یەکێک لە هەڵوێستە دیارەکانی باشووری کوردستان لە دژی داگیرکارییەکانی دەوڵەتی تورک، لە ساڵی ٢٠١١دا بوو لە ڕێی کۆکردنەوەی یەک ملیۆن واژۆ بۆ دەرکردنی سوپای داگیرکەری تورک لەسەر خاکی باشوری کوردستان کە تیایدا بە هەزاران سیاسەتمەدار و ڕۆشنبیر و کەسایەتی دیاری کورد بەشدارییان کرد، بەڵام تائێستا چارەنوسی ئەو واژۆیانە کە ڕادەستی لایەنە پەیوەندیدارەکان کرا بە نادیاری ماوەتەوە.
ساڵی ٢٠١١ کۆمەڵەی گەنجانی وڵاتپارێزی کوردستان، هەڵمەتێکی فراوانی واژۆ کۆکردنەوەیان بۆ دەرکردنی بنکە سەربازی و سیخوڕییەکانی سوپای داگیرکەری تورک لە باشوری کوردستان دەستپێکرد، هەڵمەتەکە لە تەواوی گوند و شار و شارۆچکەکانی باشوری کوردستان و تەنانەت دەرەوەی وڵاتیش توانی یەک ملیۆن واژۆ کۆبکاتەوە.
جگە لە بەشداریی فراوانی هاوڵاتیان بەشێک لە ڕۆژنامەنووسان، شاعیران، هونەرمەندان، کەسایەتی ئاینییەکان، سیاسەتمەدار و ڕۆشنبیرەکانی باشوری کوردستان بەشدارییان تێدا کرد، هەروەها هەندێک پارت و ڕێکخراوی مەدەنی پشتیوانی کەمپەینەکە بوون.
لەو کەسایەتییانەش، شەهید دیار غەریب شۆڕشگێڕی دیاری کورد، شێرکۆ بێکەس شاعیری گەورە و ناوداری کورد، مەحمود عوسمان سیاسەتمەداری دیاری کورد، نەبەز گۆران شاعیر و ڕۆژنامەنوس، کەمال ڕەئوف ڕۆژنامەنوس و سەرنوسەری پێشووی ڕۆژنامەی هاوڵاتی، کوێستان محەمەد سیاسەتمەداری باشوری کوردستان، دکتۆر هەڤاڵ ئەبوبەکر پارێزگاری ئێستای سلێمانی.
کەمپەینەکە جگە لە باشوری کوردستان لە ڕێگای کۆمەڵێک گەنج و چالاکوانی خۆبەخشەوە لە دەرەوەی وڵاتیش بەڕێوەدەچوو، لە کۆتایی کەمپەینەکەدا، یەک ملیۆن واژۆ کۆکرایەوە و ئاراستەی پەرلەمانی هەرێمی کوردستان، ئەنجومەنی پاریزگاکانی هەرێم، سەرۆکایەتی هەرێم، پەرلەمانی عێراق، نەتەوە یەکگرتووەکان و یەکێتی ئەوروپا کران.
لە پاڵ ئەو کەمپەینەدا، گەلی باشوری کوردستان لە شار و شارۆچکە جیاوازەکان بۆ پشتیوانی لەو هەڵمەتە، دەیان چالاکی و خۆپیشاندان و ڕێپێوانی فراوانیان لە دژی داگیرکارییەکانی دەوڵەتی تورک ئەنجامدا.
بەڵام بەهۆی بێهەڵوێستی و گوێنەدانی حکومەتی هەرێمی کوردستان و عێراق و بێدەنگی ڕای نێودەوڵەتی لە ئاست ناڕەزایەتی و داخوازییەکانی گەل لە دژی داگیرکارییەکانی دەوڵەتی تورک، هیچ هەڵوێست و بڕیارێکی کاریگەر بەرامبەر داگیرکارییەکان نەگیراوەتەبەر و چارەنوسی یەک ملیۆن واژۆکەش تا ئێستا بە نادیاری ماوەتەوە و تەنانەت پشتگوێش خران.
تا ئەمڕۆش دەوڵەتی داگیرکەری تورک بە شێوازێکی دڕندانە هێرش دەکاتە سەر دەستکەوتەکانی گەلی کورد و ڕۆژ بە ڕۆژ داگیرکاریی و کۆمەڵکوژی لەسەر باشوری کوردستان فراوانتر دەکات، بەجۆرێک ٥٥٠ گوندی باشوری کوردستان لە ژێر هەڕەشەی چۆڵکردندان و تا ئیستاش ١٢٦ گوند بە تەواوی چۆڵکراون، بە سەدان هاوڵاتی مەدەنیش بوونەتە قوربانی.
لە ئێستادا لە ناو باشوری کوردستان ٣٧ بارەگای سەربازی سوپای تورک جێگیرکراون لەگەڵ دەیان بارەگای سیخوڕی سەر بە دەزگای میت، لەو بارەگایانەشدا بە هەزاران سەربازی تورک هەن کە زۆرینەیان سەر بە هێزی کۆماندۆن و داگیر کاریی تورکیاش بەردەوامە، لە بەرامبەر ئەمەشدا هەڵمەتەکانی ڕووبەرووبونەوەی داگیرکاریی درێژەیان هەیە، لەو چوارچێوەیەشدا جگە لە خۆپیشاندان و چالاکییە بەردەوامەکان، لە ڕۆژی ٣٠ی مانگی ٦ی ئەمساڵ لە چوارچێوەی هەنگاوی سەفەربەریی هەفتانین، بە دەستپێشخەری ڕێکخراوی ژنانی گەنجی تێکۆشەر و ڕێکخراوی ژیانەوەی گەنجان، بە دروشمی”لە پێناو کوردستانێکی یەکگرتوو و ئازاد فاشیزم و داگیرکاری بڕوخێنە” بۆ وەدەرنانی سوپای داگیرکەری تورک لە خاکی باشوری کوردستان و عێراق کەمپەینێکی واژۆ کۆکردنەوە ڕاگەیەندرا، کە بەهۆی قەدەغەی هاتووچۆ، ڕۆژی ٥ی مانگی ڕابردوو لە سەرتاسەری گوند، شارەدێ و شارەکانی باشوری کوردستان دەستی بە کارەکانی کرد و تا ئێستا ٢٥ هەزار واژۆ کۆکراوەتەوە.
ک.س
