ئەمڕۆ ماوەی دوو مانگ بەسەر مانگرتنی کەسوکاری شەهیدان لە دەروازەی سنوری سێماڵکا لە ڕۆژئاوای کوردستان بەردەوامبوو و تا ئێستا پەدەکە ئامادە نییە تەرمی شەهیدەکانیان ڕادەست بکاتەوەو هیچ وەڵامێکیشیان ناداتەوە.
کەسوکاری دوو گەریلای شەهید کە لەشەوی ٢٨ی ئابدا لە کەمینێکی هێزەکانی پەدەکەدا لە ناوچەی خەلیفان شەهید کراون، ماوەی دوو مانگە داوای تەرمی ڕۆڵەکانیان دەکەنەوە و تا ئێستاش پەدەکە وەڵامیان ناداتەوە.
ئەو دوو شەهیدەی ڕۆژئاوای کوردستان بە ناوەکانی شەهید تولهەڵدان ڕامان و سەردەم جودی کە سێ گەریلای دیکەشیان لەگەڵدا شەهیدبوون تا ئێستا تەرمەکانیان نازاندرێت لە کوێیە.
چین و توێژەکانی ڕۆژئاوای کوردستان ڕۆژانە سەردانی مانگرتوان و کەسوکاری شەهیدیان دەکەن و پشتیوانیان دەکەن و لەگەڵیاندا دەمێنەوە و کردەوەکانی پەدەکە شەرمەزار دەکەن و داوای تەرمی ئەو شەهیدانە دەکەنەوە.
ئەمڕۆ لە ٦٠هەمین ڕۆژی مانگرتنەکەدا ئەندامانی ئەنجومەنی ناوچەی تربەسپی بە کورد و عەرەبەوە لەگەڵ دانیشتوانی ئەو ناوچەیە سەردانی چالاکی کەسوکاری شەهیدانیان کرد.
خۆشناو فەرخۆ، هاوسەرۆکی ئەنجومەنی شارۆچکەی مەشوقی تربەسپی، لە لێدوانێکدا وتی: ئەمڕۆ بۆ وەرگرتنەوەی تەرمی ئەو شەهیدانە لێرەین کە بەدەستی پەدەکە شەهیدکران، گەریلاکانمان بە خواستی خۆیان بۆ پاراستنی گەلی خۆیان لە هەموو پارچەکانی کوردستان گیانی خۆیان فیدا دەکەن، بەداخەوە گەریلا قارەمانەکانی ئێمە بە دەستی کەسانێک شەهید کران کە بەخۆیان دەڵێن کورد.
کەسوکاری ئەو دوو شەهیدەی ڕۆژئاوای وکردستان لە ٥ی مانگی تشرینی یەکەمەوە لە دەروازەی سنوری نێوان ڕۆژئاوای کوردستان و باشوری کوردستان لە مانگرتندان و داوای تەرمی شەهیدەکانیان دەکەنەوە.
ها-غ
