گەریلاكانی بە ڕەچەڵەك عەرەبی هەپەگە و یەژاستار وێڕای پیرۆزبایی بە بۆنەی ساڵیادی دامەزراندنی پەكەكە، ڕایانگەیاند، پەكەكە تەنیا پارتی كورد نییە، بەڵكو پارتی گەلی عەرەبیشە و خەڵكی نەتەوە و گەلانی تریش هاتوونەتە ڕیزەكانی گەریلاوە، دەشڵێن: پەكەكە تەنها بۆ مەبەستێك دروست نەبوو، بەڵكو بەرامبەر هەموو جۆرە نادادپەروەرییەك وەستاوەتەوە.
بە بۆنەی ٤٤ یەمین ساڵیادی دامەزراندنی پارتی كرێكارانی كوردستان -پەكەكە گەریلاكانی بە ڕەچەڵەك عەرەبی هەپەگە و یەژاستار پیرۆزبای لە ڕێبەری گەلی كورد، عەبدوڵا ئۆجالان و گەریلاكانی ئازادی و گەلان دەكەن.
ئارین دەمهات، گەریلای یەژاستار ڕایگەیاند، ڕۆژی دامەزراندنی پەكەكە بۆ ئێمە ڕۆژێكی زۆر گرنگ و پیرۆزە، سەرەتا ساڵیادی دامەزراندنی پەكەكە لە ڕێبەر ئاپۆ، گەریلاكان لە سەنگەرەكان و گەلەكەمان پیرۆز دەكەین، بە بۆنەی ٢٧ی تشرینی دووەم، پارتەكەمان لە هەموو جیهاندا ناسێندرا و گەیشتە ئەم ئاستە، پەكەكە تەنها بۆ مەبەستێك دروست نەبوو، بەڵكو بەرامبەر هەموو جۆرە نادادپەروەرییەك وەستایەوە.
ئارین جەختیش دەكاتەوە، پەكەكە تەنیا پارتی كورد نییە، بەڵكو پارتی گەلی عەرەبیشە، گەلی عەرەبیش لەڕێگەی پەكەكەوە دركی بەوە كرد، كە گەلێكی چەوساوەیە، بۆ چارەسەركردنی قەیرانی ڕۆژهەڵاتی ناوەڕاست، یەكگرتوویی گەلی كورد و گەلی عەرەب پێویستە، چونكە چارەنووسی ڕۆژهەڵاتی ناوەڕاست لەلایەن هەردوو گەلەكەوە دیاری دەكرێت.
ئارین دەمهات وتیشی: نەك هەر كورد و عەرەب، بەڵكو خەڵكی نەتەوە و گەلانی تریش هاتوونەتە ڕیزەكانی گەریلاوە.
لای خۆیەوە جوان منبج، گەریلای هەپەگە، كە ئەویش بە ڕەچەڵەك عەرەبە دەڵێت: پەكەكە پارتی هەموو گەلانە، ئێمەش سەر بە نەتەوەی عەرەبین و بەشداری ڕیزەكانی گەریلا دەبین، پەكەكە بە تێكۆشانی ڕێبەر ئاپۆ، بە خەباتی شەهیدان گەیشتووەتە ئەم ئاستە، پەكەكە بزووتنەوەیەكی نەتەوەییە، ئیرادەی ئێمە تێكۆشانی ڕێبەر ئاپۆیە، ئێمە ٤٥یەمین ساڵی دامەزراندنی پەكەكە لە دژی دەوڵەتی تورك دەكەینە ساڵی سەركەوتن .
ڕ.ڕ
