"ئه‌وه‌ی له‌ جزیره‌ و ئێران رووده‌دات هه‌مان جینۆسایدی هه‌ڵه‌بجه‌یه‌"


رۆژنیوز – ژاوێن شاڵی

پاش نزیکه‌ی شه‌ش ساڵ دوورکه‌وتنه‌وه‌ له‌ شانۆ، شوان عه‌توف، ئه‌کته‌رو ده‌رهێنه‌ر و سیناریستی باشوری کوردستان، له‌ئێستادا سه‌رقاڵی پرۆڤه‌کردنه‌ بۆ نوێترین کاری که‌ مۆنۆدرامایه‌که‌ له‌نوسین و ده‌رهێنانی خۆی و هه‌ر خۆیشی رۆڵ ئه‌گێڕێت له‌ مۆنۆدراماکه‌دا، ئه‌مه‌ جگه‌ له‌وه‌ی چه‌ندین پرۆژه‌ی فیلمی سینه‌مایی له‌به‌رده‌سته‌و به‌رده‌وام خه‌ریکی کارکردنه‌ تیایاندا.

ده‌رباره‌ی کۆی پرۆژه‌ هونه‌رییه‌کانی و به‌تایبه‌ت نوێترین کاری که‌ مۆنۆدرامایه‌که‌و هێشتا له‌سه‌ر ناوێکی دیاریکراو یه‌کلانه‌بۆته‌وه‌ و بڕیاره‌ له‌ 14/4/2016دا له‌ سلێمانی نمایشی بکات، ستافی رۆژ نیوز له‌کاتی پرۆڤه‌کردنیدا سه‌ردانی عه‌توفی کردو گفتوگۆیه‌کی هونه‌ریی له‌گه‌ڵدا سازدا.

رۆژنیوز: ئه‌گه‌ر بکرێت باسێکی بیرۆکه‌و ناوه‌رۆکی ئه‌م کاره‌ نوێیه‌ت بکه‌یت، له‌چییه‌وه‌ ئه‌م بیرۆکه‌ت لا گه‌ڵاڵه‌بوو؟

-ئه‌م شانۆییه‌ پێشتر له‌ ساڵی 2011 له‌ فیستیڤاڵی مۆنۆدراما له ‌له‌نده‌ن پێشکه‌شم کردووه‌ به‌ناوی (ماریۆنێت توڕه‌ده‌بێت)، به‌ڵام به‌ ستراکچه‌رێکی تر، ئێستا له‌م بارودۆخه‌دا به‌ داڕشتنێکی نوێ و بۆ یه‌که‌مجار له‌ شاری سلێمانی نمایشی ده‌که‌م، هه‌ڵبه‌ت بۆ ناونیشانی مۆنۆدراماکه‌ دوو سێ ناو له‌خه‌یاڵمدا هه‌یه‌، به‌ڵام له‌ئێستادا ناتوانم ناوه‌که‌ بدرکێنم، ئه‌م کاره‌م په‌یوه‌ندییه‌کی راسته‌وخۆی به‌ نۆستالیژیی 1996 تاوه‌کو 2016 هه‌یه‌، له‌سه‌ر ژیانی خه‌ڵکه‌ به‌تایبه‌ت گه‌نجان، له‌ڕێگه‌ی به‌ندبێژێکه‌وه‌ که‌ کاراکته‌رێکی پۆپۆلیتاری میللی ناو کۆمه‌ڵگایه‌ و په‌راوێزخراوه‌، له‌ڕووی دراماتیکییه‌وه‌ حه‌زمکردووه‌ کاری له‌سه‌ر بکه‌م، ئه‌و کاراکته‌رانه‌ به‌گشتی خه‌ڵک واده‌زانن هه‌میشه‌ شادن، چونکه‌ هه‌میشه‌ خه‌ریکی ده‌هۆڵ ژه‌ندن و شایی و ئاهه‌نگن، من حه‌زمکردووه‌ له‌ گۆشه‌نیگایه‌کی تره‌وه‌ سه‌یری ئه‌م کاراکته‌رانه‌ بکه‌م و ئه‌وه‌ بخه‌مه‌ڕوو که‌ ئه‌وانه‌شی ده‌هۆڵ ده‌ژه‌نن و له‌ شایی و ئاهه‌نگه‌کاندا دڵمان خۆش ده‌که‌ن، ئه‌وانیش مرۆڤن و دڵشکاون و خاوه‌ن چیرۆکی خۆیانن.

