سەربازێکی تورک داوای چوونە ناو یەپەگە پەیوەندیەکانی تورکیا و داعش ئاشکرا دەکات


ڕۆژنیوز - هیڤا هەبوون / ئۆزگیوور چایان

کاتێک لەسەر سنووری نێوان پرسوسی باکوور و کۆبانێی ڕۆژئاوای کوردستان سەرباز بوو (گیونەش فیدان) بەچاوی خۆی هاوکاریەکانی سوپای تورکی بۆ چەتەکانی داعشی بینیوە و ڕووداوەکانی وەک خۆی بۆ ڕۆژنیوز گێڕایەوە.

گوینەش فیدان لەبارەگای کاراجای سوپای تورک لەناوچەی سنووری پرسوس و کۆبانێ سەربازی تورکیا بووە، ئاشکرای دەکات کە تورکیا لەڕێی فەرمانداری لیوای پرسوس هاوکاری چەتەکانی داعشی کردووە و دەڵێت:" پێشئەوەی داعش هێرش بکاتە سەر کۆبانێ، فەرماندە سەربازیەکەمان پێیڕاگەیاندین کە شەڕێکی گەورە ڕوودەدات، دوو هەفتە پاش ئەوە داعش هێرشی کردە سەر کۆبانێ، لە بارەگاکەی ئێمە فەرماندەکانمان لەگەڵ داعش کۆدەبونەوە، ئەو کۆبونەوەیە بۆ ناردنی پێداویستی و چەک و تەقەمەنی بوو بۆ داعش، هەموو ئاسانکاریەک بۆ هاتووچۆی چەتەکان لەلایەن فەرماندە سەربازیە تورکەکانەوە دابینکرابوون، هەندێک سەرباز هەبوون ئەوەیان پێقبوڵ نەدەکرا، چەندکەسێک لەو سەربازانە باری دەرونیان تێکچوو و خۆیانکوشت من و 21 سەربازی تر هەڵهاتین و چووینەناو یەپەگە و بەشداری شەڕی کۆبانێمان کرد".

ڕۆژنیوز: کەی و لەکوێ ئێوە سەرباز بوون؟

لەساڵی 2014 لە یەکینەی 48 ی شاری تۆکات بوومە سەرباز، پاشان بۆ یەکینەی پسپۆڕ نێردرام بۆ بارەگای کاراجا لەسەر سنووری کۆبانێ و پرسووس.

ڕۆژنیوز: چۆن زانیتان شەڕ لە کۆبانێ ڕوودەدات؟

ڕۆژێکیان فەرماندەی بارەگاکەمان هات و کۆبونەوەی پێکردین وتی لەم ڕۆژانەدا شەڕێک ڕوودەدات دەبێت ئێوە زۆر هۆشیاربن.

ڕۆژنیوز: پێی نەوتن چۆن شەڕێک ڕوودەدات؟

نەخێر بەڵام لێمان پرسی ئەو شەڕە بۆچی ڕوودەدات ئەویش وتی هیچ زانیاریەکم لەوبارەیەوە نیە، دوای دووهەفتە داعش هێرشی کردە سەر کۆبانێ، پاش دەستپێکردنی شەڕی کۆبانێ فەرماندە سەربازیە تورکەکان لەناوخۆیاندا قسەیان دەکرد و دەیانگوت هیچ کەس ناتوانێت خۆی لەبەر داعش دا بگرێت لەماوەیەکی کەمدا کۆبانێ دەگرن.

ڕۆژنیوز: ئێوە بەچاوی خۆتان بینیتان چەتەکانی داعش لەسنورەکانەوە بپەڕنەوە؟

بەڵی من خۆم بینیم، شەوانە ئەوان هاتوچۆیان دەکرد.

ڕۆژنیوز: چۆن دەپەڕینەوە بە نهێنی یاخود بەئاشکرا؟

لەکاتی ئێشکگرتنی من و هەموو سەربازەکانی دیکەدا چەتەکان با ئاشکرا لەسنورەکانەوە هاتوچۆیان دەکرد، هاوکاری سوپای تورکیا بۆ چەتەکانی داعش لەو بارەگا و سنورانەی من لێی سەربازبووم بە ئاشکرا پێکدەهات، بەچاوی خۆم بینیم فەرماندەی بارەگای کاراجا کە من تێیدا سەربازبووم بەناوی (مستەفا یامان) لە ژوورە تایبەتەکەی خۆیدا لەگەڵ داعش کۆبونەوەی دەکرد، چەتەکان بەردەوام لە دانوستاندابوون لەگەڵ فەرماندە سەربازیەکانی تورکیا، بەجلوبەرگی مەدەنی هاتوچۆیان دەکرد، بارەگای سنوری کۆبانێ و پرسوس پێنج ڕێگەی هەیە، لەهەریەکێیاندا سێ سەرباز بەردەوام ئێشکدەگرن، بەڵام هەندێک جار لەکاتی دەبازبوونی چەتەکانی داعش دا لەو خاڵانە ئێشک نەدەگیران، ئەو شەوانەش ژمارەیەکی زۆر چەتە لەسنوورەکانەوە دەپەڕینەوە، ئەو هاتوچۆیە لەژێر چاودێری و بەفەرمانی مستەفا یامان و فەرماندەیەکی دیکە بەناوی هاکان بوو کە پاشناوەکەیم لە بیرنیە.

