وتەبێژی خۆبەڕێوبەریی شەنگال بە ئاماژەدان بە سەردانی شاندێکی شەنگال بۆ بەغدا، وتی: وەک ئیرادەی شەنگال دانوستان بە بنەما دەگرن، بەڵام بەغدا ڕێککەوتنی ٩ی ئۆکتۆبەر بەسەر ئێزدییەکاندا دەسەپێنێت.
لە ماوەی ڕابردوودا کۆبوونەوەکانی خۆبەڕێوبەری شەنگال و حکومەتی عێراق زیادیان کردووە، هەر هەفتەی ڕابردوو شاندێکی شەنگال سەردانی بەغدای کرد و لەگەڵ کاربەدەستانی باڵای عێراق کۆبووەوە، لەسەر ئەم کۆبوونەوانە و گۆڕانگارییەکان لە شەنگال و ناوچەکە، فارس حەربۆ وتەبێژی پەیوەندییەکانی خۆبەڕێوبەری دیموکراتی شەنگال بۆ ڕۆژنیوز دوا.
حەربۆ ئاماژەی بە هێرشەکانی دەوڵەتی تورک بە مەبەستی داگیرکردنی باشووری کوردستان کرد و وتی: ئەو هێرشانە تەنیا دژی گەریلا و پەکەکە نییە، هێرشەکان دژی گەلی کورد و دەستکەوتەکانی، شەنگال و هەموو خاک و گەلانی عێراقە، دەوڵەتی تورک دەیەوێت تا ساڵی ٢٠٢٣ هەندێک ناوچەی ستراتیژیکی عیراق بخاتە دەست خۆی و چەتەکانی تێدا بڵاوبکاتەوە، دەیەوێت بە کۆتاییهاتنی کاتی پەیمانی لۆزان ئەو ناوچانە پەیوەستی خاکی خۆی بکات.
باسی لەوەش کرد کە هەندێک هێزی عێراقی و کوردی هاوکاری هێرشەکانی دەوڵەتی داگیرکەری تورکن و وتی: دەستکەوتەکانی ئەمڕۆی باشووری کوردستان تەنیا هی پەدەکە نیین، هی گەلە، خەڵکی باشوور سەدان هەزار شەهیدیان داوە، پەدەکە ئەمڕۆ بە ئاشکرا خیانەت لە یەکگرتنی کورد دەکات، لەگەڵ دەوڵەتی تورک ڕێککەوتووە و دەیانهێنێتە سەر خاکی کوردستان و عێراق، ئەمە مەترسییەکی گەورەیە.
زیاتر ڕوونی کردەوە کە ئامانجی دەوڵەتی تورک، داگیرکردنی کەرکوک و موسلە و وتی: دەوڵەتی تورک خۆی لە تلعەفەر، موسل، کەرکوک و هەموو باشووری کوردستان ڕێکدەخاتەوە، گەلانی عێراق و بە تایبەتی شیعەکان کە دژی داعش کەوتنە جوڵە، پێویستە ئەمڕۆش هێرش بۆسەر خاک و گەلانی عێراق ببینن و لە بەرامبەریدا هۆشیار بن.
حەربۆ ڕەخنەشی لە بێدەنگی و بێهەڵویستی حکومەتی عێراق کرد و داوایکرد کە: گەلانی عێراق چاوەڕێی حکومەت نەکەن و دژی هێرشەکان هەڵویستێکی هاوبەشیان هەبێت، هەفتەی ڕابردوو هێرش کرایە سەر شێخان، ئەگەر سوپای تورک بچێتە لالەشی پیرۆز، کێی لالەش دەپارێزێت؟ ٢٠١٤ شەنگالیان نەپاراست تا گەریلا بە هانامانەوە هات.
لەسەر کۆبوونەوە لەگەڵ کاربەدەستانی عێراقی زانیاریی گرنگیشی دا و وتی: لە کۆبوونەوەکاندا، عێراقییەکان بە ئێمەیان وت ئەگەر ئێمە نەیەنە شەنگال یان ئێوە داواکارییەکانی ئێمە جێبەجێی نەکەن، دەوڵەتی تورک دێت و هێرش دەکات، ئەمە نیشانەی ئەوەیە کە لەسەر هێرشەکان ڕێککەوتوون.