رۆژنیوز: وه‌ک له‌ میانی پرۆڤه‌کردنتدا بینیمان، له‌م کاره‌تدا ده‌ستت خستۆته‌ سه‌ر زۆر برین، باس له‌ چه‌ند وێستگه‌یه‌کی مێژویی تراژیدیی نه‌ته‌وه‌یی ده‌که‌یت به‌شێوه‌یه‌کی نۆستالیژیی، کۆی کاره‌که‌ چیه‌ و ده‌ته‌وێ چی بڵێت.؟

-کۆی کاره‌که‌‌ وه‌ستان و قسه‌کردنێکه‌ له‌سه‌ر هه‌ندێک وێستگه‌ی مێژوویی، کۆمه‌ڵێک مه‌فاهیمی گه‌وره‌ی دوای راپه‌ڕین، وه‌ک مه‌سه‌له‌ی کرانه‌وه‌، سیاسه‌ت، حزب، شه‌ڕی ناوخۆ، ئه‌خلاق، گه‌نده‌ڵی، په‌یوه‌ندییه‌ کۆمه‌ڵایه‌تییه‌کان که‌ چۆن له‌به‌ریه‌ک هه‌ڵوه‌شانه‌وه‌، هه‌روه‌ها مه‌سه‌له‌ی کرانه‌وه‌ چه‌ند کوشنده‌ بوو بۆ ئێمه‌ له‌گه‌ڵ ئه‌وه‌ی که‌ ده‌بوایه‌ به‌رهه‌ممان بهێنایه‌، تا ئه‌و رۆژه‌ی ده‌گه‌ڕێته‌وه‌ بۆ کوردستان، رۆژگاری خۆپیشاندانه‌کانه‌، لێره‌وه‌ ئیتر کاره‌که‌ ده‌گۆڕێت بۆ ره‌خنه‌گرتن (ره‌خنه‌ی من) له‌م بارودۆخه‌، له‌و کاره‌دا من داواده‌که‌م که‌ مرۆڤه‌کان خۆیان بڕوخێنن و مرۆڤێکی تر و تازه‌ له‌خۆیان دروستبکه‌ن، به‌رد بگرنه‌ خۆیان، به‌ر له‌ هه‌موو که‌سێک، به‌ر له‌هه‌موو که‌سێک تۆ خۆت نابێت ژنکوژ بیت، به‌ر له‌هه‌موو که‌سێک تۆ نابێت شه‌قام پیس بکه‌یت، ئه‌مانه‌ به‌دروشم نابێت، به‌ر له‌ هه‌ر که‌سێک تۆ خۆت ده‌بێت بزانیت ده‌نگ ده‌ده‌یت به‌ کام هێزه‌ی گوزارشت له‌ تۆ ده‌کات، دواجار ده‌نگی ئێمه‌یه‌ چه‌مکی موقه‌ده‌س (پیرۆز) دروست ده‌کات، په‌یامی من له‌م کاره‌ ئه‌وه‌یه‌ تاک هۆشیار بێته‌وه‌و بێته‌وه‌ ناو خۆی، له‌ڕێگای کاراکته‌ری (تاله‌ی ته‌پڵژه‌نه‌وه‌)".

