کەلار، مەراسیمی چلەی شەهیدانی کوڵەجۆ بەڕێوەچوو

لە شارۆچکەی کەلار بۆ بەرزڕاگرتنی یادی چلەی دوو شەهیدی هێرشەکەی کوڵەجۆ، پشتیوان محەمەد و بەرزان ئەحمەد، بە ئامادەبوونی جەماوەرێکی بەرچاو مەراسیمێک ئەنجامدرا.


ئێوارەی ئەمڕۆ لە هۆڵی هونەر لە شارۆچکەی کەلاری ناوەندی ئیدارەی گەرمیان، بە ئامادەبوونی بەرپرسانی ئیداری و ئەمنی سنورەکە و جەماوەرێکی بەرچاو، مەراسیمێک بۆ بەرزڕاگرتنی یادی چلەی دوو شەهیدی هێرشەکەی کوڵەجۆ، پشتیوان محەمەد و بەرزان ئەحمەد، بەڕێوەچوو.

لەمەراسیمەکەدا لەلایەن هەریەک لە سامان گەرمیانی بەرپرسی مەڵبەندی یەکێتی لە گەرمیان و مەحمود سەنگاوی بەرپرسی میحوەری گەرمەسێر وتار پێشکەشکراو ئاماژەیان بەوەدا: بە درێژایی مێژوو گەلەکەمان لە خەباتی ڕزگاریخوازانەی خۆیدا شەهیدێکی زۆری داوە، ئەوەشی کە لە ئێستادا هەمانە وەکوو خاک و حکومەتی کوردی، پەرلەمان، دەستکەوت، ئاشتی و ئارامی، بەرهەمی خوێنی شەهیدانە.

ئەوەشیان وت: هەردوو شەهیدیش (پشتیوان محەمەد و بەرزان ئەحمەد) نمونەی شەهیدی تێکۆشەر و قارەمانن کە تا دوا دڵۆپی خوێنیان گیان لەسەر دەستبوون بۆ پاراستنی گەل و خاکەکەیان، ئەوەی دەکەوێتە سەرشانی ئێمە درێژەدانە بە ڕێگای ئەوان و تەواوی شەهیدان.

دواتر لە ڕێگای داتاشۆوە بەڵگە فیلمێک لەسەر ژیان و تێکۆشانی هەردوو شەهید نیشاندرا.

پاشان خانەوادەی هەردوو شەهید وێڕای سوپاسکردنی ڕێکخەرانی مەراسیمەکەو ئامادەبوان، ئاماژەیان بەوە کرد، ڕۆڵەکانیان لەپێناو پاراستنی ئەم خاک و گەلە شەهیدبوون و سەریان پێیان بەرزە، بۆیە ئەوان درێژەپێدەری ئەو ڕێگایە دەبن.

لە کۆتایشدا لەلایەن گروپی شانۆ و موزیکەوە چەند پارچە شانۆگەری و موزیک و دەف و گۆرانی بۆ شەهیدان، نیشتیمان و ئازایەتی پێشمەرگە پێشکەشکران.

ب.ش