چالاكوانانی مەدەنی و ڕۆژنامەنووسانی هەولێر، ڕایدەگەیەنن، دەبێت حكومەت و بەرپرسانی هەرێم باش بزانن دەستگیركردن و ڕێگریکردن لە گردبوونەوە و خۆپیشاندانی هاوڵاتیان بۆ داواکردنی ماف و ئازادییە سیاسییەکانیان تا سەر بەردەوام نابێت و بۆ هیچ كەسێکیش نەچووەتە سەر.
زیاتر لە مانگێکە هێزە ئەمنییەكانی سنووری بادینان و هەولێر، هەڵمەتی دەستگیكردنی هاوڵاتیان، ڕۆژنامەنوسان چالاكوانانی كۆمەڵگای مەدەنی، مامۆستا و فەرمانبەران یان دەستپێكردوە و تائێستاش بە دەیان کەسیان دەستگیر کردووە کە هەندێکیان تا ئێستاش لە زینداندان، ئەمەش نیگەرانی زۆری خەڵک چالاكوان و ڕۆژنامەنووسانی لێکەوتووەتەوە، لەو چوارچێوەیەشدا چالاكوانانی مەدەنی و ڕۆژنامەنووسانی هەولێر، قسەیان بۆ ڕۆژنیوز کرد و داوای ئازاكردنی دەستگیركراوە کان دەكەن.
كۆچەر عەلی، ڕۆژنامەنووس و چالاكوانی كۆمەڵگای مەدەنی لەسەرەتادا لەبارەی دۆخی ئێستای هەولێر و دەستگیركردنی هاوڵاتیان و بەرتەسكردنەوەی مەودای ئازادییەکان بەمجۆرە دووا “بەداخەوە لە سنووری دهۆك و هەولێر كۆمەڵێک پێشلكاریی بەرامبەر بە ڕۆژنامەنووس و چالاكوانی مەدەنی و لایەنگرانی حزب و لایەنە سیاسیەكان دەکرێت و ڕێگریش لە ئەنجامدانی چالاكی مەدەنی وەكو گردبوونەوە و خۆپیشاندان دەكرێت، بۆیە پێویستە حكومەتی هەرێمی كوردستان باش بزانێت دەستگیركردنی هاوڵاتـیان لەسەر بیر و باوەڕی سیاسیی و ڕێگریكردن لە مووچەخۆران و فەرمانبەران بۆ گردبوونەوە و خۆپیشاندان بۆ هیچ حكومەت و كەسێک نەچووەتە سەر و ناچێتە سەریش”.
وتیشی: پێویستە تەواوی هێز و لایەنە سیاسیەكان داوابكەن ئەو كەسانەی لەسەر بیر و ڕای سیاسیی دەستگیركراون ئازاد بكرێن و پێویستە حكومەتی هەرێمیش واز لەو ڕەفتارانەی بهێنێت سەرجەم ئەو كەسانەی لەسەر كار و چالاكی مەدەنی و جیاوازی بیروباوەڕی سیاسیش دەستگیركراون ئازاد بكرێن.
ئاری عەبدوڵا، کە چالاكوانێكی دیکەی كۆمەڵگای مەدەنییە لە شاری هەولێر، دەربارەی هەمان پرس قسەیکرد و وتی: بەداخەوە هەرێمی كوردستان ساڵ بەساڵ تووشی قەیران و كێشەی زیاتر دەبێت، ئەركی سەرشانی هاوڵاتیانیش زۆر زەحمەتر دەبێت و لەبری ئەوەی حكومەتی هەرێمی كوردستان چارەسەری كێشەكانیان بۆ بكات كە چی هەڵساوە بە بەرتەسكردنەوەی ئازادییەكان لە هەرێمی كوردستان بە گشتی و شاری هەولێر بە تایبەتی دەبینین لە ماوەی ڕابردوو ڕۆژنامەنووس، چالاكوانی مەدەنی و ئەوكەسانەی كاری سیاسی دەكەن لەسەر بیروڕای جیاواز دەستگیركراون، كە بەداخەوە ئەمە هەوڵێكی زۆر خراپە.
ئەو چالاکوانە، وتیشی: حكومەتی هەرێمی كوردستان كە نەتوانێت كێشەكان چارەسەر بكات و هەموو دەرگاكانیش لەبەردەم خەڵکدا دابخات و ڕێگا نەدات خۆپیشاندان بكرێـت و رێگانەدات بۆچوونی جیاواز هەبێت و ناڕەزایەتی هەبێت، سەرباری هەموو ئەمانەش دەستگیركردن و سكاڵا تۆماكردن لەسەر ڕۆژنامەنووس و چالاكوانی مەدەنیش هەبێت، دەبیت بشزانێت ئەمانە نامان گەیەنێت بە هیچ.
ک.س