رۆژنیوز: له‌م کاره‌تدا باسی کۆمه‌ڵێک تراژیدیایی نه‌ته‌وه‌یی ده‌که‌یت که‌ هه‌مویان جه‌نگ و ماڵوێرانی و کاره‌ستانیان به‌رهه‌مهێناوه‌، به‌ڵام له‌ مۆنۆدراماکه‌دا ده‌بینین که‌ کاره‌کته‌ره‌که‌ ده‌گه‌ڕێته‌وه‌ دیسان ده‌که‌وێته‌وه‌ ناو هه‌مان دۆخ، تۆ له‌مڕووه‌وه‌ ده‌ته‌وێت چی بڵێیت؟

-ئه‌وه‌ی له‌م کاره‌دا به‌لای منه‌وه‌ گرنگه‌ کایه‌ی ئه‌خلاقه‌، زۆرێک له‌ چالاکوانان و رۆشنبیر و هونه‌رمه‌ند و نوسه‌رانی کورد باس له‌ گۆڕانکاری ده‌که‌ن له‌مه‌سه‌له‌ی سیاسه‌تدا، به‌ڵام که‌س قسه‌ له‌سه‌ر مه‌سه‌له‌ی ئه‌خلاق ناکات، که‌س قسه‌ له‌سه‌ر په‌یوه‌ندی مرۆڤه‌کان ناکات، که‌س قسه‌ له‌سه‌ر ئازادی تاکه‌که‌س ناکات، که‌س قسه‌ له‌سه‌ر ئه‌و کێشه‌ سۆسۆلۆجییه‌ گه‌وره‌یه‌ ناکات که‌ کێشه‌ی نێوان نێر و مێیه‌، من له‌م مۆنۆدرامایه‌دا ده‌ستی بۆ ده‌به‌م، ئێمه‌ ده‌بێت ئه‌و کێشانه‌ تێپه‌ڕێنین، لای ئێمه‌ شه‌قامه‌کان جوان ده‌بن، مۆڵه‌کان گه‌وره‌تر ده‌بن، به‌ڵام مرۆڤ غه‌مگینه‌، له‌به‌رئه‌وه‌ی په‌یوه‌ندییه‌ رۆحییه‌کان له‌جێی خۆیان نین، له‌به‌رئه‌وه‌ من ته‌رکیزم خستۆته‌ سه‌ر مه‌سه‌له‌ سۆسۆلیژیی و ئه‌خلاقییه‌کان، بڕوای ته‌واویشم هه‌یه‌ که‌ هه‌تا یه‌کسانی نێوان نێرو مێ و ئازادی به‌رهه‌م نه‌هێنرێت شتێک به‌دی نایه‌ت به‌ناوی ئازادی و ریفۆرم و چاکسازی و گۆڕانکاریی، له‌ ناوه‌رۆکی ئه‌م مۆنۆدرامایه‌شدا باسی ئه‌و مه‌سه‌لانه‌ ده‌که‌م.

رۆژنیوز: له‌م کاره‌دا باسی کۆمه‌ڵێک له‌و وڵات و نه‌ته‌وانه‌ ده‌که‌یت که‌ کوردیان داگیر کردووه‌و وزڵمیان له‌ نه‌ته‌وه‌ی کورد کردووه‌، کۆمه‌ڵێک ره‌مز تێکده‌شکێنیت، لێره‌وه‌ ده‌کرێت بڵێین هونه‌ر ته‌حه‌دایه‌که‌، یان ده‌کرێت بڵێن شوان عه‌توف له‌م کاره‌یدا ته‌حه‌دا ده‌کات؟

