جێگری نوێنەری چین لە نەتەوە یەکگرتوەکان لەسەر هێرشەكانی دەوڵەتی داگیركەری تورك بۆسەر ڕۆژئاوای كوردستان هاتەدەنگ و رایگەیاند، هێرشی تورکیا بۆسەر سوریا پێشێلکردنی سەروەری خاکی ئەو وڵاتەیە و نەهامەتیی سورییەکان زیاتر دەکات، بۆیە داوا لە ئەنقەرە دەکەین دەستبەجێ هێرشەکانی بوەستێنێت.
قنغ شوانگ، جێگری نوێنەری چین لە نەتەوە یەکگرتوەکان لە کۆبونەوەی ئەنجومەنی ئاسایشی نێودەوڵەتی، کە تایبەت بو بە دۆخی سوریا وتی: دەبێت ئێمە پشتیوانی لە سەروەری سوریا و یەکێتی خاکی ئەو وڵاتە بکەین، بەتایبەت، کە تائێستاش دۆخی ئەمنی سوریا ئاڵۆزە و تورکیاش لەم کاتەدا هێرشی ئاسمانی دەکاتە سەر ئەو وڵاتە.
نوێنەری چین لە نەتەوە یەكگرتووەكان وتیشی: ئەنقەرە دەیەوێت هێرشی زەمینیش بکاتە سەر ناوچەکانی سوریا، هەروەها هێرشەکانی ئیسرائیلیش بۆسەر سوریا بەردەوامی هەیە، کە هەردووکیان سەروەری خاکی سوریا پێشێل دەکەن، هەروەها، هێرشەکان بونەتە هۆی زیاتربونی نەهامەتییەکانی گەلانی سوریا.
باسی لەوەشكرد، كە چین نیگەرانە لە دۆخی سوریا و داوای لە تورکیا و ئیسرائیل كرد دەستبەجێ هێرشەکانیان بۆسەر سوریا ڕابگرن، هەروەها هەمو هەنگاوێکیش بوەستێنین، کە دەبێتەهۆی زیادکردنی گرژییەکان و پێداگری لەسەر چارەسەری کێشەکان بکەن لەرێگەی گفتوگۆوە.
ئەوە لە كاتێكدایە، دەوڵەتی داگیركەری تورك هێرشە ئاسمانییەكانی بۆسەر ڕۆژئاوای كوردستان دەستپێكردووە و ئەردۆغانیش نیازی خۆی لە هێرشی داگیركاری بۆسەر ڕۆژئاوای كوردستان نەشاردووەتەوە.
س.س
