کۆدار، با جەژنی ڕەمەزان بکەینە جەژنی تەبایی و ساڕێژی زامەکانی کۆمەڵگا

کۆدار جەژنی ڕەمەزانی لە سەرجەم موسڵمانانی جیهان و کوردستان پیرۆز دەکات و هیوا دەخوازێت ئەم جەژنە ببێتە جەژنی تەبایی و ساڕێژی زامەکانی کۆمەڵگا.


ئەمڕۆ کۆمیتەی ئایین و باوەڕییەکانی کۆمەڵگای دیموکراتیک و ئازادی ڕۆژهەڵاتی کوردستان- کۆدار بەبۆنەی جەژنی ڕەمەزانەوە پەیامێکی بڵاوکردەوە.

لە پەیامەکەدا دوای پیرۆزبایی جەژنی ڕەمەزان لە سەرجەم موسڵمانانی جیهان و کوردستان هاتووە: هیوادارین کە ئەم جەژنە ببێ بە جەژنی ئاشتەوایی و وەدیهاتنی هێمنی و ئارامی، بێگومان رۆڵی سەرەکی ئایین و دین لەناو کۆمەڵگای مرۆڤایەتیدا زیندوو هێشتنەوە و پەرەپێدانی نرخ و پێوانەکانی کۆمەڵگایە کە وەک بەردی بنچینەی کۆمەڵایەتی‌بوون دەناسرێن، هەڵبەت ئەو بەهایانە، سامانی مەعنەوی هەر کۆمەڵگایەکن و هەبوونی ئەو کۆمەڵگایە لەسەر پێ ڕادەگرن، ئایینی ئیسلام هەر لە سەرەتای دەرکەوتنێوە بە جەخت کردن لەسەر ئەو پێوانانە و بەرزکردنەوە و گشتگیر‌کردنیان گەشەی سەندووە.

هەروەها هاتووە: هەرچەند ئەمڕۆکە دەسەڵاتدارەکان هەوڵیانداوە دین بکەن بە ئامێری ڕەواییپێدان بە هەبوون و سەرەڕۆییەکانیان و بوونەتە هۆکاری ناتەبایی و شەڕانگێزی لەناو بەشەکانی کۆمەڵگا، ناکرێ ئەو مەیدانه بۆ دەسەڵات چۆڵ‌‌ بکرێت، تا بە ناوی ئایینەوە هەموو جۆرە گەندەڵی و قێزەونی خۆیان بشارنەوە، جەژن لە فەرهەنگی کۆمەڵایەتیماندا بەردەوام هێمای لێبوردوویی و تەبایی بووە، لەو دۆخە هەستیارەی ئێستای کوردستاندا کە بە هەموو جۆرێک هێرشمان لەسەرە بۆ تێکدانی تەبایی ناوماڵی کورد، لەسەر هەموو باوەڕمەندان و بە تایبەت مامۆستایانی ئایینی ئەرکە کە بە بۆنەی جەژنی پیرۆزی ڕەمەزان لە سازدان و رێکخستنەوەی ناو ماڵی کورد دا خاوەن هەڵوێست بن و پلانی داگیرکەران پووچەڵ بکەنەوە.

لە بەشێکی دیکەش هاتووە: هەڵبەت جەژنی ڕەمەزان، جەژنی سەرکەوتنی مرۆڤی باوەڕمەندە بەسەر نەفسی خۆیدا و ئاوڕدانەوە لە کردار و ئاکارەکانی خۆیەتی لەگەڵ دەورووبەری، بەتایبەت لە هەلومەرجی ئێستادا کە ناکارامەیی سیاسەتەکانی دەوڵەت و حاکمییەت و هەبوونی پەتای کۆرۆنا بووەتە هۆکاری پەرتەوازیی و هەژاری خەڵک پێویست دەکات کە جەژنی ڕەمەزان بکەینە دەرفەتێک بۆ کەمکردنەوە و ساڕێژکردنی ئەو ئێش و ئازارانەی کۆمەڵگا، لەسەر هەر باوەڕمەندێکە کە هاوکاری خوشک و برایانەی خۆی بە بێ لەبەرچاوگرتنی جیاوازی ئایین و ئایینزایی پێشکەشی نیازمەندان بکات و بەو جۆرە بەیەکەوە لەسەر سفرەی جەژن دانیشن و سفرەی هیچ بنەماڵەیەک بەتاڵ نەمێنێ.

ک.س