شەممە, 16 ماي 2020 – 11:58 ڕۆژنیوز – ناوەندی هەواڵەکان
دوێنێ هێزەکانی دەوڵەتی داگیرکەری تورک هەڵیانکوتایە سەر شارەوانییەکانی هەدەپە لە شارەکانی ئیدر، سێرت و خانا هەولێلی سەر بە سێرت و داگیریان کردن، لەو بارەیەوە ئەمڕۆ کۆنسەی بەڕێوەبەری کۆنگرەی نەتەوەیی کوردستان ڕاگەیەندراوێکی بڵاوکردەوە.
دەقی ڕاگەیەندراوەکەی کەنەکە:
دەوڵەتی تورکیا بەردەوامە لە کودەتا و دەستبەسەراگرتنی ئیرادەی خەڵکی کوردستان
حکومەتی ئەردۆغان دوێنێ ١٥ی گوڵان، شارەوانییەکانی سیرت، ئیدر (ئیگدر)، میسریج (کورتالان)، خانە هەوێل (بایکان)و ڤارتینیس(ئاڵتونۆڤا)ی داگیرکرد، بەم هەنگاوەش ئەوەی دووپاتکردەوە کە کودەتا و دەستبەسەراگرتنی ئیرادەی گەلی کوردستان بەردەوامە، بەو شێوەیە لەو شارەوانیانەش قەیومەکانی خۆی دانان، دوای هەڵبژاردنەکانی ٣١ی ئازاری ٢٠١٩، کە خەڵکی کوردستان بە دەنگی خۆیان قەیومەکانیان دەرپەڕاند، جارێکی دی ئەردۆغان و هاوکارەکانی کەوتنە جووڵە، لە ١٩ی ئابی ٢٠١٩دا دەستیان بەسەر شارەوانیی شارە گەورەکانی وەک ئامەد و وان و ماردین دا گرت، دوای ئەوەش ئەم سیاسەتە هەر بەردەوام بوو، بەش بەش دەستی بەسەر شارەوانییەکانی تردا گرت، بە داگیرکردنی شارەوانییەکانی سیرت، ئیدر (ئیگدر)، میسریج (کورتالان)، خانە هەوێل(بایکان)و ڤارتینیس(ئاڵتونۆڤا)، ژمارەی ئەو شارەوانیانەی دەستیان بەسەراگیراون گەیشتە ٤٥ شارەوانیی، ئەم رەفتارەی حکومەتی ئاکەپە، ئەم بڕیارەی وەزیری ناوخۆ، ئەم سیاستە دوژمناکارییەی ئەردۆغان، جارێکی تر ڕق و کینەی قووڵی دەوڵەتی تورکیا بەرامبەر خەڵکی کوردستان دەرئەخات.
ئەو شارەوانیانەی لە ٢٠١٦دا حکومەتی ئەردۆگان داگیری کردن و قەیومەکانی لێ جیگیر کردن، لە هەڵبژاردنی ٣١ی ئازاری ٢٠١٩دا بە دەنگی بڵندی خەڵک رزگار کرانەوە و کۆتایی بە تاڵانییەکانی قەیومەکان هێنرا، دیاربوو قەیومەکانی ئەردۆگان لەو ماوەی سێ ساڵەدا شارەوانییەکانیان تالان کردبوون، ماڵ و مڵکی خەڵکی کوردستانیان بۆ کەیف و سەفاکانی خۆیان بە فیڕۆ دابوو، خەڵکی کوردستان لە هەڵبژاردنی ٣١ی ئازاری ٢٠١٩دا، کۆتاییان بەو ناڕەواییەی ئەردۆگان هێناو جارێکی دی شارەوانییەکانیان خستەوە خزمەتی خەڵک، ئەردۆغان و باخچەلی هاوکاری، بەرگەی ئەو شکستەیان نەگرت و جارێکی تر پەلاماری شارەوانییەکان داو داگیریان کردن.