- مه‌سه‌له‌که‌ ته‌حه‌دا نیه‌، مه‌سه‌له‌که‌ مافه‌، ته‌ماشای دیمه‌نی کورد بکه‌، له‌یه‌ک ساتدا له‌ به‌غداوه‌ به‌ ئاره‌زووی خۆی یاریت پێده‌کرێت، له‌ ئێران گه‌نجه‌کانمان له‌ سێداره‌ ده‌درێن، به‌به‌رچاوی هه‌موو دنیاوه‌ له‌ جزیره‌ و بۆتان و سلۆپی خه‌ڵک سه‌رده‌بڕرێت و قه‌تڵ و عام ده‌کرێن، که‌س نیه‌ قسه‌بکات، ئه‌وه‌ی له‌ جزیره‌ بۆتان و ئێران رووده‌دات هه‌مان ئه‌و کاره‌سات و جینۆسایده‌یه‌ که‌ له‌ هه‌ڵه‌بجه‌ روویدا، سیاسییه‌کانی ئێمه‌ش قسه‌ ناکه‌ن، ناوه‌ندی هونه‌ریش بێده‌نگه‌، من وه‌زیفه‌ی خۆمه‌ له‌ڕێی هونه‌ره‌که‌مه‌وه‌ ده‌ست بخه‌مه‌ سه‌ر ئه‌و برینانه‌ که‌ میلله‌ته‌که‌ی من رۆژانه‌ خوێنی ده‌ڕژێت، بۆیه‌ ئه‌مه‌ ته‌عدا نییه‌ له‌ میلله‌ته‌کانی تر، هێرشکردنه‌ سه‌ر رژێمه‌ دراوسێکان به‌و واتایه‌ ناگه‌یه‌نێ که‌ تۆ بڵێیت له‌ڕووی کلتورییه‌وه‌ حه‌زم له‌و کلتورانه‌ نییه‌، بڵێین حه‌زمان له‌ تورک و فارس نیه‌، به‌ڵکو قسه‌ی من له‌سه‌ر رژێمه‌ سیاسیه‌ فاشیسته‌ دیکتاتۆره‌کانه‌ که‌ وه‌ک مرۆڤ، وه‌ک قه‌واره‌، وه‌ک زمان وه‌ک نه‌ژاد کوردییان چه‌وساندۆته‌وه‌.

رۆژنیوز: له‌م کاره‌دا ته‌پڵێکت به‌ده‌سته‌وه‌یه‌، ئه‌و ته‌پڵه‌ چ رۆڵێکی هه‌یه‌ و بۆ چی به‌کارتهێناوه‌.؟

- ئه‌و ته‌پڵه‌ وه‌ک ره‌گه‌زێکی سه‌ره‌کی کۆی کاره‌که‌م پێکده‌هێنێت، من له‌م مۆنۆدرامایه‌دا نه‌مویست نواندنی خۆم بخه‌مه‌ سه‌ر باری ره‌گه‌زه‌کانی تر، وه‌کو دیکۆرێکی واقیعی یان به‌کارهێنانی موزیکێکی زۆر، به‌ڕای من له‌و کاره‌دا له‌به‌رئه‌وه‌ی مۆنۆدرامایه ‌و به‌ته‌نهام، یارمه‌تیم ده‌دات بۆئه‌وه‌ی ئاسانتر و باشتر نواندن بکه‌م، من ئه‌و ره‌گه‌زانه‌ی ترم له‌خۆم بڕی بۆئه‌وه‌ی کاره‌که‌ له‌خۆم قورستر بکه‌م، بۆئه‌وه‌ی جۆرێک له‌ ناته‌بایی بده‌یت به‌ بینه‌ر، جۆرێکه‌ له‌ ریسکی ئیستاتیکی منه‌ به‌رامبه‌ر به‌ بینه‌ر.

رۆژنیوز: ماوه‌ی شه‌ش ساڵه‌ کاری شانۆییت نه‌کردووه‌، بۆچی .؟

-ئه‌م ساڵانه‌ سینه‌ما بردمی، به‌ڵام ئه‌م کاره‌م ده‌‌بێته‌وه‌ به‌ سه‌ره‌تایه‌کی نوێ بۆ کاری شانۆیم، له‌ڕاستیشدا هه‌ر ئه‌وه‌ نیه‌ که‌ سینه‌ما بردمی، له‌م چه‌ند ساڵه‌دا ئه‌زموونی سه‌رنجڕاکێش نه‌هاتۆته‌ به‌رده‌مم بۆئه‌وه‌ی کاری تێدا بکه‌م و بتوانم ریسکێکی جیاواز بکه‌م، حه‌زده‌که‌م ئه‌گه‌ر 10‌ ساڵیش بووه‌ستم ئه‌گه‌ر کارمکرد کارێکی جیاواز بکه‌م و بینه‌ر جیاوازتر بمبینێت، ئه‌مه‌ به‌شێکی بووه‌، به‌شێکیشی سه‌رقاڵبوونی زیاتم بووه‌ به‌ سینه‌ماوه‌، کۆتا کارم به‌شداریکردن بوو له‌ شانۆیی (ئه‌و ده‌مه‌ی دنیا بێتامه‌، حه‌یرانێ) له‌گه‌ڵ ئه‌م کاره‌م بوو که‌ پێشتر له‌ ساڵی 2011 له‌ له‌نده‌ن پێشکه‌شم کرد.

