کۆدار: یەکگرتوویی و یەکێتی گەلی کورد ئەرکێکی ئەخلاقیی و سیاسییە

کۆدار ڕایدەگەیەنێت: دەوڵەتی تورک لە هەوڵی لەناوبردنی پێگە و هەبوونی گەلی کوردە، تاکە ڕێگای گەلی کوردیش پێداگریی و بەرخۆدانە، جەختیشی لەوە کردووەتەوە، کە یەکگرتوویی و یەکێتی گەلی کورد ئەرکێکی ئەخلاقیی سیاسییە.


ئەمڕۆ کۆمەڵگای دیموکراتیک و ئازادی ڕۆژهەڵاتی کوردستان- کۆدار، لەسەر هەڕەشەکانی دەوڵەتی تورک بۆسەر ڕۆژئاوای کوردستان ڕاگەیەندراوێکی بڵاو کردەوە.

تەواوی ڕاگەیەندراوەکە:

هەڕەشە بەردەوامەکانی دەوڵەتی داگیرکەر و فاشیستی تورک بە سەرکردایەتی ئەردۆغان بۆسەر ڕۆژئاوای کوردستان، جارێکی دیکە سەلماندی کە ئەم دەوڵەتە لە هەوڵی لەناوبردنی پێگە و هەبوونی گەلی کورد-دایە، لە ڕاستیدا وەها کردارێک دەستدرێژیی بۆسەر ئازادی و دەستکەوتەکانی گەلی کوردە، ئەم بڕیارە توندە بە واتای توندکردنی شەڕی سێهەمی جیهانییە لەگەڵ پیلانێکی تەواو بە ناوەندێتی کوردستان، تاکە ڕێگای گەلی کورد لە بەرامبەر داگیرکاریی و ستەم، هەروەک لە مێژووش بە جاران بینراوە، پێداگریی و بەرخۆدانە، ئەو توانایە لە تاک بە تاکی گەلی کورد هەیە و بە پشتبەستن بە وەها هێزێک، یەکگرتن و یەکێتی لەم دۆخەدا، ئەرکێکی ئەخلاقیی و سیاسییە.

لەکاتێکدا ئەمڕۆ ساڵوەگەڕی گەلەکۆمەی نێودەوڵەتی دژی ڕێبەر ئۆجالانە، دەوڵەتی تورک بە ئامانجی پاکتاوی نەژادی خۆی بۆ هێرشکردنە سەر ڕۆژئاوا و باکوری ڕۆژهەڵاتی سوریا ئامادە دەکات و هەڕەشەکانی زیادکردووە و بەنیازە وەک کاتی شەڕەکانی یەکەم و دووەمی جیهانی پێش لە یەکێتی گەلی کورد بگرێت تا لە بەدەستهێنانی ئازادیی دووریان بخاتەوە، هەڵبژاردنی وەها ڕۆژێک بە مەبەستە و بێگومان هەر ئەو هێزانەی کۆماری مەهابادیان هەڵوەشاندەوە و قازی محەمەدیان لە سێدارەدا و پیلانگێڕانی نیودەوڵەتی ساڵی ١٩٩٩ـیان پێکهێنا و داعشیان بۆ کۆمەڵکوژیی گەلەکەمان هاندا، ئەمڕۆش نیازی داگیرکردنی هەموو کوردستانیان هەیە.

بێگومان بابەتەکە وەها کە دوژمنان زاڵمانە بانگەشەی بۆ دەکەن، تەنیا هەبوونی شەڕڤانانی یەپەگە نییە، بەڵکو کیان و هەبوونی ماددی و مەعنەوی گەلی کوردە، دەوڵەتی تورک بەبێ هیچ بنەمایەک هەبوونی شەڕڤانانی لە ڕۆژئاوا کردووەتە بەهانە تا بۆ نۆکەری هەژموونی جیهانی، جارێکی دیکە گروپە چەتەکانی داعش زیندوو بکاتەوە و سیستمی خۆبەڕێوبەریی باکور و ڕۆژهەڵاتی سوریا ئاستتەنگ بکات، هەبوونی گەلی کورد لە هەر چوارپارچەی کوردستان لەبەردەم مەترسی فاشیزم دایە، پێویستە گەلەکەمان بزانن کە گەلەکۆمەیەکی دیکە بەڕێوە دەچێت کە پانتاییەکەی گەلانی ستەملێکراوی ڕۆژهەڵاتی ناوەڕاست، بە تایبەت گەلی شۆڕشگێڕی کورد لەخۆ دەگرێت، بێگومان لە ماکۆ تا ئیلام، هەولێر و ئامەد تا قامشلۆ، کۆبانێ و عەفرین دەکەونە بەر تیری مەترسی هێرشێکی پیلان بۆ داڕێژراوی پیلانگێڕانی ناوچەیی و دەرەوەی ناوچەکە.

