چالاکوانانی هەڵەبجە: ناکۆکی لایەنە سیاسییەکان دەرفەتی داگیرکاریی بۆ تورکیا ڕەخساندووە

چالاکوانانی شاری هەڵەبجە پێیانوایە بەهۆی ناکۆکی نێوان لایەنەکان و بێدەنگییەکانی حزبەکان و حکومەت و پەرلەمان لەئاست داگیرکارییەکانی دەوڵەتی تورک، ئەو دەرفەتەی بۆ دەوڵەتی تورک ڕەخساندووە کە پەرە بە داگیرکارییەکانی بدات.


داگیرکارییەکانی دەوڵەتی تورک لەسەر باشوری کوردستان ڕۆژ بە ڕۆژ فراوانتر دەبێت، لە بەرامبەریشدا حزبەکان و حکومەت و پەرلەمانی هەرێمی کوردستان بێدەنگییان هەڵبژاردووە، لەوبارەیەوە چالاکوانانی کۆمەڵگەی مەدەنی شاری هەڵەبجە بۆ ڕۆژنیوز دەدوێن.

وەرزێر فایەق، چالاکوانێکی شاری هەڵەبجەیە دەڵێت: داگیرکارییەکانی سوپای دەوڵەتی تورک مەترسی بۆ سەر هەرێم و تەواوی عێراق هەیە و ناکۆکی نێوان لایەنە سیاسیەکانی هەرێمیش ئەو دەرفەتەی بۆ دەوڵەتی تورک ڕەخساندووە، کە پەرە بە داگیرکارییەکانی بدات.


دەشڵێت: دەبوو هەر لە سەرەتای هاتنی سوپای تورک بۆ ناو خاکی باشوری کوردستان، پەرلەمانی هەرێم دانیشتنی بە پەلە و نائاسایی ئەنجام بدایە بۆ وەڵامدانەوەی ئەو داگیرکارییانە، بەڵام بەهۆی بەحزبییکردنی پەرلەمان لەلایەن حزبە باڵادەستەکان و وابەستەبوونیان بەو وڵاتانە، ئەوەی لە زیانی ئەوان بێت ئەنجامی نادەن.

عاسی فایەق چالاکوانێکی دیکەی کۆمەڵگەی مەدەنی، بۆچوونی وایە: سنورەکانی هەرێمی کوردستان لە ڕابردوودا لەژێر تۆپباران و بەزاندن بووە و ئێستاش لەوە تێپەڕی کردووە و سوپای دەوڵەتی تورک بە درێژایی چەندین کیلۆمەتر سنوری بڕیووە و داگیری کردووە، ئەمەش مەترسی بۆ سەر دانیشتوانی هەرێم بە گشتی و ئەو ناوچانە بەتایبەتی دروست دەکات.


عاسی فایەق ئاماژە بەوە دەکات: سەرباری خەمساردی حکومەتی عێراقی و حکومەتی هەرێم، دەبێت گەل و ڕێکخراوەکانی کۆمەڵگەی مەدەنی لە ڕێگەی خۆپیشاندان و دەرکردنی بەیاننامە و کۆکردنەوەی واژۆ فشاریان لەسەر دروست بکرێت، بۆئەوەی ئەو داگیرکارییانە نەهێڵن و مۆڵەت بە هیچ دەوڵەت و سوپایەک نەدەن، کە خاکی هەرێم و عێراقیش ببەزێنن.


ک.ک