سێشەممە, 26 يون 2018 – 07:45 ڕۆژنیوز – ڕۆزە محەمەد
سەرەڕای ناڕەزاییەکانی خەڵک و بڕیاری پەرلەمانی هەرێم دژی هەبوونی هێزی داگیرکەر لە سنوری هەرێمی کوردستان، بەڵام هێرش و داگیرکاریی تورکیا بەردەوامە.
لەو بارەیەوە پەروا عەلی، ئەندام پەرلەمانی هەرێمی کوردستان لە فراکسیۆنی گۆڕان، بە ڕۆژنیوزی وت: پەرلەمانی هەرێمی کوردستان بڕیاری ژمارە ٣٧ی ساڵی ٢٠٠٣ی هەیە، کە دژی داگیرکارییە و پێویستە جێبەجێ بکرێت لەلایەن ئەنجومەنی وەزیرانەوە، کۆمەڵێک لە پەرلەمانتار لە ماوەکانی ڕابردوو یاداشتمان ئاڕاستەی سەرۆکایەتی پەرلەمان کردووە کە دانیشتنێک تایبەت بکرێت بە داگیرکارییەکانی تورکیا، یاخود داوامان کردووە کە بڕیاری ژمارە ٣٧ی پەرلەمان جێبەجێ بکرێت، لەبەرئەوەی کە لە بەرژەوەندی ئەو حزبە باڵادەستانەدا نییە وەڵام نادەنەوە.
ئاماژەی بەوەشدا: بە تاک و بە گرووپیش وەک پەرلەمانتاران چەندین جار یاداشتمان بەرز کردووەتەوە، کە پەرلەمان دژی داگیرکارییەکان بوەستێت بۆئەوەی چیتر تورکیا و ئێران هێرش و داگیرکاری نەکەن، بەڵام بەداخەوە تورکیا لە ڕێگەی پارتییەوە بەهۆی ڕێکەوتننامەی ٥٠ ساڵەی و بەرژەوەندی لەگەڵیدا، وە لە دەڤەری سەوزیش ئێران لە ڕێگەی یەکێتییەوە، داگیرکاریی دەکەن.
دەشڵێت: دەبێت هەردوو داگیرکاریی بنەبڕ بکرێت و پێویستە کە شکۆی هەرێمی کوردستان چیتر نەشکێندرێت.
ئەوەشی خستەڕوو: ئەردۆغان دەیەوێت بەم کارانەی کورد قڕ بکات، بەڵام ناتوانێت ئەوە بکات، لە قەندیلدا ناتوانرێت کورد قاتی بکات، بەهیچ شێوەیەک ناتوانێت قەندیل داگیربکات.
ک.ک
