سێشەممە, 24 ماي 2016 – 18:52
ڕۆژنیوز ـ هۆشمەند كوردی
دەربڕینی ناڕەزایەتیەكان دژ بە دەستگیركردنی كچە ڕۆژنامەنووس ئایسەڵ ئاڤیستا بەردەوامە، لەوچوارچێوەیەدا چالاکانی گەرمیان، داوا دەكەن مافی مرۆڤ و سەندیکای ڕۆژنامەنووسان بێ دەنگ نەبن.
ڕۆژنامەنوس مەریوان حەسەن بە ڕۆژنیوزی ووت: “بە توندی ئیدانەی ئەو لا یەنە دەكەم كە هەستاوە بە گرتنی ئایسەل ئاڤێستا، پێموایە دەستگیركردنی هەر ڕۆژنامەنووسێك پێچەوانەی یاسای كاری ڕۆژنامەوانیە، بۆیە تا ئەم جۆرە ڕەفتارانەی دەسەڵاتداران لە هەرێمدا هەبن دۆخی ڕۆژنامەگەریمان شیاوی تانەو تەشەرە”.
ئاماژەی بەوەشکرد، ناكرێت باس لە پێشكەوتنی وڵات بكەین تا مانشێتی ڕاگەیاندنەكانمان بڕیاری لەم چەشنەی تێدابێت، ئەزموونی وڵاتانیش سەلماندوویانە هەر وڵاتێك ئازادی بۆ ڕۆژنامەنووسانی تێدا فەراهم نەكرابێت، ئەو وڵاتە لە دۆخێكی خراپی ئابوری وسیاسیدابووە.
هەرەها ڤیان سابیر چالاكوانی بواری ژنان لەسەر دەستگیرکردنی ئاڤێستا قسەی بۆ ڕۆژنیوز کردوو وتی:”دەستگیركردنی ئەو كچە ڕۆژنامەنووسە پەڵەیەكی ڕەشە بەناو چاوی دەسەڵاتی كوردییەوە، و ڕێگیریکردن و پێشێلكردنێكی ڕوونی بنەماكانی ئازادی و ئازادی رۆژنامەنوسیە، چونكە نابێت سنورەكانی ئازادی بەهۆكاری حزبی و سیاسی بەرتەسك بكرێنەوە، لەكاتێكدا ژنان هاوشانی پیاوان لەسەرانسەری كوردستاندا تێكۆشانی نەتەوەیی دەكەن”.
وتیشی: “ئەم هەوڵە دژی ئەو بەشداریە كارا و چالاكەی ژنانە، کەبەتایبەت لە رۆژئاوای كوردستان دەستیان پێكردووە، پێویستە مافی مرۆڤ بێ دەنگ نەبێت و هەڵویستیان هەبێت”.
لای خۆیشەوە، بێستون باجەڵان كە پیشەی مامۆستایە وەها دوا: “بواری ڕۆژنامەگەری وەك بوارەكانیتر لە هەرێمی كوردستاندا لەدۆخێكی خراپدایە و تەنها بە زارەكی ڕۆژنامەگەریی ئازادە، دەستگیركردنی ئەو كچە ڕۆژنامەنووسە پێشێلكاریە بەرامبەری کراوە، دەستگیركردنی پێشبینی كراو بووە، بەبیانووی جیاجیا دەیانەوێ لەكەداری بكەن، ئەمەش لەلایەن ئەو پارتەوە دەستگیركراوە لافی رۆژنامەگەری ئازاد لێدەدات”.
وتیشی: پێویستە هەموو ڕۆژنامەنووسان ئیدانەی دەستگیركردنی ئەو ژنە رۆژنامەنوسە بكەن و هەڵویستی جدییان هەبێت بۆ ئەوەی ڕێگری لە دووبارە بونەوەی وەها کارێک بكرێت، چونكە دەستگیركردنی ئەم رۆژنامەنووسە زەنگێكی مەترسیدارە بۆ رۆژنامەنوسانی كوردستان بەگشتی”.
ڕۆژی 19.05.2016 لەکاتی گەڕانەوەی لە شەنگالەوە بۆ شێخان، ڕۆژنامەنوس ئاڤێستا لەسەر ڕێگای دهۆک لەلایەن هێزێکی چەکداری پارتی دیموکراتی کوردستانی عێراقەوە دەڕفێندرێت و پاش سێ ڕۆژ تەسلیمی دەزگای سیخوڕی پاراستنی پارتی دەکرێت، بەپێی زانیاریەکان ناوبراو لە زیندانی پاراستنی پارتی دەستی بەمانگرتن لە خواردن کردووە و بەهۆی نەخۆشیەوە باری تەندروستی ناجێگیرە و پارتی ڕێگە نادات هیچ کەس چاوی پێی بکەوێت.
س.ح