هەروەها بە ئاماژەدان بەوەی کە ڕێککەوتنەکەی ٩ی ١٠ی ٢٠٢٠ لەسەر داخوازیی دەوڵەتی تورک لەنێوان بەغدا و هەولێر کراوە، حەربۆ وتی: بەڵام بەرخۆدان و هەڵویستی کۆمەڵگای ئێزدی تا ئێستا نەیهێشتووە ئەو ڕێککەوتنە جێبەجێی بکرێت، بەپێی دەستوور، عێراق دەوڵەتێکی فیدراڵی و دیموکراتییە، ئەمڕۆ پێکهاتەکانی عێراق خاوەن ئیرادەی خۆیانن و ئێمەش لەگەڵ ئەوەین کە هەر نەتەوەیەک مافی خۆی هەبێت، بەڵام بۆ ئەم مافە بۆ ئێزدیان نییە، بۆ قەدەغەیە؟ ئەگەر مافێکی دەستوورییە، بۆ زەوتی دەکەن؟
جەختیشی لەوە کردەوە کە ئێمە بۆ ئەوەی کارمەندەکانمان پارە لە حکومەتی عێراقی وەرگرن، شەڕی داعشمان نەکردووە و وتی: وەک کۆمەڵگای ئێزدی دەمانەوێت داهاتوویەکی سیاسی، ئیداری و کلتوریمان هەبێت، موچەمان ناوێت، بۆ موچە شەهیدمان نەداوە، ئەگر مافی کۆمەڵگاکەمان قبوڵ نەکرێت، دەبێت بپرسین کە بۆ لێرە دەژین؟
هەروەها وتی: لە مانگی حوزەیراندا دووجار لەگەڵ کۆمیسیۆنی باڵای حکومەتەوە کە لە ئەندامانی ئەنجومەنی ئاسایشی نیشتمانی، ئەنجومەنی ئاسایشی نەتەوەیی و فەرماندەیی گشتی ئۆپەراسیۆنەکان پێکهاتبوو، کۆبووینەوە، کە جارێکیشیان نوێنەری نەتەوە یەکگرتووەکان تێدا بەشداربوو، ئێمە داواکارییەکانمان پێشکەشکرد، بەڵام تا ئێستا دەوڵەتی عیراق هەنگاوێک بەرەو پێش نەهاتووە، نەیویستووە کە بە شێوەیەکی دیموکراتی ئەو کێشەیە چارەسەر ببێت، ئێمە هەمیشە داوای دانوستانمان کردووە، ویستوومانە بێی کاریگەریی هێزێکی دیکە کێشەکانمان لەگەڵ عێراق چارەسەر بکەین، بەڵام لە دوایین کۆبوونەوەدا وتیان دەبێت ئەو ڕێککەوتنە قبوڵ بکەن، سەرەڕای ئەوەی گەل ڕەتیدەکاتەوە، دەیانەوێت ئەو ڕێککەوتنە بەسەرماندا بسەپینن.
حەربۆ ئاماژەی بە مەترسیی ئەم سیاسەتەی عێراق کرد و ڕایگەیاند: ئەگەر کێشەکە بە شێوەی دیموکراتیانە چارەسەر نەبێت، وەک دیالە، خانەقین و کەرکوک کێشەکان قوڵتر و ئاڵۆزتر دەبنەوە، بەڵام ئەگەر بە دیموکراتیانە چارەسەر ببن، شەنگال دەبێتە نمونەیەک بۆ چارەسەریی هەموو کێشەکانی عێراق، ئێمە دژی حکومەتی عێراق نیین، بەڵام عێراق مافی ئێمە قبوڵ ناکات، کاتێک لێرە شەڕمان دەکرد، دەوڵەت لێرە نەبوو، وەکوو هاوڵاتییەکی عێراقی شەڕمان کرد، بەڵام ئێستا دەوڵەت دەیەوێت لێرە دامەزراوە و کەسانی خۆی دابنێت، دەیانەوێت هەموو شتێک لە خزمەتی سیاسەتی ئەوان بێت، سەیری پارێزگاکانی دیکەی عێراق بکەن، هەر شوێنێک دامەزراوەی حکومەتی لێیە، ناکۆکیی تێدا زیاترە.
فارس حەربۆ وتەبێژی پەیوەندییەکانی خۆبەڕێوبەری دیموکراتی شەنگال، لە کۆتایی قسەکانیدا دووپاتی کردەوە: هەڵویستی ئێمە دەربارەی ڕێککەوتنی هەولێر-بەغدا نەگۆڕاوە، ئێمە بۆ دانوستان کراوەین، دەمانەوێت کێشەکان چارەسەر بکرێن، بەڵام ئەگەر عێراق پێداگری لەسەر هەڵویستی خۆی بکات و هەڵویستی بۆ چارەسەری نەبێت و بیەوێت خۆی بسەپینێت، لەلایەن ئێمەوە قبوڵ ناکرێت.
ب.ک
