چالاكوانانی ڕاپەڕین: دەسەڵات تۆڵەی ناڕەزایەتییەكانی ڕابردوومان لێدەكاتەوە

بەشێك لە چالاكوانانی مەدەنی و ڕۆژنامەنووسانی سنوری ئیدارەی ڕاپەڕین گردبوونەوەیەكی نارەزایەتییان ئەنجامدا، دژی دەستگیركردنی چالاكوانێكی سنورەكە و ڕایانگەیاند: بەم كارە دەسەڵات تۆڵەی خۆپیشاندان و ناڕەزایەتییەكانمان لێدەكاتەوە.


سەر لە ئێوارەی ئەمڕۆ بەشێك لە چالاكوانانی مەدەنی و ڕۆژنامەنووسانی سنوری ئیدارەی ڕاپەڕین، گردبوونەوەیەكی ناڕەزاییان لە ناو باخی گشتی شارۆچكەی ڕانیە ئەنجامدا دژی دەستگیركردنی ڕاهین یاسین عەبدوڵا كوڕی مامۆستا یاسین چالاكوانی خۆپیشاندانەكانی ڕابردووی سنورەكە. 


 
لە گردبوونەوەكەدا بەیاننامەی ناڕەزایی لەلایەن زریان جەوهەر خوێندرایەوە كە تێیدا هاتبوو:" دەسەڵات لەماوەی ڕابردوو ستەمی زۆری بەرامبەر فەرمانبەران و چین و توێژە جیاوازەكانئەنجامدا، كە بڕینی موچە و قوتی خەڵك بوو لەم چوارچێوەیەدا چالاكوانان و ڕۆژنامەنوسان لەناوچە جیاجیاكان گردبونەوە و خۆپیشاندانی ناڕەزایەتییان ڕێكخست.

لە بەشێكی دیكەی بەیاننامەكەدا ئاماژە بەوە درابوو، ئەوەی جێگەی داخە دەسەڵات ئیستا كەوتۆتە تۆڵە كردنەوە لە چالاكوانان، بە سزادان و دەركردن و نان بڕاوكردن و  لێدان و ڕفاندن، نەك خۆیان  بەڵكو كەس و كارەكانیشیان، دواترین كاریان ڕفاندنی (ڕاهین یاسین عەبدوڵا) كوڕی مامۆستا یاسین چالاكوانی دیاری خۆپیشاندانەكانی ڕابردووە.

لە درێژەی لێدوانەكەدا هاتبوو، وەك چالاكوانانی ئیدارەی ڕاپەڕین بەتوندی ئەو كارەی دەسەڵات ئیدانە دەكەین و داواكارین هەرچی زووە دادگا و پۆلیس و لیژنەی مافی مرۆڤ لە پەرلەمانی كوردستان و دەستەی مافی مرۆڤ بەكاری خۆیان هەست و تاوانباران سزا بدرێن بۆئەوەی كاری لەو شێوە دووبارە نەبێتەوە.


 
د.ح