هاوسەرۆکی هەدەپە ڕایگەیاند، تائێستا داواکارییمان بۆ ئەنجامدانی دیدار لەگەڵ بەڕێز ئۆجالان لە وەزارەتی دادی تورکیایە و وەڵامنەدراوە، هۆشداریشیدا کە “کەس حەددی نییە داواکاریمان بۆ دیداری بەڕێز ئۆجالان پشتگوێ بخات”. داواشی لە سی پی تی کرد، بەزووترین کات زانیارییەکانی بەردەستی لەبارەی دۆخی ڕێبەر ئۆجالانەوە بڵاوبکاتەوە.
پەروین بوڵدان، هاوسەرۆکی پارتی دیموکراتی گەلان (هەدەپە) ئەمڕۆ لە کۆبوونەوەی ئەنجومەنی پارتەکەیەدا وتارێکی پێشکەشکرد و ڕایگەیاند:”چەند هەفتەیەک پێش ئێستا لە تەقسیم هێرشێکی بۆمبرێژکراو لە دژی هاوڵاتیانی مەدەنی ئەنجامدرابوو، هێشتا پرسیار دەربارەی ئەو تەقینەوەیە هەیە، تەقینەوەیەک چەند لایەنی هەیە، کە یەک ناگرنەوە و ڕووبەڕووی دەسەڵاتێکین، کە دوای سەرکەوتن کەوتووە”.
لەبارەی گۆشەگیریی سەر ڕێبەری گەلی کورد عەبدوڵا ئۆجالانیشەوە، بوڵدان وتی:”پێویستە هەموو وڵات شاهیدی بۆ ئەو گۆشەگیرییە نایاسایی و نادادپەروەرانە بدات، کە بەرامبەر بە بەڕێز ئۆجالان هەیە، ئێمە لە هەموو شوێنێک و هەمیشە دەڵێین، لە ٣ی ئازاری ٢٠٢٠ەوە هیچ زانیارییەک لە بەڕێز ئۆجالان و زیندانییەکانی دیکە نییە، لەگەڵ ئەوەشدا ئەم گۆشەگیرییە ئێستا ڕۆژ بە ڕۆژ قووڵتر دەبێتەوە و گوێ لە بانگەوازەکان ناگرن”.
دوێنێ نووسینگەی یاسایی سەدە کە پێکهاتوون لە پارێزەرانی ڕێبەر ئۆجالان، لە ڕاگەیەندراوێکدا ئاماژەی بەوەکرد، کە ڕێبەر ئۆجالان ئامادەنەبووە دیدار لەگەڵ ئەو شاندەی کۆمیتەی ڕێگرییکردن لە ئەشکەنجە (سی پی تی) ئەنجامبدات، کە دوایین جار سەردانی ئیمرالییان کردبوو.
پەروین بوڵدان ڕایگەیاند:”ئەم زانیارییە بۆ هەموومان بووە هۆی ترس و نیگەرانییەکی گەورە، پێویستە بەزووترین کات هۆکاری ئەم دۆخە ئاشکرا بکرێت، دەبێت بەرپرسان دەستبەجێ سەبارەت بەم بابەتە ڕوونکردنەوە بدەن، ڕووی دەممان لە وەزارەتی داد و دەوڵەتە، وەک هاوسەرۆکان ماوەیەک پێش ئێستا داواکاریمان بۆ سەردانکردنی ئێمراڵی پێشکەش بە وەزارەتی داد کرد، ئەو داواکارییەی ئێمە هێشتا لەسەر مێزە، تا ئێستا هیچ وەڵامێکی ئەرێنی، یان نەرێنییان پێ نەداوینەتەوە، ئەوە ناهەقییە و هیچ کەسیش حەددی ئەوەی نییە بە خەمساردی و بێباکیی لەو بابەتە بڕوانێت”.
هاوسەرۆکی هەپەدە جەختیشیکردەوە، کە “دەبێت سی پی تی دەستبەجێ زانیارییە بەردەستەکانی بۆ ڕایگشتی بڵاوبکاتەوە و نەبێتە هاوبەشی ئەو سزا و پێشێلکارییە نایاساییانەی دەسەڵات، من لێرە بانگەوازم بۆ سی پی تی ئەوەیە، ئێمە وەک هەدەپە لە هەوڵەکانمان بەردەوام دەبین تا ئەوکاتەی ئەم بابەتە ڕوون دەبێتەوە و داواکاریی پارێزەران بۆ سەردانی ئیمراڵی قبوڵ دەکرێت”.
ب.ل
