كەسوكاری ئەنفالكراوانی جەلەمۆرد پێیانوایە، ئەگەر لایەنێک خیانەت نەکات، دەوڵەتی تورک ناتوانێت هێرش بكاتە سەر هەرێمی كوردستان و بە گرنگی دەزانن، دەستی خیانەتی ناوخۆیی ببڕدرێت.
لە ١٧ی نیسانی ئەمساڵەوە، سوپای دەوڵەتی داگیركەری تورك بە هاوكاریی و هەماهەنگی پەدەكە، هێرشێكی داگیركاری بۆسەر باشووری كوردستان دەستپێكردووە و لەئێستادا جەنگێكی قورس لەنێون سوپای داگیركەری تورك و گەریلاكانی ئازادییدا، لە ناوچەكانی زاپ و ئاڤاشین و مەتینا بەڕێوەدەچێت.
لەگەڵ بەردەوامی هێرشەكانی دەوڵەتی توركدا بۆسەر هەرێمی كوردستان، بە ڕێككەوتنی كازمی و پەدەكە و دەوڵەتی تورك هێرشی سەر شەنگال دەستیپێكردووە و ئامانجیان لەناوبردنی خۆبەڕێوەبەری شەنگال و جارێكی تر جینۆسایدی ئێزیدییەكانە، ئەمانەش ناڕەزایی توندی بەدوای خۆیدا هێناوە.
لەوبارەیەوە، هیوا جەلەمۆردی، کوڕە ئەنفال بە ڕۆژنیوزی وت: هاوشێوەی سەدەی ڕابردوو دەوڵەتی تورک مێژوی حکومەتی بەعس دووبارەدەکاتەوە و دەیەوێت جینۆسایدمان بکات، هەر وەک چۆن سەدام ئەنفالی کردین و لە زۆر شاری کوردستان چەکی کیمیایی بەکارهێنا دژمان، ئێستاش بەهەمانشێوە دەوڵەتی تورک هێرشەکانی بۆسەر قەندیل و شەنگال و ڕۆژئاوا دەستپێکردووە، بۆیە زۆر گرنگە دژی دووژمن هەڵوێستامن هەبێت.
وتیشی: دووژمن گەیشتووە بەو بیروباوەڕەی کە ناتوانێت لەڕووی فکر و ئایدۆلۆژیاوە لەناومان ببات بۆیە، چەکی کۆمەڵکوژ دژمان بەکار دەهێنێت.
جەلەمۆردی بەگرنگی دەزانێت، لەم کاتەدا لایەنەسیاسییەکان یەک دەنگبن لەپێناو نیشتیمان و دژی دووژمن، بەهیچ شێوەیەک خیانەت لە نیشتیمان نەکەن لەپێناو مانەوە و بەرژەوەندیە ئابوورییەکانی خۆیان بۆئەوەی نەتەوەی کورد تووشی ماڵوێرانیی دیکە نەبێت.
هەروەها، وتی: لەئێستاشدا جارێکی دیکە دەوڵەتی تورک سەرقاڵی پلانگێڕییەکی دیکەیە لە دژی ئێزیدیەکان و زۆر گرنگە دەوڵەتی عێراق و حکومەتی هەرێم نەکەونە نێو پلانی دەوڵەتی تورکەوە، پێویستە هەوڵبدرێت بۆ هێورکردنەوەی دۆخی شەنگال، بۆئەوەی جارێکی دیکە شەنگالییەکان تووشی کارەسات و جینۆسایدی دیکە نەبنەوە.
هەر لەسەر ئەو پرسە، شڤان گۆپتەپەیی، نووسەر وچالاکوان بە ڕۆژنیوزی وت: گرنگە هەموان هەڵوێستمان هەبێت، گەلی کورد هەرگیز لەئاست داگیرکاریی چاوپۆشی لە دووژمن نەکردووە و بەرخۆدانیی کردووە، زۆر گرنگە دەستی خیانەت لەناوخۆ ببڕین، چونکە ئەگەر لایەنێک خیانەت نەکات هەرگیز تورکی فاشیست ناتوانێ پێشڕەویی بکات بۆ سەر خاکی کوردستان.
گۆپتەپەیی وتیشی: من باپیرم و مام و ئامۆزایەکم بەچەکی کیمیایی لە کاتی بۆردوومانی گۆپتەپە شەهیدبوون، ئێستا ئێمەی کەسوکاری قوربانیانی چەکی کیمیایی دەزانین خەڵکی بادینان لەژێر چ گاریگەریەکی سەختی چەکی کیمیایی دەوڵەتی تورکی فاشیستدان.
ڕاشیگەیاند، ئەگەر سنوورێک بۆدەوڵەتی تورک دانەنرێت، ئەوا لە شارەکانی دیکەی باشووری کوردستان هەمان کردەوە دووبارەدەکەنەوە دژ بە گەلی کورد.
س.س
