کەنەکە: ئەرکی حکومەتی هەرێمە هێرشکەرانی سەر عەدنان ڕەشیدی سزا بدات

کۆمیته‌ی مافه‌کانی مرۆڤی کۆنگره‌ی نه‌ته‌وه‌یی کوردستان-کەنەکە بە ئەرکی حکومه‌تی هه‌رێمی کوردستانی دەزانێت تاوانکارانی هێرشکردنه‌ سه‌ر عه‌دنان ره‌شیدی ده‌ستگیر بکات و بە سزایان بگەیەنێت.


لە ڕۆژانی ڕابردوودا، لە شارۆچکەی پێنجوێن هێرش کرایە سەر ڕۆژنامەنووس و چالاکوانی مەدەنی عەدنان ڕەشیدی و هاوسەر و منداڵەکانی، لەم بارەیەوە کۆمیته‌ی مافه‌کانی مرۆڤی کۆنگره‌ی نه‌ته‌وه‌یی کوردستان ڕاگەیەندراوێکی بڵاوکردەوە و ناڕەزایەتی پیشاندا.

لە ڕاگەیەندراوەکەدا هاتووە، ئەوەی دژی خانەوادەی ڕەشیدی کرا، "نزمترین و قێزەونترین ئاستی ره‌وشت و ره‌فتاری نامرۆڤانه‌یه‌، له‌ ژێر فشار و زه‌نگی ده‌روونیدا ناوی چه‌ندان چالاکوانی دیکەی ئه‌و بواره‌یان لێ سه‌ندون، که‌ ئه‌مه‌ش جارێکیتر مه‌ترسییه‌ له‌ سه‌ر ژیان و گیانی ئه‌و که‌سانه‌ که له‌ ژێر ده‌سته‌ڵاتی رژێمی ئێراندا نیشته‌جێن".

کەنەکە بە توندی ئیدانەی هێرشەکەی کردووە و ڕاشیگەیاندووە:"ئه‌م تاوانه‌ له‌ ژێر ده‌سه‌ڵاتی حکومه‌تی هه‌رێمی کوردستان به‌ گشتی و یه‌کێتی نیشتمانی کوردستان ئه‌نجام دراوه‌، بۆیه‌ ئه‌رک و به‌رپرسیارێتی یه‌که‌م له‌سه‌ر شانی ئاسایشی حکومه‌تی هه‌رێمی کوردستان و هه‌روه‌ها ده‌سته‌ڵاتدارانی یه‌کێتی نیشتمانی کوردستانه‌، که‌ هه‌موو توانای خۆیان بخه‌نه‌ کار بۆ دۆزینه‌وه‌ و به‌سزاگه‌یاندنی بکه‌رانی رووداوه‌کە، تاوانه‌کانی ڕابردوو که‌ دژ به‌ چالاکوانان و تێکۆشه‌رانی رۆژهه‌لاتی کوردستان له‌ رابردوودا له باشور روویانداوه‌، به‌ داخه‌وه‌ وه‌ک پێویست به‌دواداچوونیان بۆ نه‌کراوه‌ و تاوانباران به‌ سزا نه‌گه‌‌یه‌نراون، بۆیه‌ به‌‌داخه‌وه‌ ئه‌م تاوانانه‌ به‌رده‌وام دووبار‌ه‌ ده‌بنه‌وه‌".

کەنەکە ئاماژەی بەوەکردووە، کە عه‌دنان ره‌شیدی ناوی وه‌ک په‌نابه‌ر له‌ نه‌ته‌وه‌ یه‌کگرتوه‌کان تۆمارکراوه‌، ئه‌ندامی رۆژنامه‌نوسانی نێوده‌وڵه‌تییه‌، "پێویسته‌ ته‌واوی مافه‌کانی پارێزراو بێت و وه‌ک په‌نابه‌رێکی هه‌ڵاتوو له‌ ده‌سته‌ڵاتی ئێران، که‌ په‌نای بردۆته‌ به‌ر کورستانی باشور داکۆکی لێبکرێت و ئاسایشی ژیان و گیان بۆ دابین بکرێت".

س.ح