ڕێکخراوی پەیامنێران بۆ ماف و گەشەپێدانى ڕۆژنامەنوسان بڵاویکردەوە، ساڵى ڕابردوو ٣٠٣ حاڵەتی پێشێلکاری بەرامبەر رۆژنامەنووسان و دەزگاکانی راگەیاندن ئەنجام دراوە، دەشڵێن، لە هەولێر زۆرترین حاڵەتى پێشێلکردنى مافەکانى ڕۆژنامەنوسان تۆمار کراوە.
ئەمڕۆ لە شارى هەولێر هۆزان قادر، سەرۆکى رێکخراوی پەیامنێران بۆ ماف و گەشەپێدانى ڕۆژنامەنوسان ڕاپۆرتی دووەمی ساڵانەی خۆی لەبارەی پێشێلکارییەکان بەرامبەر بە رۆژنامەنووسان لە ساڵى ڕابردوو بڵاوکردەوە.
لە ڕاپۆرتەکەدا هاتووە، ساڵى ڕابردوو ٣٠٣ حاڵەتی پێشێلکاری بەرامبەر رۆژنامەنووسان و دەزگاکانی راگەیاندن ئەنجام دراوە و ئامارەکان پێمان دەڵێن، کاری رۆژنامەنووسان رۆژ بە رۆژ سەختر دەبێت، چونکە پێشێلکارییەکان بەرامبەر رۆژنامەنووسان بەردەوامی هەیە .
ئاماژەبەوەشکراوە، لە ساڵی رابردوودا ١٥٢ حاڵەتی رێگریکردن لەکاتی رووماڵکردن ئەنجامدراوە ، ٥٠حاڵەتی هێرش و سوکایەتی پێکردن و لێدانی رۆژانامەنووسان تۆمارکراوە.
ئەوەشخراوەتەڕوو، ٤٠ حاڵەتی دەستبەسەرداگرتن و شکاندنی کەلوپەلی رۆژنامەوانیتۆمارکراوە، هەروها ٣٥ حاڵەتی دەستگیکردنی رۆژنامەنووسان و حەوت حاڵەتی تۆمارکردنی سکاڵا لەسەر رۆژنامەنوسان هەبووە، کە تەنها یەک سکاڵا بەپێی یاسای رۆژنامەگەری کاری پێکراوە.
دەشڵێن، حەوت حاڵەتی وەرگرتنی بەڵێنامە، چوار حاڵەتی هێرشى ئەلیکترۆنی و ماڵپەرە هەواڵیەکان، دوو حاڵەتی برینداربوونی رۆژنامەنووسان لەکاتی رووماڵکردن، دوو حاڵەتی هەڕەشەکردن لە رۆژنامەنووسان، دوو حاڵەتی تەقەکردن لە رۆژنامەنووسان و دوو حاڵەتی داخستنی میدیاکان کراوە.
باسلەوەشکراوە، شارى هەولێر پێشەنگە لە پێشێلکاری بەرامبەر بە رۆژنامەنووسان، بەجۆرێک لە ساڵی رابردوودا ٩٧ پێشێلکاری بەرامبەر بە رۆژنامەنووسان لەو شارە تۆمارکراوە و لە پلەی دووەمدا شاری سلێمانی دێت بە ٧٧ حاڵەتی پێشێلکارى، دهۆک بە ٧٣ حاڵەت لە پلەى سێیەمە و هەڵەبجە بە ١٣ حاڵەت لە پلەى چوارەمە.
لە کۆتایدا وتراوە، ئەم ڕاپۆرتە ئاراستەی هەرسێ سەرۆکایەتی هەرێمی کوردستان، حکومەت، پەرلەمان و کونسوڵی وڵاتان دەکرێت.
ئ.م
