەت بە (دۆخی دارایی و ئابووریی هەرێمی كوردستان) بەئامادەبوونی بەڕێزان وەزیری دارایی و ئابووری وەزیری پلاندان و وەزیری هەرێم بۆ كاروباری دانووستاندن لەنێوان هەرێم و بەغداو سەرۆكی دیوانی ئەنجوومەنی وەزیران و سكرتێری ئەنجوومەنی وەزیران لەحكومەتی هەرێمی كوردستان-عیراق.
واتا بەپێی ئەو بەرنامەی کارەبێت، ڕۆژی یەکشەممە پەرلەمانی هەرێمی کوردستان، بە ئامادەبوونی وەزیری ناوخۆ و وەزیری پێشمەرگە، قسە لەسەر ئەو ڕاپۆرتە دەکات، کە لەلایەن لیژنەیەکی تایبەتی پەرلەمانی هەرێمی کوردستانەوە لەسەر پرسی بۆردوومان و داگیرکارییەکانی تورکیا لە ناوچە سنووریەکانی هەرێمی کوردستان ئامادەیان کردبوو.
د.ع