لە ئێستادا کە دنیا لە بەرامبەر پەتای کۆرۆنا بەرخۆدان ئەکا، ڕۆژەڤی سەرەکیی مرۆڤایەتی گەڕانە بە دوای چارەسەری ئەم دەردە کوشندەیەدا، کەچی ڕێک لەمکاتەدا رۆژەڤی سەرەکیی دەوڵەتی تورکیا، بە خراپ سوود وەرگرتن لەم دۆخە، هێرشکردنە سەر خەڵکی کوردستانە. لە ڕاستیدا ماوەیەکی درێژە حکومەتی ئەردۆغان لە هەموو ڕوویەکەوە هێرشێکی دڕندانە و بێسنووری لە زەوی ئاسمانەوە، بۆ سەر خەڵکی کوردستان دەستپێکردووە، بێگومان ئەم هێرشانەی تورکیا هەر بە باکوری کوردستانەوە نەوەستاون، ئەوەتا رۆژانە هێرش ئەکاتە سەر رۆژاو و باشووری کوردستانیش، ئەگەر بۆیان بچێتەسەر لە هەوڵی ئەوەدان هەموو باشوور و رۆژاوای کوردستانیش داگیربکەن، لەبەر ئەوە پێوستە کوردان ئەم هەڕەشانەی ئەردۆغان و باخچەلی بە جددی بگرن، پێکەوە و یەکڕیز ڕێگا لەم هەوڵەی ئەوان بگرن.
ئەم رەفتارانەی حکومەتی ئەردۆغان بە هیچ جۆرێک قبوڵ ناکرێن، ئەردۆغان و باخچەلی شەریکی، هەڵمەتی لەناوبردنی گەلی کوردستانیان دەستپێکردووە، لەهەرجێگایەک کورد نوێنەری خۆی بێت، ئەبێتە ئامانجی هێرشەکانی حکومەتەکەی ئەردۆغان، ئەم هێرشەی دواییشیان بۆسەر شارەوانییەکانی سیرت، ئیدر (ئیگدر)، میسریج (کورتالان)، خانە هەوێل(بایکان)و ڤارتینیس(ئاڵتونۆڤا)، هێرشکردنە بۆسەر هەموو خەڵکی کوردستان، ئەم سیاسەتەش ئەوە دەرئەخات کە لە پەیڕەکردنی هەنگاوە نادیموکراسی و نامرۆڤایەتییەکانیان بەردەوام ئەبن.
ئەم هێرشانە هەر بۆ سەر خەڵکی کوردستان نین، بەڵکو هەڕەشەیەکیشە لەسەر بزووتنەوەی دیموکراتیخواز لە تورکیادا، لەبەرئەوە پێویستە هەموو دیموکراتخوازنی تورکیا، شانبەشانی خەڵکی کوردستان لەدژی ئەم سیاسەتەی ئەردۆغان- باخچەلی بە‌هەڵوێست بن و بەرامبەر ئەم هێرشە فاشستانەیە راوەستن.
با ئەردۆغان و باخچەلی ئەو راستییە بزانن کە قەیومەکانیان بە هیچ شێوەیەک جێی ڕەزامەندیی نین، سەرۆک شارەوانیە ڕەواکانی شارەکانی کوردستان، هەر ئەوانەن کە لە هەڵبژاردنەکانی ٣١ی ئازاردا، بە دەنگی بەرزی خەڵک هەڵبژێردراون.
کۆنگرەی نەتەوەیی کوردستان هەروەها داوا لە دنیای دیموکراتیش ئەکات خەڵکی کوردستان بە تەنیا جێنەهێڵن، بەرامبەر ئەم ناڕەوایەتیەی ئەردۆغان و باخچەلی بێدەنگ نەبن و گوشار بخەنە سەر حکومەتی ئەردۆگان. ئەو راستییە ببینن کە دەوڵەتی تورکیا، بە تایبەتیش حکومەتی ئەردۆغان، هۆکاری نائارامی و ناسەقامگیری و شەڕە لە رۆژەهەڵاتی ناوەڕاستا.
هەروەها کۆنگرەی نەتەوەیی کوردستان داوا لە خەڵکی کوردستان ئەکات، بە هەموو رێگایەکی ڕەواو دیموکرات، لە دژی ئەم سیاسەتە چەپەڵە ناڕەزایەتییەکانیان دەربڕن و لە ئیرادەی خۆیان و شارەوانییەکانیان خاوەنداریی بکەن.
کۆنسەی بەڕێوەبەری کۆنگرەی نەتەوەیی کوردستان، ك ن ك
١٦-٥-٢٠٢٠ برۆکسل
ک.س
