ڕۆژنامەنووسان و پارێزەرانی ڕانیە ڕایدەگەیەنن، كارێكی نەكردەیە داوا لە پەدەکە بكرێت، كە بەر بە هێرشەكانی توركیا بگرێت، چونكە ئەو هێزە ئاوێزانی دەوڵەتی توركیا بووە و هێزەكانی تریشی لەخۆی ئاڵاندووە و بێ هەڵوێستی كردوون، پیشیان وایە تەنیا گەریلای پەكەكە ڕێ لە خەونی توركیا دەگرێت و پرۆسەی داگیركاریی ئەو دەوڵەتەی خاو كردووەتەوە.
هێرشەکانی دەوڵەتی تورکیا بە مەبەستی داگیرکردنی باشووری کوردستان، لە ١٧ی نیسانەوە بەهاوکاری پەدەکە بەردەوامیی هەیە و چالاكوانانی ڕانیەش دژی هاوكارییەكانی پەدەكە بۆ دەوڵەتی تورك دەوەستنەوە.
ڕەنج عوسمان، ڕۆژنامەنووسی شاری ڕانیە پێیوایە، خەون و ستراتیژی توركیا لەوە گەورەترە كە ئەو دەوڵەتە بییەوێت تەنیا بەشێكی كوردستان داگیربكات و دەڵێت: بەڵكو هاتووە پەل بهاوێژێت بۆ تەواوی ناوچەكە و ئامانجی ئەوەیە سنووری جوگرافی دەوڵەتی عوسمانی جاران بخاتەوە ژێر ڕكێف و دەسەڵاتی خۆی، لە ئێستادا هیچ جۆرە ڕێگرییەك نییە لەو داگیركارییەی توركیا، بە پێچەوانەوە جۆرێك لە هاوكاریی و هەماهەنگیی لەنێوان هێزە كوردییەكان هەیە بۆ داگیركردنی خاكی كوردستان لەلایەن توركیاوە.
“پارتی بووەتە كەوا سووری بەرلەشكر، ئەمەش ئەوە دەردەخات كە هێزە كوردییەكان هێزی نیشتیمانیی و نەتەوەیی نین و هەڵقوڵاوی هەناوی كۆمەڵگای كوردیی نین، بەڵكو لە چركەساتی دروستبوونیانەوە بە پیلانی هەواڵگریی هێزە هەرێمییەکان دروستكراون و ئێستاش بۆ بەرژوەندی خۆیان كار لەگەڵ ئەو هێزە هەواڵگرییانە دەكەن، جگە لە گەریلاكانی ئازادیی كوردستان هیچ هێزێكی تر ڕێگە لەو داگیركارییەی توركیا ناگرێت” ڕەنج عوسمان وای وت.
ئەو ڕۆژنامەنووسە پێشی وایە، کە نابێت داوا لە پەدەكە بكرێت كە بەر بەهێرشەكانی توركیا بگرێت، چونكە ئەو هێزە ئاوێزانی توركیا بووە و دەڵێت: ئەستەمە بتوانێت دەستبەرداری ببێت، وە تەنیا پەدەكەش نییە بەڵكو هێزەكانی تری باشووری كوردستانیش لە ڕێگەی پارتییەوە لەو بەرژوەندییانە ئاڵاون، كە توركیا لەناوچەكەدا هەیەتی، ئەمەش دواجار خزمەت بە توركیا دەكەن نەك بە پرسی كوردی و بەرگریی لە خاكی كوردستان، بەڵام پەكەكە بەچڕیی ڕێگریی لە خەونی توركیا دەكات و پەكەكە نەك بۆ قەندیل بەڵكو بۆ تەواوی كوردستان گرنگە و ئەگەر پەكەكە نەبێت توركیا پرۆسەی داگیركاریی خێراتر دەكات و زووتر كوردستان داگیردەكات.
هەر لەسەر ئەو پرسە، لەتیف حارس، پارێزەر و چالاكوانی سیاسی دەڵێت: توركیا سوودی لە پەرش و بڵاوی ناوماڵی كوردی وەرگرتووە، بەتایبەت سیاسەتی ئاڵۆز و نالۆژیكیی پەدەكە وایكردووە توركیا زیاتر سوودی لە ناتەبایی كورد ببینێت، ئەمەش ئەوە دەردەخات كە هەر هێزێكی سیاسیی لە هەناوی كۆمەڵگاكەی خۆیدا نەبوو، هەروەها بنەماكانی دیموكراسی و پێشخستنی ژیانی خەڵكەكەی بە ئامانج نەگرت، پەنا دەباتە بەر هێزە داگیركار و ڕەگەزپەرستەكان، پارتیش هەمان كاری كردووە و پێش هەموو لایەنێكیش خۆی زیانی پێ دەگات، بەڵام لە پێناو مانەوەی خۆی گوێ بەو زیانە نادات.
باسی ئامانجەکانی پەدەكەش كرد لە هاوكاریكردنی دەوڵەتی توركدا و وتی: ئامانجی پەدەكە لە هاوكاریكردنی توركیا دوو مەبەستی لە پشتەوەیە، ئەویش ئەوەیە یان پەدەكە دەیەوێت لە هاتنی توركیا هەمان ڕۆڵی میرنشینە كوردییەكان ببینێت و ببێتە كەوا سوری بەلەشكر لەدژی هێزێكی تری كوردیی، یان پشتی کردووە لە دەنگ و ڕازیبوونی خەڵك لە سیاسەتەكانی خۆی و بۆشی چووەتەسەر.
دیاری محەمەد، ڕۆژنامەنووسێکی دیکەی دەڤەری ڕانیەیە و بۆ ڕۆژنیوز وتی: پەکەکە ئەزموونێکی مێژوویی هەیە لە کۆکردنەوەی خەباتی بەشە جیاوازەکان، بۆیە داوا لەسەر جەم لایەنە سیاسییەکان دەکەم، کە یەکگرتوو و یەک هەڵوێست بن و لە دژی داگیرکاریی و دوژمنانی گەلی کورد بووەستنەوە.
س.س
