ڕاپەڕین، دژی داگیرکاریی تورکیا گردبوونەوە بەڕێوەچوو

لە شارۆچکەی ڕانیە، گردبوونەوەیەک دژی داگیرکارییەکانی دەوڵەتی تورک ئەنجامدرا و وێڕای ئیدانەکردنی هێرش و داگیرکارییەکان داواکرا لایەنە سیاسییەکان و خەڵک بە یەکگرتووی دژی ئەو داگیرکارییە بوەستنەوە.


سەر لە ئێوارەی ئەمڕۆ لە شارۆچکەی ڕانیەی ناوەندی ئیدارەی ڕاپەڕین گردبوونەوەیەک دژی داگیرکارییەکانی دەوڵەتی تورک ئەنجامدرا.

گردبونەوەکە بە خولەکێک وەستان بۆ گیانی پاکی شەهیدان دەستیپێکرد، دواتر خالید مستەفا، هاوسەرۆکی تەڤگەری ئازادی کۆمەڵگای کوردستان - هەرێمی ڕاپەڕین قەسەی کرد و ڕایگەیاند: لە دوای هێرشی عەفرین و داگیرکردنی لە لایەن تورکیاوە و بێدەنگی ناوخۆیی و نێودەوڵەتی، تورکیا ڕێگای بۆ خۆش بوو بۆ هێرشکردنە سەر پارچەیەکی دیکەی کوردستان، لە ئێستادا بەهۆی پەرتەوازەیی لایەنەکانی باشوری کوردستان، ناعەدالەتی و گەندەڵی باڵی بە سەر هەرێمدا کێشاوە، دەوڵەتی داگیرکەری تورکیش بە هاوبەشی لە لایەن هێڵی خیانەت لە باشوری کوردستان دەستیان بە ئۆپەراسیۆنێکی بەرفراوان کردووە لە خوارکورک و برادۆست و بادینان، ئەوەش بە مانای داگیرکردنی ناوچەکە دێت.

هاوسەرۆکی تەڤگەر وتیشی: ئەو هێرشانە لە هەمانکاتدا لە کەرکوک و ناوچەکانی دیکەی باشوری کوردستان لە لایەن تورکیاوە بەردەوامی هەیە، لێرەدا دەبێ هەموو تاکێکی کورد و وڵاتپارێز لە بەرامبەر داگیرکاری تورکیا و پلانە چەپەڵەکانی بێدەنگ نەبن و خاوەن هەڵوێست بن، بێدەنگی لە بەرامبەر هێرشەکان خیانەتی گەورەیە، هەموو کەسێک دەبێ ئەوە باش بزانێ ئەو هێرشە تەنیا بۆ سەر پەکەکە و گەریلا نییە بەڵکو بۆ سەر هەموو کوردێکە.

لە کۆتایی قسەکانیشیدا داوای لە گەلی کورد و هەموو تاکێک کرد هەڵوێستیان هەبێ دژی داگیرکاریەکانی تورکیا، "دڵنیاشم گەلی کورد هەڵوێستی نیشتمانی خۆیان بەرامبەر داگیرکاری پێشان دەدەن وەک چۆن بەرامبەر ڕژێمی بەعسی ڕووخاو ڕاپەڕینیان کرد، با بەس بێت سیاسەتی پەرتەوازەیی با هەموومان دەست لە ناو دەست یەکێتی نەتەوەیی و هەڵوێستی دژی داگیرکاری یەک بگرین تەنیا چارەسەر ئەوەیە".

ک.س