رۆژنیوز: پرۆژه‌ی داهاتووت جیه‌.؟

-کۆمه‌ڵێک پرۆژه‌ی زۆرم هه‌یه‌ له‌ ئێستادا، به‌ڵام هه‌ر دوایی ئه‌م مۆنۆدرامایه‌ ده‌چمه‌ سه‌ر کارکردن بۆ فیلمێک، ئه‌و فیلمه‌ ئه‌گه‌ری هه‌یه‌ له‌ کورته‌وه‌ بچێت بۆ درێژ، ئه‌گه‌ریش هه‌یه‌ که‌ هه‌ر وه‌کو فیلمێکی کورت بمێنێته‌وه‌، ئه‌م فیلمه‌ش ده‌رباره‌ی رووداوه‌کانی ئه‌م دواییانه‌ی سلۆپییه‌، دوای ئه‌وه‌ش به‌دڵنیاییه‌وه‌ کۆمه‌ڵێک پرۆژه‌م هه‌یه‌، یه‌کێک له‌وانه‌ رۆمانه‌که‌ی هاوڕێم (عه‌تا محه‌مه‌د)ه‌ رێبه‌ری کتێبسازه‌ کوژراوه‌کان، که‌ دیمه‌نه‌کانی هه‌موو له‌شاری ستۆکهۆڵمی وڵاتی سوید رووده‌دات و له‌وێش وێنه‌ ده‌گیرێت، کاره‌که‌ش ده‌که‌وێته‌وه‌ سه‌ر ئه‌وه‌ی چ کۆمپانیایه‌ک ته‌به‌نی ده‌کات، به‌ڵام من لای خۆمه‌وه‌ سه‌رقاڵی ئاماده‌کردنی کاره‌که‌ ده‌بم.

رۆژنیوز: چه‌ندێک زه‌حمه‌ته‌ یان ئاسانه‌ بۆ هونه‌رمه‌ند، بۆ ده‌رهێنه‌ر که‌ رۆمانێک وه‌رگێڕێته‌ سه‌ر فیلمێکی سینه‌مایی.؟

-قسه‌کردن ده‌رباره‌ی په‌یوه‌ندی رۆمان و سینه‌ما، دوانه‌یه‌کن له‌یه‌کتری جیاناکرێنه‌وه‌، سه‌ره‌تاکانی کاره‌ گه‌وره‌کان له‌ سینه‌ما گرنگه‌کانی وه‌ک سینه‌مای میسری و ئێرانی و سینه‌مای جیهانی، زۆربه‌ی جار رۆمانه‌کان کراونه‌ته‌ فیلم، به‌ڵام ئه‌وه‌ی چۆن ده‌کرێته‌ فیلم ئه‌وه‌ شتێکه‌ قسه‌ی جیاوازی له‌سه‌ره‌، ئه‌وه‌ی من ده‌یزانم و لێی دڵنیام 100% ئه‌وه‌یه‌ که‌ ئه‌و رۆمانه‌ وه‌ک خۆی ناکرێته‌ فیلم، به‌تایبه‌تی ئه‌م رۆمانه‌ی عه‌تا محه‌مه‌د که‌ گێڕانه‌وه‌یه‌کی ناته‌بایه‌، سێ رۆمانه‌ له‌ناو یه‌ک کتێبدا، من ئه‌و دید و بۆچوونه‌ی ده‌رباره‌ی رۆمانه‌که‌ هه‌مه‌ به‌ کاک عه‌تام وتووه‌ و ئه‌ویش کێشه‌ی نییه‌ له‌سه‌ری، ئه‌و شوێنانه‌م به‌لاوه‌ گرنگه‌ په‌یوه‌ندی نێوان نوسین و تۆتالیتاریزمه‌ له‌م رۆمانه‌دا، کوشتنی هه‌موو ده‌نگه‌ جیاوازو ئازاده‌کانه‌ له‌ڕێگه‌ی کتێبه‌وه‌ له‌هه‌موو سه‌رده‌مه‌ جیاوازه‌کاندا.

