هاوڵاتیانی گوندە كوێستانییەكانی پێنجوێن، بەهۆی نەبونی نەوتەوە پەنایان بۆ بڕینی دارو درەختی شاخەكان بردوە، دەشڵێن: ئەو نەوتەی حكومەت ئەمساڵ پێیداوین تەنها بەشی چالێنانی سەماوەرەكانمان دەكات.
حكومەتی هەرێم ماوەی سێ ساڵە هیچ بەشە نەوتێكی دابەش نەکرد بەسەر هاوڵاتیاندا، ئەمساڵ لەناوچە سارد و كوێستانیەكانەوە دەستیكرد بە دابەشكردنی یەك بەرمیل نەوت بەنرخی ٥٥ هەزار دینار، تەنها چەند ناوچەیەكیش ئەو بڕە نەوتەیان پێدراوە.
عەلی كەرەم، هاوڵاتییەكی گوندیی (گۆخڵانی) سنوری شارۆچكەیی پێنجوێنە بۆ ڕۆژنیوز وتی: كەشوهەوای ناوچەكەی ئێمە زۆر ساردە بەراورد بەناوچەكانی دیكەی كوردستان، ئەمساڵیش تەنها یەك بەرمیل نەوتیان پێداوین، ئەو نەوتەشی پێیانداوین لەجیاتی ئەوەی ٢٠٠ لیتر بێت، ١٨٠ لیتر زیاتر نەدەبوو، ئەوەكەی دیكەیان دەدزی.
وەك ئەو گوندنشینەدەڵێت، بەهۆی نەبوونی نەوتەوە پەنایان بۆ بەكارهێنانی زۆپای داربردووە و وتی: داری وشك دەبڕین لەشاخەكان، ئەگەر داری وشكیش نەبێت لەناچاریدا داری تەڕ دەبڕین، چونكە چارمان نیە، كڕینی چوار بەرمیل نەوتیش پێویستی بەزیاتر ٦٠٠ هەزار دینارە، زۆربەی خەڵك توانای كڕینی نیە.
چەند مانگێك پێش ئێستا، كەمال ئەتروشی، وەزیری سامانەسروشتییەكان وتی: خۆم هەموو ماڵێكی گوندە دوورە دەستەكان گەڕێم بۆئەوەی دڵنیاببمەوە لەوەی نەوتیان وەرگرتووە و دڵنیادەبمەوە لەوەی نەخۆشنابن و ناچارببن بڕۆن دار ببڕنەوە.
لەتیف ڕەشید، هاوڵاتیەكی دیكەی گوندی سەرسوراوە دەڵێت: ئەگەر بمانەوێت سەرمامان نەبێت بۆ ئەوەی زستان بەڕێبكەین لێرە، هەر ماڵێك لەگوندەكەمان پێویستی بە حەوت بۆ هەشت بەرمیل نەوت هەیە ساڵانە، لەبەر ئەوەی زۆر ساردە و لەوەرزی زستان ناوچەكەمان بەفرێكی زۆری لێدەبارێت، ئەو یەك بەرمیلە نەوتەشی ئەمساڵ پێماندراوە، تەنها بەشی سەماوەری چالێنان دەكات.
باسی لەوەشكرد، بەهۆی نەبونوی نەوتەوە لەناچارییدا زۆپای دار بەكاردێنین، لەئێستاشدا داری وشك نەماوە، پەنایان بردووە بۆ بڕینی دارە تەڕەكان، یەك باری ئۆتۆمبێلی بارهەڵگری گەورە داری بە ٤٠٠ هەزار دینار كڕیوە لەئەمساڵدا.
لەتیف ڕەشید سەبارەت بەو قسەی وەزیری سامانە سروشتیەكان كەوتی خۆم سەردانی هەموو ماڵێك دەكەم بزانم نەوتی هەیە یان نیە، بەپێكەنینەوە وتی، بەهیواین چاوەڕێی دەكەین جەنابی وەزیر سەردانمان بكات.
دابەشنەكردنی نەوت لەلایەن حكومەتەوە و گرانی نرخی نەوت لە بازاڕدا هاوڵاتیانی گوندەكانی ناچاركردووە پەناببنە بەر داربڕین و ئەمەش زیانی گەورە بە سورشت دەگەیەنێت.
عومەر ئەحمەد، هاوڵاتییەكی دیكەی بەتەمەنی گوندی سەر سوراوە بۆ ڕۆژنیوز وتی: ساڵانە پێویستمان بەنەوتێكی زۆر هەیە، ئەمساڵ یەك بەرمیلیان بەنیوە ناچڵ پێداوین، ئەوەش بەهیچ جۆرێك بەشمان ناكات، بەناچاریی پەنا دەبەین بۆ هەردەكەمان دارو درەختەكان دەبڕین لەبری سوتەمەنی بۆ خۆگەرمكردنەوەی زستان.
ئەو هاوڵاتییە وتیشی: حكومەت ناهێڵێت دارەكە بۆ گەرمكردنەوەی خۆشمان ببڕین، كەنەوتمان نەدەنێ ماڵو منداڵمان هەمووی ڕەق دەبێتەوە لەسەرمان هیچ دەراماتێكمان نیە، نەوتمان نادەنێ مەجبورین دارو درەختەكان ببڕینەوە، پێنج بەرمیل كەمتر نەوتمان هەبێت بەكەڵكمان نایەت.
شارۆچكەی پێنجوێن دەكەوێتە خۆرهەڵاتی شاری سلێمانیەوە، شارەدێی ناڵپارێز و گەرمك و ٢٠٠ گوند لەخۆدەگرێت، ژمارەی دانیشتوانەكەی نزیكەی ٥٥ هەزار كەسە، ناوچەیەكی كوێستانییە و ساڵانە لە سنوری پارێزگای سلێمانی زۆرترین بەفر لەو شارۆچكەیە دەبارێت.
س.س
