گەنجان بانگەوازیی بەشدارییکردن لە ئاهەنگی پیرۆزکردنی ١٥ ئاب دەکەن

کۆمەڵەی گەنجانی وڵاتپارێزی کوردستان و ڕێکخراوی ژنانی گەنجی تێکۆشەر، بۆ شەرمەزارکردنی داگیرکارییەکانی دەوڵەتی تورک لەسەر خاکی ڕۆژئاوا و باشوری کوردستان، بانگەوازیی بەشدارییکردن لە ئاهەنگی پیرۆزبایی ١٥ی تەباخ دەکەن، کە بڕیارە لە بناری قەندیل بەڕێوەبچێت.


ئەمڕۆ، کۆمەڵەی گەنجانی وڵاتپارێزی کوردستان و ڕێکخراوی ژنانی گەنجی تێکۆشەر، بەیاننامەیەکی هاوبەشیان دەربارەی ٣٥-مین ساڵیادی هەنگاوی ١٥ی ئاب "تەباخ" و بەڕێوەچوونی ئاهەنگی پیرۆزکردنی ئەو یادە بڵاوکردەوە.

لە بەیاننامە هاوبەشەکەدا، پیرۆزبایی ٣٥-مین ساڵیادی هەنگاوی ١٥ی ئاب "تەباخ" کراوە و داوا لە هەموو گەنجان و ژنانی گەنج کراوە، کە بەشدارببن لە ئاهەنگی پیرۆزبایی ئەو ساڵیادە، کە بڕیارە ڕۆژی ١٦ی ئاب کاتژمێر ٠٣:٠٠ی پاشنیوەڕۆ لە بناری قەندیل بە پێشەنگایەتیی چالاکوانانی قەڵغانی زیندوو، ژنانی گەنجی تێکۆشەر و گەنجانی وڵاتپارێز بەڕێوەبچێت.

جەختیشکراوەتەوە، کە بە ڕۆحییەتی ١٥ی ئاب ڕێگا نادەن ئەو هێرشانەی کە لەدژی عەبدوڵا ئۆجالان، ڕێبەری گەلی کورد و گەلی کورد و خاکی کوردستان بەڕێوەدەچێت بگەنە ئەنجام.

گەنجانی وڵاتپارێز و ژنانی گەنجی تێکۆشەر تیشکیان خستووەتە سەر هێرشەکانی ئەم دواییەی دەوڵەتی تورک لەدژی ڕۆژئاوا و باشوری کوردستان و ئامادەیی خۆیان بۆ ڕووبەڕووبوونەوەی ئەو هێرشانە و پاراستنی خاکی کوردستانیش دەربڕیوە.

ب.ل