ڕه‌هه‌نده‌ سیاسیى و ئابوریى و که‌لتورییه‌کانى داگیرکاریی تورکیا تاوتوێ کران

دیبه‌یتێک له‌سه‌ر داگیرکاریه‌کانی ده‌وڵه‌تى تورک له‌ ھه‌رێمی کوردستان به‌ڕێوه‌چوو، که‌ تێیدا ڕه‌ھه‌نده‌ سیاسیی و ئابوریی و که‌لتورییه‌کانى داگیرکاریه‌که‌ و ئامانج و مه‌ترسیه‌کانی داگیرکاریی تورکیا گفتوگۆی له‌سه‌ر کرا و پێویستیه‌کانی ڕووبه‌ڕووبوونه‌وه‌ی تورکیا خرایه‌ڕوو.


به‌ره‌ی نیشتیمانیی دژی داگیرکاریی کاتژمێر ٤:٠٠ی پاش نیوه‌ڕۆی ئه‌مڕۆ، له‌ ھۆڵی مۆزه‌خانه‌ی ئه‌منه‌ سوره‌که‌ی شاری سلێمانی دیبه‌یتێکی له‌باره‌ی داگیرکارییه‌کانى تورکیا ئه‌نجامدا.

له‌ دیبه‌یته‌که‌دا ھه‌ریه‌ک له‌ موحسین ئه‌دیب، مامۆستای زانکۆ و دڵزار عارف، ڕۆژنامه‌نووس و مه‌ھابات کامیل، مامۆستای زانکۆ قسه‌یان کرد.


له‌ سه‌ره‌تای دیبه‌یته‌که‌دا موحسین ئه‌دیب، ڕه‌ھه‌نده‌ سیاسیه‌کانی داگیرکاریی تورکیای خسته‌ڕوو و ئاماژه‌ی به‌وه‌کرد: ئه‌ردۆغان و ده‌وڵه‌تی تورکیا خه‌ونی زیندووکردنه‌وه‌ی خه‌لافه‌تی عوسمانیان ھه‌یه‌ به‌ شێوه‌یه‌کی نوێ، بۆ ئه‌و ھه‌وڵانه‌ش تاکه‌ ڕێگر له‌ به‌رده‌میاندا کورده‌.


موحسین ئه‌دیب ئاماژه‌ی به‌وه‌شکرد، که‌ کورد له‌ باکوری کوردستان و له‌ ڕۆژئاوای کوردستان ھه‌موو ھه‌لێک ئه‌قۆزنه‌وه‌ بۆ به‌ھێزبوون و گه‌وره‌بوون، له‌ به‌رامبه‌ردا ئه‌رۆغان و تورکیا ھێرش ده‌که‌نه‌ سه‌ر ده‌ستکه‌وته‌کانی کورد، ھێرشکردنی بۆ ھه‌رێمی کوردستانیش بۆ ئه‌وه‌یه‌ دژایه‌تی په‌که‌که‌ بکات و فشار بخاته‌ سه‌ر ئه‌مریکا بۆ ئه‌وه‌ی ھاوکاری کورد نه‌کات، ده‌یه‌وێت پارتی دیموکراتی کوردستان - عێراق، بپارێزێت، ھه‌روه‌ھا ده‌یه‌وێت به‌و ھێرشه‌ ده‌نگ بۆ ھه‌ڵبژاردنی تورکیا کۆبکاته‌وه‌.

ھه‌ر له‌ دیبه‌یته‌که‌دا دڵزار عارف، ڕۆژنامه‌نووس باسی له‌ ڕه‌ھه‌نده‌ ئابوریه‌کانی ھێرشی تورکیا کرد بۆ سه‌ر ھه‌رێمی کوردستان و وتی: یه‌کێک له‌ ئامانجه‌کانی تورکیا بۆ ھێرشکردن هه‌وڵدانه‌ بۆ به‌ھێزکردنی ئابورییه‌که‌ی، ده‌یه‌وێت له‌ڕێگه‌ی داگیرکارییه‌وه‌ داھاتی وڵاتان بۆخۆی ببات و ھێزێ خۆی پێ زیاد بکات و بازاڕی گه‌وره‌ بۆخۆی بدۆزێته‌وه‌.


ئاماژه‌ی به‌وه‌شکرد: ئامانجی تورکیا له‌ ھێرشکردنه‌ سه‌ر ھه‌رێمی کوردستان ئه‌وه‌یه‌ که‌ سروشت و کشتوکاڵ و به‌رھه‌مھێنان له‌ ھه‌رێمی کوردستان وێران بکات بۆ ئه‌وه‌ی ھه‌میشه‌ ھه‌رێم چاوی له‌ ده‌ستی تورکیا بێت بۆ دابینکردنی پێداویستییه‌ خۆراکییه‌کانی، ھه‌روه‌ھا ده‌یه‌وێت ده‌ستبه‌سه‌ر سامانی گاز و نه‌وتی ھه‌رێمدا بگرێت و ھه‌رێم ناچار بکات له‌گه‌ڵ کۆمپانیا تورکیه‌کان کار بکه‌ن.

دواتر مه‌ھابات کامیل، مامۆستای زانکۆ، ڕه‌ھه‌نده‌ کۆمه‌ڵایه‌تیه‌کانی داگیرکاری تورکیای خسته‌ڕوو و وتی: ئامانجی تورکیا ئه‌وه‌یه‌ که‌ به‌ داگیرکاریه‌کانی کلتوری خۆی به‌سه‌ر کۆمه‌ڵگای کوردیدا بسه‌پێنێت، به‌وه‌ش ھه‌یمه‌نه‌ی خۆی به‌سه‌ر کۆمه‌ڵگای کوردیدا بسه‌پێنێت.


ئه‌وه‌شى وت: تورکیا پێش ھێرشکردن بۆ سه‌ر ھه‌رێمی کوردستان ده‌مێکه‌ ئاماده‌کاریی بۆ داگیرکردنی کۆمه‌ڵگای کوردی ده‌کات له‌ ڕێگه‌ی دراما تورکییه‌کان و پۆشاکی تورکی و کلتووری تورکییه‌وه‌.


 

ک.ک