لە سنووری شاری هەولێر، ٥٩٤ پارچە مین و تەقەمەنی لەناوبران، سەرۆکی دەزگای مینیش دەڵێت، بەهۆی قەیرانی داراییەوە کارەکانیان سست بووە و ئەوەش مەترسی لەسەر ژیانی هاوڵاتیانی ناوچەکە دروستکردووە.
ئەمڕۆ لە شارەدێی سمیلانی سەر بە شارۆچكەی چۆمانی سەر بە پارێزگای هەولێر، ٥٩٤ پارچە مین و تەقەمەنی سەردەمی شەڕی عێراق – ئێران، لەلایەن دەزگای مینەوە لەناوبران.
جەبارە ڕەش، سەرۆكی دەزگای كاروباری مین لە حكومەتی هەرێمی كوردستان، ئاماژەی بە کاریگەرییەکانی قەیرانی دارایی کرد لەسەر کارەکانیان و وتی: قەیرانی دارایی و دۆخی كۆرۆنا وای لە ئێمە كردووە كارەكانمان بە سستی بڕوات و نەتوانین وەكو پێویست بەردەوامی بە كاری هەڵگرتنەوە و پاككردنەوەی مین بدەین، ئەمەش مەترسیەكی گەورەیە لەسەر هاوڵاتیانی كوردستان، ئێمە بە كەمترین ئیمكانیەت كار دەكەین بۆ ئەوەی ئەو مین و تەقەمنیانە لەناو بەرین كە دوژنان و داگیركەرانی كوردستان لەسەر خاكی كوردستان چاندویانە.
موخلیس شەریف، بەرپرسی چالاكییەكانی دەزگای مین لەبارەی ئاماری کار و چالاکییەکانیان و قوربانییانی مین، وتی: بەگشتی ئەمساڵ هەزار و ٢٣٦ پارچە مین و تەقەمەنیمان لە سنووری پارێزگای هەولێر لەناوبردووە، بەهۆی مینەوە لەمساڵدا شەش کەس بوونەتە قوربانی، سێ کەسیان گیانیان لەدەستداوە و سێ کەسیشیان کەمئەندام بوون، ڕێژەکە بە بەراورد بە ساڵی ڕابردوو کەمی کردووە، لەبەر ئەوەی ساڵی ڕابردوو لە سنووری پارێزگای هەولێر هەشت قوربانیی مین هەبووە.
د.ع
