کۆنگرەی نەتەوەیی کوردستان-کەنەکە، لە پەیامێکدا لەسەر کۆچی دوایی بەهادین نوری، سیاسەتمەداری باشوری کوردستان، دەڵێت، کە بەهادین نوری، خەباتێکی گرنگ و بە بەهای بۆ یەکێتی نەتەوەیی کردووە، کۆچکردنی خەسارەتێکی گەورەیە.
ئەمڕۆ بەهادین نوری، سیاسەتمەداری باشوری کوردستان و سەرۆکی پێشوی حزبی شیوعی عێراق، بەهۆی ڤایرۆسی کۆرۆناوە کۆچی دوایی کرد.
کۆنگرەی نەتەوەیی کوردستان- کەنەکە، لە پەیامێکدا لەسەر کۆچی دوایی بەهادین نوری، دەڵێت: مامۆستا بەهادیین نوری لە خەباتی ئازادیخوازیی کوردستان و عێراقدا کاراکتەرێکی کاریگەر و بە هەڵوێست بوو، لە قۆناغێکدا کە ئەندامی کۆنگرەی نەتەوەیی کوردستان بوو، لەسەر پرسە نەتەوایەتتیەکان و یەکڕیزیی گەلی کوردستان خەباتێکی بەهاداری کرد و خاوەن دەنگ و هەڵوێستی نەتەوەیی و نیشتمانیی بوو.
هەروەها دەڵێت: بەهادین نوری لە ساڵانی پەنجاکانی سەدەی ڕابردوودا وەک سکرتێری حزبی شیوعی عێراق ڕۆڵێکی مەزنی لە تێکۆشانی ئازادی و خەباتی هاوبەشی گەلانی عێراقدا گێڕا، دواتریش وەک سکرتێری بزووتنەوەی دیموکراتیخوازان بەهان گوڕو تینەوە لە تێکۆشان بەردەوام بوو.
لەبەشێکی دیکەی پەیامەکەی کەنەکە هاتووە: کۆچی دوایی کەسایەتییەکی شۆڕشگێری وەک مامۆستا بەهادین نوری لەم قۆناغە هەستیارەی کوردستاندا، زیانێکی گەورەیە، ئێستا کوردستان لەهەر کاتێک زیاتر پێویستی بە کەسایەتی تێکۆشەر و خاوەن هەڵوێستە بۆ بەدیهێنانی ئازادی و دیموکراسی و لەدژی داگیرکاریی.
لە کۆتایشدا هاتووە: ئێمە لە کۆنگرەی نەتەوەیی کوردستان بۆ کۆچی دوایی بەڕێز بەهادین نوری سەرەخۆشی لە خۆمان، لە بنەماڵەی مامۆستا بەهادین و تەواوی گەلی کوردستان ئەکەین. بەڵێن دووپات ئەکەینەوە کە رێبازی خەباتکارانی کوردستان بۆ ئازادی و دادپەروەریی و یەکڕیزیی نەتەوەیی دررێژە پێبدەین.
د.ع
