کۆنگرەی نەتەوەیی کوردستان و یەکێتی پەرلەمانتاران، کە لەماوەی ڕابردوودا کۆنفراسی پەرەپێدانی دیالۆگی ناوخۆیی-یان ئەنجامدا، لەسەر کۆنفرانسەکە ڕاگەیەندراوێکی هاوبەشیان بڵاوکردەوە، داوا لە هەموو دەزگا و پارت و ڕێکخراو هاوڵاتیان دەکەن پشتگیریی هەوڵەکانیان بکەن، بۆ هێنانەکایەی دیالۆکی ئاشتیانە.
ڕۆژی ٢١-١١-٢٠٢٠، کۆنفرانسی ڕاوێژ بۆ پەرەپێدانی دیالۆگی ناوخۆیی لەلایەن یەکێتی پەرلەمانتاران و کۆنگرەی نەتەوەیی کوردستان- کەنەکە‌ـەوە بە شێوەی ئۆنلاین و بە بەشداریی ٣٠٠ ئەندام ئەنجامدرا، بە ئامانجی ڕەواندنەوەی گرژییەکان و ڕێگریی کردن لەشەڕ، لە کۆنفرانسەکەدا چەندین ئامانج دیاری کران و بڕیاردرا بۆ پێکهێنانی ئامانجەکان هەنگاوی کرداریی بنرێت.
لە ڕاگەیەندراوێکی هاوبەشدا، کۆنگرەی نەتەوەیی کوردستان و یەکێتی پەرلەمانتارانی کوردستان، لەبارەی ئەو هەنگاوانەی ناویانە بۆ پێکهێنانی ئامانجی کۆنفرانسەکە دەڵێن: هەوڵدانی کۆنگرەی نەتەوەیی کوردستان و یەکێتی پەرلەمانتارانی کوردستان بۆ پەرەپێدانی دیالۆگی ناوخۆیی بەردەوامە، کۆمیتەی هاوبەش ڕۆژی ٣-١٢-٢٠٢٠ کۆبوونەوەی کرد، لە کۆبوونەوەدا هەڵسەنگاندن بۆ کارو خەباتی کۆمیتە کرا، سەرەڕای کەموکوڕییش، ئەو کارانەی تا ئێستا بەڕێوەچوون بە ئەرێنی لەقەلەم دران، لە کۆبوونەوەکەدا بە گشتی لەسەر بەجێهێنانی بڕیاو ڕاسپاردەکانی کۆنفراسی پەرەپێدانی دیالۆگی ناوخۆیی وتوێژ کرا، چۆنێتی فراونکردنی کۆمیتە خاڵی سەرەکیی وتوێژەکان بوو.
هەروەها دەڵێن: کۆمیتەی هاوبەشی کۆنگرەی نەتەوەیی کوردستان و یەکێتی پەرلەمانتاران بڕیاری دا بۆ پەرەپێدانی دیالۆگی ناوخۆیی، پەیوەندی لەگەڵ کەسایەتییە کوردستانییەکاندا بکات و کۆمیتەی دیالۆگی ناوخۆیی فراون بکات، ئێمە لەم کاتە هەستیار و گرنگەدا پەرەپێدانی دیالۆگی ناوخۆیی بە پێویست بە بایەخ ئەزانین، بۆئەوەی ئەو ئەرکە بگاتە ئەنجامێکی ئەرێنی، داوای پشتگیریی لە هەموو دەزگا و پارت و ڕێکخراو و کوردستانییەکان و گەلی کوردستان ئەکەین.
د.ع
