گەرمیانییەکان لەسەر خەبات و داواکارییەکانی دیار غەریب دەدوێن

هاوڵاتیانی گەرمیان باس لە خەباتی شەهید دیار غەریب دەکەن و ئاماژە بە ڕۆڵی ئەو سەرکردەیە بۆ یەکێتیی نەتەوەیی وبەڕێکخستنکردنی کۆمەڵگا دەکەن، بۆیە دەڵێن:"تاکە وەڵام بۆ دەوڵەتی تورک و داگیرکەران بەستنی یەکێتی نەتەوەییە".


٧ی ئەم مانگە، کۆنسەی سەرۆکایەتی کەجەکە، شەهیدبوونی دیار غەریب ئەندامی کۆنسەی سەرۆکایەتی کەجەکە و ئەندامی کۆمیتەی ناوەندیی پەکەکەی ڕاگەیاند، ئەمەش کاردانەوەی زۆری کوردستان بەگشتی و باشوری کوردستان بەتایبەتی بەدوای خۆیدا هێنا، لەو چوارچێوەیەدا هاوڵاتیانی شارۆچکەی کەلاری ناوەندی ئیدارەی گەرمیان بۆڕۆژنیوز دەدوێن.

شاهۆ عەبدوڵا، چاودێری سیاسیی پێیوایە، باسی لەوە کرد، کە ئەگەرچی ئامانجی دەسەڵاتی تورکیا لەناوبردنی هەر تاکێکی کوردە، بەڵام بەتایبەت بە ئامانج گرتن و شەهیدکردنی هەڤاڵ هەڵمەت، هۆکاری ئەوەیە کە "کەسایەتییەکی دیاری باشوری کوردستان بوو، کە لە پرسە نەتەوەییەکان و بەڕێکخستنکردنی کۆمەڵگا و هەوڵدان بۆ یەکێتی نەتەوەیی ڕۆڵی باشی هەبوو، تورکیاش ئەمە بە مەترسیی دەبینێت بۆسەر خۆی".

شاهۆ، پەرەدان بە چالاکییەکان بە گرنگ دەزانێت و وتی: تیرۆرکردنی هەڤاڵ هەڵمەت هەروا ئاسان نییە و قورسە، دەبێت هەڵوێستەی جدیی لەسەربکرێت، پێویستە بەرخۆدان و چالاکیی بەردەوام هەبێت دژ بە دەوڵەتی تورک و چ شەقام و چ هێزەکانی گەریلاش بازنەی چالاکییەکانیان فراوانتربکەن، چونکە داگیرکەران دەیانەوێت پەکەکە سنورداربکەن لە چوارچێوەی قەندیل-دا.

ئاشتی محەمەد، هاوڵاتییەکی دیکەی گەرمیانە و لەسەر هەمان بابەت بەم جۆرە بۆچوونی خۆی خستەڕوو"شەهیدکردنی هەڤاڵ هەڵمەت دەکەوێتە چوارچێوەی هەوڵەکان بۆ لەناوبردنی بزوتنەوەی ئازادیخوازی گەلی کورد و داگیرکردنی کوردستان، کە بە چاوساغیی هاوکاریی نێوخۆی باشوری کوردستان کراوە بەتایبەتی پارتی دیموکراتی کوردستان، کە لە پێناو مانەوەی خۆیاندا بەلایانەوە ئاساییە کە سەرکردە و خاکی خۆیان بفرۆشن، دەوڵەتی تورکیاش بەدرێژایی مێژوو بەدوای دەرچەیەکی وادا گەڕاوە بۆ سیخوڕییکردن و چاوساغییکردنیان بۆ داگیرکردنی کوردستان".

ئاشتی، ئاماژەی بە زیانەکانی پەرتەوازەیی گەلی کورد، کە بە درێژایی میژوو چەندە زیانی لێداوین و ڕایگەیاند: تاکە شت کە کۆمان بکاتەوە و ببێتە وەڵام بۆ داگیرکارییەکان، تەنها یەکێتی نەتەوەیی گەلی کوردە، چونکە لە دۆخی شەڕدا بۆمان دەرکەوتووە کە ئەوەی بە هانامانەوەدێت بە تەنها خۆمانین، ئەوە وەسێتی سەرەکی هەڤاڵ هەڵمەتیش بوو بۆ گەلەکەمان کە هەرچی بین و سەر بە چ لایەنێک بین پێویستە و پارێزەر و خاک و نەتەوەکەمان بین.

س.ح