ڕۆژنامەنووسان و چالاكوانانی هەولێر ڕایدەگەیەنن، توركیا هەر هێندە ئیشی بە پەدەكە هەیە، تاكو پەكەكە لە سنوورەكانی باشووری كوردستاندا دەمێنێت، بۆیە كەوتنی پەكەكە كەوتنی پەدەكەشە، بە ئاماژەکردن بە پەدەکەش دەڵێن: هێزێکی کوردیی دەرگای باشووری كوردستانی بۆ تورکیا کردووەتەوە.
هێرشی داگیركیاریی دەوڵەتی تورك، كە لە ١٧ی نیسانی ئەمساڵ بۆ سەر ناوچەكانی زاپ و مەتینا و ئاڤاشین دەستیپێکردووە، کاردانەوەی بەدوای خۆیدا هێناوە و ڕۆژنامەنووسانی هەولێریش لەڕێگای ڕۆژنیوزەوە هەڵوێستی خۆیان نیشان دەدەن.
بەدران محێدین، نووسەر و ڕۆژنامەنووس دەڵێت: توركیا دەیەوێت بەر لەتەواوبوونی وادەی ڕێككەوتننامە نێودەوڵەتییەكان، ئەو ناوچانەی سەر بە ویلایەتی موسڵ بوون لە سەردەمی دەوڵەتی عوسمانییدا بیانگەڕێنێتەوە بۆسەر خاكی توركیا، هەروەها توركیا دەیەوێت حاكمی ڕەهای ناوچەكە بێت و كێشەكەی تەنیا پەكەكە نیە، بەڵكو كێشەی لەگەڵ بوونی كورددا هەیە و هەوڵی لەناوبردنی كورد دەدات.
ئەو ڕۆژنامەنووسە وتیشی: ئەگەر پارتی پێیوایە كێشەی توركیا پەكەكەیە، ئەوا هەڵە لە بابەتەكە تێگەیشتووە، وە ئەگەر پارتی بیەوێت هاوكاریی دەوڵەتی توركیا بكات، وەكو ئەوە وایە خۆی لەسەر دارێك دانیشتبێت و بە مشار ژێرەوەی دارەكە ببڕێتەوە، چونكە توركیا هەر هێندە ئیشی بە پارتی هەیە تاكو پەكەكە لە سنوورەكانی باشووری كوردستان بمێنێت، بە پێچەوانەوە ئەگەر هەر ڕێككەوتنێكی ئاشتیی لەنێوان توركیا و پەكەكە بێتە ئاراوە، ئەوا توركیا هیچ حیسابێك بۆ پارتی ناكات و وەلای دەنێت.
بەبۆچوونی ڕۆژنامەنووسان و چالاكوانان، توركیا بچێتە هەر شوێنێك ناگەڕێتەوە و داگیری دەكات و وەك خاكی خۆی دەیناسێنێت، بۆیە لەسەر هەموو تاكێكی كورد ئەرکە بەرگریی لە خاك و نیشتیمانی نەتەوەكەیان بكەن و ڕێگریی لە خەونی داگیركاریی دەوڵەتی فاشستی تورك بکەن.
هەر لەسەر ئەو پرسە، ڕێباز گڕاوی، چالاكوانی كۆمەڵگای مەدەنی بە ڕۆژنیوزی وت: بەداخەوە حزبەكانی باشووری كوردستان بە دەسەڵات و ئۆپۆزسیۆنەوە بێ هەڵوێستن و هەموان لەو ڕێككەوتنە ئابورییە قازانج دەكەن، كە حكومەتی هەرێم لەڕێگەی گرێبەستی ٥٠ ساڵەی نەوت لەگەڵ توركیا كردوویەتی، ئەمەش وادەكات هیچ حزبێك دەنگ هەڵنەبڕێت و لەئاست ئەم داگیركارییەدا بێدەنگ و بێ هەڵوێست بن.
دەشڵێت: كورد قازانج لە بێدەنگیی و هاوكارییكردنی دەوڵەتی توركیا ناكات، چونكە توركیا چەند كێشەیە بۆ پەكەكە چوار ئەوەندە كێشە و بەڵایە بۆ ئەزموونی باشووری كوردستان، توركیا لەهەوڵی فراوانكردنی جوگرافیای دەوڵەتەكەی خۆیدایە و بۆ ئەم مەبەستەش هێزی كوردی هەیە هاوكاریی دەكات و دەرگای باشووری كوردستانی بۆ دەكاتەوە تاكو توركیا داگیری بكات.
س.س
