کەرکوک، بەمەراسیمێکی هەزاران کەسی تەرمی شەهید مەزڵوم دۆغان بەخاک سپێردرا

بەئامادەبوونی هەزاران کەس،  مەراسیمی ناشتنی تەرمی یەکێک لە شەهیدەکانی شەڕڤانانی قەسەدە کە لەبەرامبەر هێزی داگیرکەری دەوڵەتی تورک و گروپە چەتەکانی لە ڕۆژئاوای کوردستان شەهیدببوو، لەشاری کەرکوک بە خاک سپێردرا.


کاتژمێر ١١:٠٠ی پێشنیوەڕۆی ئەمڕۆ، تەرمی شەڕڤانی قەسەدە''ئیبراهیم حەبیب'' ناسراو بە مەزڵوم دۆغان لە شارۆچکەی کۆیە-ەوە بە مەراسیمێک لەبەردەم پزیشکی دادوەرییەوە بەڕێکرا بۆ شاری کەرکوک.

لە کاتژمێر١٢ و لەگەڵ گەیشتنی تەرمی شەڕڤان بۆ شارەدێی تەقتەق، هاوڵاتیان لەناوبازاڕی شارەدێکە وەک وەفایەک بۆ شەڕڤانی شەهید دەست لەسەرسنگ و لەسەر پێیان پێشوازییان کرد.

پاشان لە کاتژمێر ٠١:٠٠و داوای گەیشتنی تەرمی شەهید بۆ شاری کەرکوک، بەدروشمی '' شەهید نامرێت، بژی بەرخۆدانی ڕۆژئاوا'' بەرەو ماڵی شەهید بەڕێکرا لەگەڕەکی پەنجا عەلی شاری کەرکوک، دواتر لە مزگەوتی ئاشتی نوێژ لەسەر تەرمی شەهید خوێندراو بەڕێکرا بۆ گۆڕستانی ڕەحیماوا.

چنور محەمەد لەسەر ناوی کۆمیتەی شەهیدانی پەکەکە، لە گۆڕستانی ڕەحیماوا وتارێکی پێشکەشکردو وتی: ئەمە یەکەم شەهیدی ئێمە نییەو کۆتا شەهیدیش نابێت، بەدرێژایی مێژوو ئێمە بۆ ئازادی تێدەکۆشین، بۆیە تا دوایین دڵۆپە خوێنی ئەم گەلە لەپێناو ئازادی تێدەکۆشین.

نەجیبە عومەریش بەناوی ڕێکخراوی ژنانی ئازادیخوازی کوردستان لە وتارێکیدا ئاماژەی بەوەکرد، ئەمە شەڕەفێکی گەورەیە بۆ شاری کەرکوک و لە مەراسیمێکی وەها پڕشکۆدا پێشوازی لە تەرمی شەڕڤانێکی قارەمان و فەرماندەیەکی پێشەنگ بکەیت و بەخاکی پیرۆزی کوردستانی بسپێرین، هەڤاڵ مەزڵوم دۆغانی کەرکوک لەسەر فکرو فەلسەفەیەک تێکۆشانی کرد کەبەهیچ شێوەیەک تەسلیمییەت قبوڵ ناکات، بۆیە دەبێت درێژەپێدەری خەباتی ڕێگەکەی بین.

هەر لەمەراسیمەکەدا، ئەحمەد مەولود مامی شەهید، لەسەر ناوی بنەماڵەی شەهید، وتی: ئێمە نەک تەنها ئیبراهیم بەڵکو چەندین ڕۆڵەی ترمان لەپێناو کوردستان ئامادەیە گیان ببەخشێت، کوردستان بۆ ئێمە یەکە، ڕۆژانێک گەریلا بەخوێن بەرگری لەم نیشتیمانە دەکرد، ئێمەش ڕۆژئاوای بە خاکی خۆمان دەزانین و بەرگری لێدەکەین.

مامۆستا سامان سەنگاویش لە وتەیەکیدا ئاماژەی بۆ ئەوەکرد، ئێمە ڕۆڵەیەکی بەئەمەکمان بەخشی بە ئازادی کوردستان ، ئەو لای خوای گەورە شەهیدە، چونکە لەپێناو بەرگریکردن لە خاک و نیشتیمان و مرۆڤایەتی گیانی بەخشیوە.

دوای لێدوانەکانی ئامادەبووان، تەرمی شەهید مەزڵوم دۆغان بە مەراسیمێکی شکۆدار بە خاکسپێردرا.

ئیبراهیم حەبیب، ناسراو بە مەزڵوم دۆغان، ساڵی ٢٠٠٠ لەداییکبووە، ماوەی ٣ساڵە بەشداری تێکۆشانی ئازادی کردووە لە ڕیزی هێزەکانی سوریای دیموکراتیک-قەسەدە، ١٦ی ئەم مانگە لە گوندی سکریانی گرێسپی لەدژی داگیرکەری دەوڵەتی تورک و چەتەکان، لە ڕۆژئاوای کوردستان شەهیدبوو.

ب.ش