ڕۆژنیوز- سۆران
كونسوڵی بەریتانیا لە هەولێر نیگەرانیی وڵاتەكەی بەرامبەر تۆپباران و بۆردوومانەكانی ئێران نیشاندەدات و دەڵێت: ئێمە لەگەڵ ئەوەین سنوورەكان ئارام بن و خەڵكی مەدەنیی نەبێتە قوربانیی و دژی ئەو پشێوییانە دەوەستینەوە.
دوای كۆبوونەوەی لەگەڵ سەرپەرشتیاری ئیدارەی سەربەخۆی سۆران، دەیڤد هاند، كونسوڵی بەریتانیا لە هەرێمی کوردستان، كۆنگرەیەكی ڕۆژنامەنووسی ئەنجامدا ڕایگەیاند: زۆر نیگەرانین بەو تۆپبارانەکانی [لەلایەن ئێرانەوە]، چونكە بووەتە هۆی نائارامیی، هەرشتێك ببێتە هۆكاری گرژیی و نانەوەی ئاژاوە، ئێمە دژی دەوەستینەوە.
دەشڵێت:”كۆكین لەسەر ئەوەی كە بەزووترین كات ئەو نائارامییە لە ناوچەكە بووەستێت و خەڵك بە ئارامیی ژیانی خۆیان بكەن”.
سەبارەت بە دواخستنی پڕۆسەی هەڵبژاردنی پەرلەمانی كوردستانیش، كونسوڵی بەریتانیا ڕایگەیاند، بە هەموو حزب و لایەنە سیاسییەكانی كوردستانیان وتووە، كە هەڵبژاردن بەشێكی گرنگی پرۆسەی دیموكراسییە و وتیشی: دەمانەوێت بەزووترین كات ئەوە ببینین كە هەڵبژاردن ئەنجام بدرێت، بۆ ئەوەش پەرلەمانی كوردستان پێویستە ئەركەكانی لەوبارەوە تەواو بكات و ڕێكار و ڕێنمایی بۆ كاتی ئەنجامدانی هەڵبژاردن تەواو بكات.
س.س
