کەرکوک، لەماوەی ٩ ڕۆژدا نزیکەی ١٠٠٠شۆفێر سزادراوە

ماوەی نۆ ڕۆژە قەدەغەی هاتووچۆ لە كەركوك ڕاگەیەندراوە، تا ئێستا زیارتر لە هەزار شۆفێر بەهۆی پابەند نەبوونیان بە قەدەغەی هاتووچۆوە سزا دراون.


لە ئێوارەی ١٧ی ئەم مانگەوە، شانەی قەیرانەكانی كەركوك و ئیدارەی پارێزگای كەركوك، قەدەغەی هاتووچۆیان ڕاگەیاند، بۆ ئەوەی ڕێگا لە بڵاوبوونەوەی ڤایرۆسی کۆرۆنا بگیرێت لە کەرکوک.

بەپێی بڕیارەکەی شانەی قەیرانەکانی کەرکوک، هەموو هاتووچۆیەک لەناو شاری کەرکوکدا قەدەغەکرا، هەروەها ڕێگا بەهیچ کەسیک نادرێت لە دەرەوەی شاری کەرکوک بێتە ناو کەرکوکەوە، ڕێگا بەکەسیش نادرێت لە کەرکوک دەرچێت.

شانەی قەیرانەكان وەك كار ئاسانی بۆ هاوڵاتیان لە یەكەم ڕۆژی قەدەغەی هاتووچۆ بڕیاردا، ڕۆژانە لە كاتژمێر ٨:٠٠ی بە یانی تاوەكو ١١:٠٠ی پێش نیوەڕۆ نانەواخانە و سەمونخانە و كۆگاكانی فرۆشتنی خواردنی ڕۆژانە كاربكەن.

لەسەرجەم گەڕەكەكانی کەرکوک بازگەی هێزە ئەمنیەكان و پۆلیسی هاتووچۆ هەیە، هەر شوفێرێك پابەندی بڕیاری قەدەغەی هاتووچۆ نەبێت بە بڕی 100 هەزار دینار سزا دەدرێت، بە پێی ئەو ئامارەی ڕۆژنیوز لە بەڕێوبەرایەتی پۆلیسی هاتووچۆی كەركوك وەریگرتووە، لەماوەی ئەو نۆ ڕۆژەدا زیاتر لە هەزار شوفێر سزا دراون، بەهۆی پابەند نەبوونیان بە قەدەغەی هاتووچۆوە.

د.ع