ڕێكخراوە جیهانییەكان داوا لە بەرپرسانی پارتی دەكەن بەزووترین كات زوبێر برادۆستی ئازاد بكەن

ڕێكخراوی(سی پی جەی) نێودەڵەتی ڕاپۆرتی خۆی لەبارەی دەستگیركردن و شوێن بزركردنی زوبێر برادۆستی پەیامنێری ئاژانسی ڕۆژنیوز بڵاوكردەوە و تیایدا داوای لە هێزە ئەمنییەكانی پارتی كردووە بە زوویی ئەو ڕۆژنامەنووسە ئازاد بكەن.


كەمێك لەمەو بەر ڕێكخراوی(سی پی جەی) نێودەڵەتی ڕاپۆرتی خۆی لەبارەی دەستگیركردن و شوێن بزركردنی زوبێر برادۆستی پەیامنێری ئاژانسی ڕۆژنیوز بڵاوكردەوە و تیایدا داوای لە هێزە ئەمنییەكانی پارتی كردووە بە زوویی ئەو ڕۆژنامەنووسە ئازاد بكەن.

لەڕاپۆرتەكەدا هاتووە، بەگوێرەی ڕاپۆرتەكانی ڕێكخراوی ۱۷ی شوبات بۆ مافەكانی مرۆڤ و سۆران حسێن ئیدیتەری ڕۆژنیوز دەستگیركردنی زوبێر برادۆستی پەیوەندی بەو ڕاپۆرتانەوە بووە كە لەسەر بۆردوومانی فڕۆكە جەنگییەكانی سوپای توركیا بڵاویكردوونەتەوە لە ئاژانسی ڕۆژنیوز.

ئەم ڕێكخراوە جیهانییە ئاماژەی بەوەشكردووە، زوبێر برادۆستی لەلایەن هێزێكی ئەمنی سەر بە پارتی دیموكراتی كوردستان بەناوی هێزی هەڵگورد دەستگیر كراوە و تا ئێستا ڕێگە بە كەس و كارەكەی نادرێت بیبینن و تەنانەت لە ڕۆژی دەستگیركردنیەوە تا ئێستا نەبراوەتە دادگا.

هاوكات، Ignacio Miguel Delgado بەڕێوەبەری بەشی خۆرهەڵاتی ناوەڕاست و باكوری ئەفریقای ڕێكخراوی (سی پی جەی) ڕایگەیاندووە، دەستگیركردنی ڕۆنامەنووس بەبێ هیچ هۆكارێك دەچێتە چوارچێوەی سیستەمی دیكتاتۆریانە لەكاتێكدا بەرپرسانی كورد خۆیان بە دیموكراسی پێناسە دەكەن.

ئەو بەرپرسەی ڕێكخراوە جیهانییەكە داواشی لە دەسەڵاتدارانی حكومەتی هەرێمی كوردستان كردووە كە دەستبەجێ زوبێر برادۆستی ئازاد بكرێ یان چارەنوسی ئەو ڕۆژنامەنووسە دیاری بكرێت و ببرێتە بەردەم دادگا.

ڕێكخراوە جیهانییەكە لەسەر ئەم پرسە پەیوەندی بە دیندار زێباری، بەرپرسی لیژنەی وەڵامدانەوەی راپۆرتە نێودەوڵەتییەکان لە هەرێمی کوردستان كردووە، بەڵام تا ئێستا بە لێدوانێكی فەرمی وەڵامی نەبووە لەسەر دەستگیركردنی ئەو ڕۆژنامەنوسە.

زوبێر برادۆستی پەیامنێری ئاژانسی ڕۆژنیوزە و ماوەی نۆ ڕۆژە لەلایەن هێزێكی پارتییەوە دەست بەسەر كراوە.

د.ح