کۆمەڵێک هونەرمەند دژی داگیرکارییەکانی تورکیا هەڵوێستیان دەربڕیی

کۆمەڵێک هونەرمەند، لەشاری سلێمانی ئیدانەی هێرشەکانی دەوڵەتی تورکیا دەکەن بۆسەر سنوورەکانی هەرێمی کوردستان و ڕایدەگەیەنن، پێویستە هونەرمەندان بە هونەرەکەیان لە دژی داگیرکاریی بێنە دەنگ و شەقامەکان بورووژێنن.


ئێوارەی ئەمڕۆ، بەشێک لە هونەرمەندانی شاری سلێمانی، لە شاری سلێمانی، لە دژی داگیرکارییەکان و ئەو بوردوومانە بەردەوامانەی کە لەلایەن دەوڵەتی  تورکەوە دەکرێتە سەر باشوری کوردستان، کۆنگرەیەکی ڕۆژنامەنووسیان ئەنجامدا.

کارە محەمەد، ڕاگەیەندراوی هونەرمەندانی خوێندوە کەتێیدا هاتبوو: لەم کاتەدا کە باشور و ڕۆژئاوا و ڕۆژهەڵاتی کوردستان دەسوتێنرت و تەعریبی کەرکوک دەستی پێکردووەتەوە، فاشیزمی دەوڵەتی تورک دەیەوێت بەردەوامیی بدات بەو داگیرکارییەی کەلەعەفرینەوە دەستی پێکردوە، کە ئاشکرایە هێرشی دەوڵەتی فاشیزمی ئیخوانی و نەژاد پەرستی ئاکەپە - نەژاد پەرستی مەهەپە ئامانجیان لەناوبردنی کوردستانە.

لەدرێژەی ڕاگەیەندراوەکەدا هاتبوو: کوردستان بەواتای خاک وگەل و کلتوروی ئێمە، بۆئەوەش لەپێشتردا بەشەڕی داعش و هاوشێوەکانی گشتی باشور و ڕۆژئاوای کوردستانیان نغرۆی شەڕکردو هەزاران شەڕڤان و پێشمەرگەو گەریلاو هەزاران هاوڵاتی سڤیل شەهیدبوون و ڕفێندران، لەئیستاشدا  گەریلا و شەڕڤانان بەنوێنەرایەتی پێشمەرگە و هەموو کوردستان شەڕی داگیرکاریی دەکەن.

لەکۆتایی ڕاگەیەندراوەکەدا، داوا لە هونەرمەندانی کوردستان کرابوو، کە دژی داگیرکایی هەڵوێستی خۆیان پیشان بدەن و تێیدا هاتبوو: سەختترین شەڕکانی ئەمڕۆژانە لەپاش عەفرین لەچیاکانی کاروخ، خواکوڕک، لیلکان، برادۆست و شەکیف، لەدژی داگیرکاریی دەوڵەتی تورک و خەتی خیانەت بەڕێوەدەچن، بۆیە بانگەوازیی لەهونەرمەندان و ڕۆشنبیران و تەواوی گەلی کوردستان لەسەرتاسەری دونیاو بەتایبەت لەباشوری کوردستان دەکەین، لەدژی سوتاندن و ڕاگواستنی گوندەکانی ئەوسنوورانەی کەناومان بردن بێنەدەنگ، پشتیوانیی لەهێزە شۆڕشگێڕەکانی کوردستان بکەن و شەقامەکان بورووژێنن، بەڕێگای هونەر و ئەدەب و چالاکی مەدەنی و چالاکی دیکەی جۆربەجۆر ناڕەزایەتییەکانتان لەشەقام و لەڕێی تۆڕەکۆمەڵایەتی و میدیاکانەوە دەرببڕن.

د.ع