بۆیە پێویستە گەلەکەمان لە وەها قۆناغێکی هەستیار و ژیانیدا، لە پێناو پوچەڵکردنەوەی وەها پیلانێکدا لە شێوەی ساڵی ١٩٩٩، بە پشتبەستن بە هێزی خۆیان، لە بەرامبەر وەها بڕیارێک، هەڵویستێکی قورسیان هەبێت و لە هەموو بەشەکانی کوردستان و دەرەوەی سنوورەکانی هەستنە سەرپێی و هیچکات لە بەرامبەر فاشیزم و دیمەنە پوچەڵەکانی خۆ بەدەستەوە نەدەن و وەک کۆبانێ جارێکی دیکە حەماسەیەکی شکۆمەند لە پشتیوانی و پاراستنی هەبوونی گەلی کورد بخولقێنن، "دەرفەت و هەڕەشەکان" هاوتەریب لە بەرامبەر کورد دایە و دوژمنان لە پێگە و جێگەی گەلەکەمان لە ناوچەکە دەترسن، بۆیە نابێت زەمینەی دەستدرێژی بۆسەر شەرافەت و شکۆی گەلەکەمان بۆ دیکتاتۆرەکان و هێزە فاشیستەکان بڕەخسێنین.

کۆمەڵگای دیموکراتیک و ئازادی ڕۆژهەڵاتی کوردستان- کۆدار، لەو باوەڕە دایە کە کلیلی سەرکەوتن لە خولقاندنی حەماسە و بەرخۆدانی گەلەکەمان لەگەڵ گەلانی ستەملێکراو دایە، بۆیە لەگەڵ دەربڕینی یەکڕێزی و یەکێتی خۆمان، بانگ لە هەموو ئازادیخوازانی گەلەکەمان بەتایبەت؛ ستەملێکراوان، کرێکاران، ژنان، گەنجان، ڕێکخراوەکان و ڕێکخستنە مەدەنی و مافەکانی مرۆڤ، سەندیکاکان، ناوەندەکانی خەبات، پارتەکان و ڕۆشنبیرەکان لە هەرچواربەشی کوردستان و بەتایبەتی ڕۆژهەڵاتی کوردستان و دەروەی وڵات دەکەین، بۆ پشتیوانی لە ڕۆژئاوای کوردستان سەرهەڵبدەن، چونکە بە هێرش بۆسەر ڕۆژئاوای کوردستان، هەموو کوردستان دەکەوێتە بەر مەترسی، ئێمە بە تەواوەتی باوەڕمان بە جەسارەتی گەلەکەمان  بە تایبەتی خولقێنەرانی حەماسەی ئازادیخوازی لە مەیدانی خەبات وەک حەماسەی قەندیل و کۆبانێ هەیە، بۆ ئەوەی بڕژینە سەر شەقامەکان و بە یەکێتی گشتی بەشداری تێدا بکەن، لەسایەی تێکۆشان لەسەر بنەمای ئەندێشەکانی ڕێبەر ئۆجالان، گومانێک لە سەرکەوتنی گەلەکەمان نییە، بە باوەڕ بەوەی کە هەر تاکێکی وڵاتپارێز بە ئاگاداریی لە ئەرکە نەتەوەیی و مرۆییەکانی، بەدەم بانگەوازییەکەی کۆدارەوە بۆ یەکگرتوویی سەرتاسەری دێت، پێویستە لە پێناو گەیشتن بە ئازادی، تێکۆشان و بەرخۆدان بکەین.

ش.ف