ڕۆژنیوز: ته‌نیا چه‌ته‌کانی داعش له‌و سنوره‌وه‌ هاتووچۆیان ده‌کرد، یاکەسی جیاوازتری تێدابوو؟.

ته‌نیا چه‌ته‌ نه‌بوون ئه‌و هاوکارییە سه‌ربازییانه‌ی که‌ باسیان دەکرد بەئاشکرا‌ بۆ داعش ده‌چێت، به‌ به‌رچاوی ئێمه‌وه‌ ده‌چوون، له‌ناو ئه‌و هاوکارییانه‌دا چه‌کی گران و سوک، هه‌روه‌ها پێداویستی لۆجستیکی تێدابوو.

ڕۆژنیوز: جبه‌خانه‌ و پێداویستییه‌کان چۆن ده‌رباز ده‌کران؟.

چه‌ک و پێداویستییه‌کان بۆ داعش ده‌هاتن، له‌رێگای فه‌رمانده‌یی پرسوسه‌وه‌ به‌ ئۆتۆمبێلی سه‌ربازی بارده‌کران.

(فه‌رمانده‌ی باره‌گان خۆی چه‌کی راده‌ست ده‌کردن)

ئه‌و چه‌ک و پێداویستییه‌ لۆجستیکیانه‌ چۆن دەنێردران؟.

چه‌ک و هاوکارییه‌ لۆجستیکیه‌کان یه‌کسه‌ر له‌ لایه‌ن فه‌رمانده‌کانی باره‌گاوه‌ راده‌ستده‌کران، موسته‌فا یامان و هاکان ده‌ربازی ناوچه‌کانی تری سنوری داعش ده‌بوون، خۆیان چه‌ک و پێداوستییه‌کانیان راده‌ستی داعش ده‌کرد و ئه‌و ئۆتۆمبێلانه‌ی ده‌یانبردن به‌تاڵیان ده‌کردن و ده‌گه‌ڕانه‌وه‌، چه‌که‌کان له‌ باره‌گایه‌کی گوندێکی چۆڵکراوی سنوری کۆبانێوه‌ راده‌ستی داعش ده‌کران، بۆئه‌وه‌ی ئه‌و چه‌کانه‌ له‌ کۆبانێ به‌کاربێن، بۆیه‌ له‌وێوه پێیان دەدرا.

ڕۆژنیوز: ئێوه‌ چه‌ند جار هاتووچۆی داعشتان بینی؟.

دوو جار که‌ من ئێشکگربووم داعشەکانم دەبینی که‌ تێده‌په‌ڕین، هه‌موو ئەو سه‌ربازانەی له‌ باره‌گاکە بوون بینه‌ری هاتووچۆی چه‌ته‌کانی داعش بوون، من به‌چاوی جارێک 13 و جارێکی تر 10 چه‌ته‌م بینی پەڕینەوە ڕۆژئاوا، ئەوانەش زیاتر هاوڵاتی عه‌ره‌ب و وڵاتانی رۆژئاوابوون، سه‌ربازی تریش که‌ تێپه‌ڕینی چه‌ته‌کانی داعشیان بینیوه‌، له‌ قسه‌کانیاندا لەگەڵ سه‌ربازه‌ هاوڕێکانیان دەیانگێڕایەوە که‌ له‌ سه‌ره‌ی ئێشکگری ئه‌واندا چه‌ته‌ی داعش تێده‌په‌ڕن.

(من و 21 سه‌ربازی دیکە هەڵهاتین)

سه‌ربازه‌کان ناره‌زاییان له‌به‌رامبه‌ر چه‌ته‌کاندا ده‌رنه‌ده‌بری؟ یاخود چۆن بوون؟.

