پێنجشەممە, 5 يول 2018 – 13:10 ڕۆژنیوز- هەولێر
ئەمڕۆ یەكێتی مامۆستایانی كوردستان لەسەر ئاستی ئەنجومەنی گشتی لە هەولێر كۆبوونەوەیەكی ڕێكخست و دوای كۆبوونەوەكەش بەیاننامەیەكیان وەك ناڕەزایی بەرامبەر دواخستنی مووچەی مامۆستایان بۆ دەزگاكانی ڕاگەیاندن بڵاوكردەوە.
عەبدولواحید محەمەد، سەرۆكی یەكێتی مامۆستایانی كوردستان لە كۆنگرەکەدا وتی: ئەمڕۆ كۆمەڵێك بابەت باسكراون لەسەروی هەمویشیانەوە كێشەی لیستی موچەیە كە وەزارەتی پەروەردەی تێدا نەبووە، لەكاتێكدا هەموو هەوڵەكانی ئێمەی مامۆستایان بۆ ئەوە بووە كە پرۆسەی پەروەردە بەردەوام بێت، سەرباری پاشەكەوتی مووچە و دواكەوتن و پێنەدان و بڕینی بەشێكی دەرماڵەكان.
ئەو مامۆستایە وتیشی: ٤٧ ڕۆژە مووچەی مامۆستایان دابەش نەکراوە و بەڵێنەكانی حكومەت نایەنێتە دی و دەری دەخات كە پەروەردە جێی بایەخپێدانی حكومەت نییە و هەركاتێكیش حكومەت بیەوێت دڵی وەزارەتێكی دیكە ڕازی بكات شاباش بە موچەی مامۆستایان دەكات.
ک.ک/ب
