کۆنسەی بەڕێوەبەریی کۆما جڤاکێن کوردستان کەجەکە بەبۆنەی ساڵیادی کۆچی دوایی نەوشیروان مستەفا، ڕێکخەری پێشووی بزووتنەوەی گۆڕانەوە پەیامێکی بڵاوکردەوە و ڕایدەگەیەنێت: ڕەوانشاد نەوشیروان مستەفا بە نیو سەدە خەبات و تێکۆشان لە پێناو ئازادیی، دیموکراسیی، مافی نەتەوایەتیی و دادی کۆمەڵایەتیدا، شوێن پەنجەی لە هەموو دەستکەوتە نەتەوەیی و دیموکراسی و یاساییەکانی باشووری کوردستاندا دیارە.
ئەمڕۆ کۆنسەی بەڕێوەبەریی کۆما جڤاکێن کوردستان کەجەکە پەیامێکی بەبۆنەی پێنجەمین ساڵیادی کۆچی دوایی نەوشیروان مستەفا ئەمین، ڕێکخەری پێشووی بزووتنەوەی گۆڕان بڵاوکردەوە و تێیدا هاتووە: لە پێنجەمین ساڵیادی کۆچی دوایی سەرکردە و پێشەنگی دیاری گەلەکەمان، ڕەوانشاد نەوشیروان مستەفا، سەری ڕێز و نەوازش بۆ یادی ئەم تێکۆشەر و رۆشنبیرە مەزنەی گەلەکەمان دادەنەوێنین و پرسە و سەرەخۆشی خۆمان ئاراستەی ئێوەی بەڕێز دەکەین.
ئەوەش هاتووە: ڕەوانشاد نەوشیروان مستەفا بە نیو سەدە خەبات و تێکۆشان لە پێناو ئازادیی، دیموکراسیی، مافی نەتەوایەتیی و دادی کۆمەڵایەتییدا شوێن پەنجەی لە هەموو دەستکەوتە نەتەوەیی و دیموکراسی و یاساییەکانی باشووری کوردستاندا دیارە، هەروەها داکۆکیکارێکی مەزن بووە لە مافی گەلی کورد هەموو بەشەکانی کوردستان.
لە بەشێکی دیکەی پەیامەکەدا هاتووە: رەوانشاد نەوشیروان مستەفا لە بەرامبەر تەسلیمیەت و خۆبەدەستەوەدان هێمای شۆڕشی نوێیە، لە بەرامبەرستەم و چەوسانەوە هێمای راپەڕین و خۆڕاگرییە و لە بەرامبەر نایەکسانی و نادادپەروەی هێمای دادپەروەری و خەباتی مەدەنی و دیموکراسییە.
کەجەکە لە کۆتایی پەیامەکەدا دەڵێت: ئێستاش کە کوردستان بە گشتی و هەرێمی کوردستان بە تایبەتی کەوتووەتە بەر شاڵاوی داگیرکاریی و بەکرێگیراویی، لە هەموو کاتێک زیاتر پێویستی بەوە هەیە کە بە هێز وەرگرتن لە گیانی شۆڕشگێڕیی و ئیرادەی خۆڕاگریی کاک نەوشیروان، بتوانین پارێزگاریی لە هەبوون و ئازادیی و دەسکەوتەکانمان بکەین.
ب.ل