رۆژنیوز: بۆچی له‌ناو هه‌موو چیرۆک و رۆمانه‌کانی عه‌تا محه‌مه‌د، ئه‌م رۆمانه‌یت هه‌ڵبژارد.؟

- له‌ڕاستیدا من رۆمانی (خواجه‌ نه‌سره‌دین)یش هه‌ر بابه‌تی کارکردنم بوو، به‌ڵام (رێبه‌ری کتێبسازه‌ کوژراوه‌کان) ئه‌ندێشه‌یه‌کی زۆر گه‌وره‌ی تیایه‌، جگه‌ له‌وه‌ شاعیرییه‌تێکی تێایه‌ بۆ من سه‌رنجڕاکێش بوو، مه‌سه‌له‌ی ئاماده‌کردنی به‌دڵنیاییه‌وه‌ قورسه‌، به‌تایبه‌ت که‌ نه‌زانیت ئاسۆکانی پراکتیزه‌کردنی کاره‌که‌ت‌ چۆنه‌ و چ کاتێکه‌، خۆئه‌گه‌ر بزانیت بۆنموونه‌ شه‌ش مانگی تره‌ کاره‌که‌ت‌ خێراتر ئیشی تێدا ده‌که‌یت، بۆیه‌ ئه‌م کاره‌‌ وه‌ک هه‌موو ئه‌و سکرێپتانه‌ی تر که‌ نووسیومه‌ و دامناون، نازانم به‌دیاریکراوی که‌ی کاره‌که‌ جێبه‌جێ ده‌بێت.

رۆژنیوز: جیا له‌و مۆنۆدرامایه‌ که‌ بڕیاره‌ له‌ 14/4 له‌ سلێمانی نمایش بکرێت، و جیا له‌وکارانه‌ی تر، چ شتێکی تر له‌ خه‌یاڵی شوان عه‌توفدا هه‌یه‌ کاری له‌سه‌ر بکات؟

- زۆر شت، زۆرکارو پرۆژه‌ی ترم هه‌یه‌، سێ فیلمی درێژم هه‌یه‌، ئه‌گه‌ر تا کۆتایی ژیانم تا ئه‌وه‌نده‌ی ژیانم که‌ ماوه‌، بتوانم ئه‌و سێ فیلمه‌ بکه‌م زۆر به‌لامه‌وه‌ گرنگ ده‌بێت، له‌به‌رئه‌وه‌ی په‌یوه‌ندییه‌کی گرنگی به‌ نه‌ته‌وه‌که‌مه‌وه‌ هه‌یه‌، ئه‌گه‌ر ته‌مه‌نم یارمه‌تیم بدات به‌س ئه‌وسێ فیلمه‌ درێژه‌ بکه‌م وا ده‌زانم شتێکی زۆر گرنگم کردووه‌، ئه‌وه‌ش بچوکترین خه‌ونه‌ بۆ هونه‌رمه‌ندێک که‌ هونه‌ر پێشکه‌ش ده‌کات، به‌ڵام ده‌زانم من له‌ چ واقیعێکدا هونه‌ر ده‌که‌م، چه‌ند سه‌خته‌ هونه‌رو سینه‌ما له‌ بارودۆخی ئێستای کوردستان، به‌ڵام هیوادارم بتوانم ئه‌نجامیان بده‌م.

