هەلۆ سامی، کوڕی سەمیرە حەمەئەمین، ئەندامی تەڤگەری ئازادیی، کە لەلایەن ئاسایشی پەدەکە-وە دەستگیرکراوە، دەڵێت، ئەگەر دایکم ئازاد نەکەن، هەڵوێستمان دەبێت و خۆپیشاندان و چالاکی مەدەنی ئەنجام دەدەین، دەشڵێت، کە تاکە تاوانی دایکم ئەوە بووە، کە ئەندامی تەڤگەری ئازادییە، بۆ پاڵپشتی خەباتی دایکیشی هۆنراوەیەکی پێشکەش دەکات.
ڕۆژی ٦ی ئەم مانگە هەریەك لە عەونی گردە شینی و سەمیرە حەمەئەمین، کە دوو ئەندامی تەڤگەری ئازادیی کۆمەڵگای کوردستانن، لەلایەن ئاسایشی پەدەکە لە هەولێر دەستگیرکران، دوێنێش دکتۆر ناجی، ئەندامی تەڤگەری ئازادیی، لە شارۆچکەی هەریر لەلایەن ئاسایشەوە دەستگیرکرا.
هەلۆ سامی، كوڕی سەمیرە حەمەئەمین، لەبارەی دەستگیركردنی دایكی بە ڕۆژنیوزی وت: ئەگەر دایکم ئازاد نەکەن خۆپیشاندان و چالاكی مەدەنی ئەنجامدەدەین، ئێمە نازانین دایكم چ تاوانێكی كردووە، تاوانی دایكم تەنها ئەوەیە، كە ئەندامی تەڤگەری ئازادییە، تەڤگەریش پارتێکی فەرمییە، دواتر تەڤگەری ئازادیی تەنها دژی لەشكركێشیەكانی توركیا و بۆردوومان كردنی باشوری كوردستان بووە، ئایا ئەگەر پارتیش دژی ئەمەیە بابزانین، یان لەگەڵ ئەوەیە كە توركیا لەشكركێشی بكات.
لەبارەی ئەوەی کەی دەست بە ئەنجامدانی چالاکی دەکەن، ناوبراو ئاماژەی بەوەکرد، کە ئەوان پابەندن بە بڕیاری تەڤگەری ئازادییەوە، هەرکاتێک بڕیاری چالاکی بدەن ئەوانش ئەنجامی دەدەن، هەروەها ئاماژەی بەوەشکرد، کە ئەو وەک شاعیرێک و نووسەرێکی سەربەخۆ هەڵوێستی دەبێت و فشار دەکات بۆ ئازادکردنی دایکی و دەستگیرکراوانی دیکە.
هونەر لەڕێگای ڕۆژنیوزەوە ئەم هۆنراوەی پێشکەش بەدایکی کرد
بەسەرهاتی پیرە دارێك
من پرە دارێك دەناسم
چەندان ساڵ بەبێ ئاو ژیا و چەندان ساڵ بەبێ ئاسمان و بێ ئەستێرە و هەتاو ژیا
ڕووی دەكردوە هەر وڵاتێك تەورەكان لێی دەبوونە دێو، پەنجەكانیان ڵی هەڵدەشەقاند و بەدوای دەكەوتن كێو بەكێو
تا وایلێهات لە پەرستگا و بتخانەش جێگای نەبۆوە
لە یۆتۆبیای ئەم جیهان و ئەو جیهانیش جێگای هەر نەبۆوە
ڕۆژ هات و ڕۆژ چوو
دار سەوز بوو، دار گەڵای كرد و ئەستور بوو
لەسەرە پەیمانی ئاشتی خوازانە هەر سوور بوو
ڕۆژهات و چوو
دار تێپەری لە گرد و شاخ و چیاكان سەدان هێلانەی لە خۆگرت
لەسەر دورگەیەكی نێو دەریا كەچی لەوێش جێگای لە بولبولێك تەنگ تر بوو
دەوروبەری لە كونی چۆلەكەیەك بێ ڕەنگتر بوو
ئێستا هەندە گەورە بووە دارستان سوجدەی بۆ دەبات
ڕۆژ خۆی دەچێتە باوەشی سامان ئەستێرەی بۆ دەبات
سەمیرە حەمەئەمین، لەساڵی ١٩٦٣ لەدایکبووە، دانیشتوی شاری هەولێرە، ئەندامی تەڤگەری ئازادیی کۆمەڵگەی کوردستانە، لەبەرواری ٦-٨-٢٠٢٠ لەلایان ئاسایشی هەولێرەوە دەستگیرکراوە.