سەربازه‌کان ناڕه‌زاییان ده‌رده‌بڕی له‌به‌رامبه‌ر هاتوووچۆی چه‌ته‌کان له‌و سنوره‌وه‌، هه‌ندێک سه‌رباز نه‌یانده‌توانی خۆیان له‌به‌رامبه‌ر مه‌رگه‌ساته‌کانی کۆبانێ رابگرن، یان له‌ڕووی ده‌روونیه‌وه‌ تێکده‌چوون، ئه‌و سه‌ربازانه‌شی که‌ ئه‌وه‌یان قبوڵ نه‌کرد، شوێنه‌کانیان ده‌گۆڕدرا سه‌ربازێک نه‌یتوانی ئه‌و دۆخه‌ قبوڵ بکات خۆی کوشت، ئه‌و حاڵه‌ته‌ له‌ راگه‌یا‌ندنه‌کاندا وه‌ک رووداوێک باسکرا، یان ناره‌زاییه‌کان له‌به‌رامبه‌ر چه‌ته‌کان خۆیاندا ده‌رده‌بڕا، چه‌ته‌کان چه‌قۆیان ده‌رده‌هێنا و ده‌یانوت، سه‌رت لێئه‌که‌ینه‌وه‌ و هه‌ڕه‌شه‌یان لێده‌کردن، یه‌کێکیش له‌وانه‌ی که‌ هه‌ڕه‌شه‌یان لێکراوه‌ من بووم، له‌کاتی ئه‌و موناقشانه‌دا له‌گه‌ڵ چه‌ته‌کان، موسته‌فا یامانی فه‌رمانده‌ی باره‌گاکه‌ ده‌که‌وته‌نێوانمان، له جیاتی چه‌ته‌کان بێڕێزی بە ئێمه‌ی سه‌ربازی دەکرد، هه‌تا وەک داعشەکان هه‌ڕه‌شه‌ی کوشتنی ده‌کرد، له‌به‌ر ئه‌وه‌ی من نه‌مده‌توانی هاوکاری داعش و ده‌وڵه‌تی تورک قبوڵ بکه‌م، دوو جار به‌ ته‌نیا هه‌وڵی هەڵهاتنمدا و هه‌ردوو جاره‌که‌ ده‌سگیرکرام، دوا جار من و یوسف و محه‌مه‌د، هه‌رسێکمان‌ پلانمان دانا که‌ به‌ره‌و کۆبانێ هەڵبێین، هه‌ر بۆیه‌ بۆ هه‌لێک ده‌گه‌ڕاین، شه‌وێک له‌گه‌ڵ خه‌ڵکی کۆبانێ که‌ ده‌یانویست بگەڕێنەوە، ته‌لی سنوره‌که‌مان بڕی و له‌گه‌ڵ 21 سه‌ربازی دیکە هەڵهاتین و چووینه‌ کۆبانێ.

ڕۆژنیوز: کاتێک ئێوه‌ چوونه‌ کۆبانێ شه‌رڤانان چۆن پێشوازیان لێکردن؟.

یه‌که‌مجار شه‌ڕڤانانی یه‌په‌ژه‌ پێشوازیان لێکردین، پاشان شه‌ڕڤانانی یه‌په‌گه‌ ئێمه‌یان برده‌ لای خۆیان و فه‌رمانده‌کانی یه‌په‌گه‌ له‌گه‌ڵمان کۆبووه‌وه‌، لێیان پرسین که‌ بۆچی و به‌ چ ئامانجیک هاتوونه‌ته‌ ئێره‌، ئێمه‌ش به‌وانمان وت که‌ هاتووین له‌ دژی هۆڤێتی داعش بجه‌نگین، ئێمه‌ پیشتر سه‌ربازیمان کردبوو بۆیه‌ په‌روه‌رده‌ی سه‌ربازیان نه‌کردین، یه‌که‌ینه‌یان بۆ دیارکردین و به‌و شێوه‌یه‌ به‌شداری شه‌ڕی کۆبانێ بووین.

ڕۆژنیوز: ئێوه‌ چه‌ند ‌له‌ کۆبانێ مانه‌وه‌ و به‌شداری شه‌ڕەکانتان کرد؟.

من سێ مانگ له‌ شه‌ڕی کۆبانێ مامه‌وه‌ برینداربووم، له‌لایه‌ن فه‌رمانده‌یی یه‌په‌گه‌وه‌ نێردرام بۆ نه‌خۆشخانه‌ی پرسوس بۆ چاره‌سه‌رکردن، برینه‌که‌م سه‌خت بوو کاتێک له‌ نه‌خۆشخانه‌ فه‌رمانده‌ هاکان بینیمی، هه‌واڵی دا به‌ مسته‌فا یامان، فه‌رمانده‌ی باره‌گا، یامانیش هه‌واڵی دا به‌ لیوا هاتنه‌ نه‌خۆشخانه‌، پرسیاری لێکردم بۆچی چوویته‌ کۆبانێ، وتیشی که‌ پاش چاره‌سه‌رکردن ده‌سگیرت ده‌که‌ین، منیش وتم ئه‌گه‌ر ئێوه‌ ده‌سگیرم که‌ن، ئه‌وا تێکه‌ڵی ئێوه‌ و داعش ئاشکرا دەکەم، دواتر نه‌رمیان به‌رامبه‌رم نواند و وتیان، کاتێک تۆ باش بوویت ده‌توانیت بێیت به‌ڵگه‌ و ناسنامه‌که‌ت وه‌ربگریته‌وه‌، دوای ئه‌وه‌ی کۆبانێ ئازادبوو، دوو سه‌رباز که‌ گه‌ڕانه‌وه‌ له‌ سنور له‌گەڵ ئه‌وه‌ی ناوی خۆیان وتبوو، له‌لایه‌ن سه‌ربازه‌کانه‌وه‌ کوژرابوون، بۆیه‌ من ئه‌وه‌م ده‌زانی و باوه‌ڕم به‌ قسه‌کانی فه‌رمانده‌ی باره‌گاکە نه‌کرد، بۆیه‌ نه‌چووم دواتر هەڵهاتم بۆ باشوری کوردستان، ئیستاش له‌ باشور ده‌ژیم.

س.خ / ش.ف