رۆژنیوز: تۆ نائومێدیت به‌رامبه‌ر به‌و بزوتنه‌وه‌ هونه‌رییه‌ی له‌ئێستادا له‌ باشوری کوردستان هه‌یه.‌؟

-نه‌خێر، ئه‌گه‌ر واقیعبینانه‌ سه‌یر بکه‌ین ئه‌وه‌ی که‌ ئێستا ئه‌کتیڤه‌ هونه‌ره‌، به‌تیابه‌ت هونه‌رمه‌نده‌ گه‌نج و لاوه‌کان، ته‌نها ئه‌گه‌ر سه‌رنج بده‌ینه‌ شاری سلێمانی رۆژێک نیه‌ چالاکی تیا نه‌بێت، ئه‌و ستافه‌ی که‌ ئێستا له‌گه‌ڵ منن بێ پاره‌ به‌بێ پشتگیرییه‌کی گه‌وره‌ به‌ ئه‌وپه‌ڕی له‌خۆبوردوییه‌وه‌ دێیته‌ هۆڵێکی ساردو سڕه‌وه‌ به‌وپه‌ڕی حه‌ماس و گه‌رم و گوڕییه‌وه‌ به‌ هونه‌ره‌وه‌ سه‌رقاڵیت، رێک وه‌ک ئه‌و پێشمه‌رگه‌ و شه‌ڕڤان و گه‌ریلایه‌ی له‌ سه‌نگه‌ره‌کاندا خه‌بات ده‌که‌ن، تا پێشمه‌رگه‌یه‌ک شه‌ڕ بکات، تا گه‌ریلایه‌ک به‌ شاخه‌وه‌ بێت هونه‌رمه‌ندیش ده‌بێت بچێته‌ هۆڵی شانۆوه‌ و کاربکات، هه‌میشه‌ ده‌ڵێم بارودۆخ خراپ بێت و نه‌بێت ده‌بێت کوڕی رۆژه‌که‌ی خۆت بیت، بۆ پێشمه‌رگه‌ بێ هیچ موچه ‌و پشتگیرییه‌ک له‌سه‌نگه‌ردا به‌رامبه‌ر دوژمن وه‌ستاوه‌ته‌وه‌ بۆ تۆ ناتوانیت بچیته‌ ناو هۆڵێکه‌وه‌ سه‌رقاڵی کار و هونه‌ره‌که‌ت بیت، گرنگ ئه‌وه‌یه‌ هونه‌رمه‌ند کوڕی رۆژگاری خۆی بێت و بێ ئومێد نه‌بێ، ئه‌گه‌ر ئومێدیش له‌ناو ژیاندا دروست بێت، هونه‌ر ده‌بێت دروستی بکاته‌وه‌.

رۆژنیوز: ئه‌گه‌ر له‌کۆتایدا باسێکی کۆی کاره‌که‌ت بکه‌یت و ئه‌و ستافه‌ی له‌گه‌ڵتدا کارده‌که‌ن؟

-له‌م کاره‌دا به‌ سپۆنسه‌ری (ماڵی چالاک) و ئه‌پتاون جازو هۆتێل کۆپسۆرنا، له‌گه‌ڵ کۆمه‌ڵه‌ی هونه‌ره‌ جوانه‌کانی کورد که‌ له‌یه‌که‌م رۆژی پرۆڤه‌مانه‌وه‌ ئه‌م هۆڵه‌باشه‌ی خۆیانیان بۆ دابین کردوین، له‌گه‌ڵ سایتی وێستگه‌ و کۆمه‌ڵێک سپۆنسه‌ری تریش که‌ بڕیاریانداوه‌ بێنه‌ ناو کاره‌که‌وه‌‌، ستافه‌که‌شم کۆمه‌ڵێک گه‌نجی له‌خۆبوردون ئه‌مه‌ جگه‌ له‌ کۆمه‌ڵێک کۆمبارسی تر که‌ بڕیاره‌ بێنه‌ ناو کاره‌که‌وه‌.

ش.ف