دوێنێ شاندێکی هەرێمی کوردستان سەردانی بەغدایان کرد بۆ گفتوگۆکردن لە سەرشەنگال، هەرێم و بەغدا ڕێکەوتوون کە شەنگال لەڕووی ئیداریی، ئەمنیی و خزمەتگوازرییەوە بە هاوبەشی بەڕێوە ببەن، ئەم بڕیارەش کاردانەوەی ئەنجومەنی خۆبەڕێوبەریی شەنگال و ئێزدییەکانی بەدوای خۆیدا هێناوە.
هەفتەی ڕابردوو شاندێکی حکومەتی عێراق لە هەولێر لەگەڵ وەزیری ناوخۆی هەرێمی کوردستان کۆبوونەوە لەسەر پرسی شەنگال و گەڕانەوەی پارتی دیموکراتی کوردستان-عێراق بۆ ئەو شارۆچکەیە.
هەر بۆ ئەو مەبەستە دوێنێ هەینی شاندێکی هەرێمی کوردستان بە سەرۆکایەتی ڕێبەرئەحمەد، وەزیری ناوخۆ سەردانی بەغدایان کرد و کۆبوونەوەیان کرد لەگەڵ بەرپرسانی حکومەتی فیدراڵی عیراق، کۆبوونەوەکە بەسەرپەرشتی مستەفاکازمی، سەرۆک وەزیرانی عێراق و بە ئامادەبوونی جێنین پلاسخارت، نوێنەری سکرتێری گشتی نەتەوە یەکگرتووەکان بەڕێوە چوو.
شاندەکەی هەرێمی کوردستان ئاشکرایان کردووە، کە لەگەڵ بەغدا گەیشتوونەتە ڕێککەوتن لەسەر بەڕێوبردنی شەنگال لەڕووی ئیداریی، ئەمنیی و خزمەتگوزارییەوە بەشێوەی هاوبەش.
ئەم ڕێککەوتنەی هەرێم و بەغدا لەکاتێکدایە، کە لە شەنگال ئەنجومەنی خۆبەڕێوبەری دیموکراتیکی شەنگال و ئیدارەی خۆجێی ئیزدییەکان هەیە و هیچ پرس و ڕایەک بە ئێزدییەکان و ئیدارەی خۆجێی شەنگال نەکراوە، ئەمەش تووڕەیی و ناڕەزایی ئەنجومەنی دیموکراتیی شەنگال و ئێزدییەکانی بەدوای خۆیدا هێناوە و ئەنجومەنی شەنگال ئەم ڕێککەوتنە وەکو پیلانگێڕییەک لە دژی ئێزدییەکان ناوزەد دەکات.
ش.ف
