بۆ زیاتر هەماهەنگی و ئاگاداربوونی لەڕەوشی ناوچەی گەرمیان، کونسۆڵی فەرەنسا لە هەرێمی کوردستان سەردانی ئیدارەی گەرمیانی کرد و تاجەگوڵینەی لەسەر ڕوفاتی ئەنفالکراوان دانا.
ئەمڕۆ، ئۆلیڤییێ دیکوتینێ، کۆنسوڵی گشتی فەرەنسا لە ھەرێمی کوردستان، گەیشتە شارۆچکەی کەلاری ناوەندی ئیدارەی گەرمیان و لە بینایی ئیدارەی گەرمیان لەگەڵ سەرپەرشتیار ی ئیدارەی گەرمیان کۆبونەوە.
دواتر، سەردانی مەزاری ئەنفالکراوەکانی گەرمیانی کرد لە شارەدێی ڕزگاری، سەرەتا هاوڕێ پێشڕەو، بەرپرسی کۆمەڵەی داکۆکیکار لەماف و قوربانیانی ئەنفال، لەسەر ڕووفاتی ئەنفالکراوەکان، باسێکی کورتی پرۆسەی تاوانی ئەنفالی بۆ کردو پێی ڕاگەیاندن ئەم ڕووفاتانە لەسەر بڕیاری دیکتاتۆر سەدام حوسێن ـ زیندەبەچاڵکراون.
کونسۆڵی فەرەنسا، تاجە گوڵینەی لەسەر ڕووفاتی ئەنفالکراوەکان دانا و لەگەڵ شیخ جەلال نوری، سەرپەرشتیاری ئیدارەی گەرمیان کۆنگرەیەکی ڕۆژنامەنووسیان ئەنجامدا.
سەرپەرشتیاری ئیدارەی گەرمیان بۆ دەزگاکانی ڕاگەیاندن، وتی: لە کۆبوونەوەمان لەگەڵ کونسوڵی فەرەنسا، باسی دۆخی ئێستای ناوچەی گەرمیان و هاو سنووری لەگەڵ ئەو ناوچانەی داعشی لێیە کرد، هەروەها باسی ئەوەمان کرد، کە فەرەنسا ڕۆڵی هەبووە لە هەماهەنگی پێشمەرگە لە ڕووبەڕووبونەوەی لەناوبردنی داعشدا.
کونسۆڵی فەرەنساش بۆ دەزگاکانی ڕاگەیاند، وتی: فەرەنسا هاوخەمی کەس وکاری ئەنفالکراوەکانە و دژی ئەو تاوانەیان دەرهەقیان کراوە، دانیال میتران وەزیری دەرەوەی ئەو کاتی فەرەنسا، کەیسی تاوانی ئەنفالی بردە ئەوروپا و بەناوەندە جیهانیەکان ناساند.
وتیشی: ئێستاش هاوکار و هەماهەنگ دەبین لەگەڵ گەلی کورد بۆ ڕووبەڕووبونەوە و لەناوبردنی چەتەکانی داعش، پێویست بوو بێمە گەرمیان سەردانی ئەم مەزارە بکەم.
لەکۆتایدا،جەبار حەمە ساڵەح، بەڕێوەبەری دەزگای شەهیدانی گەرمیانیش، کتێبێکی وەرگێڕاوی پێشکەش بە کونسۆڵی فەرەنسا کرد لەسەر تاوانی ئەنفال.
د.ع
