موسلم: ئه‌و باوکه‌ی ‌بیه‌وێت کوڕه‌که‌ی له‌خۆی داببڕێت خۆشی بوونی نابێت


رۆژنیوز ـ سلێمانی

هاوسه‌رۆکی پارتی یه‌کێتی دیموکراتیک ساڵح موسلم بابه‌ته‌کانی سه‌رله‌نوێ دامه‌زراندنه‌وه‌ی سوریا و پێگه‌ی رۆژئاوای کوردستان له‌سیسته‌می فدرالیزمی دیموکراتیکدا، دانوستانه‌کانی جنیڤ، هێرشی تورکیا له‌به‌رامبه‌ر به‌رۆژئاوای کوردستان و هه‌ندێ بابه‌تی تری بۆ ئاژانسەکەمان رۆژنیوز باس کرد.

هاوسه‌رۆکی په‌یه‌ده‌ لە وه‌ڵامی بانگه‌شه‌کانی نیشاندانی په‌یه‌ده‌ و یه‌په‌گه‌ وه‌کو تاوانبار له‌لایه‌ن تورکیاوه‌ وتی: تورکیا له‌ناو پیلانێکدایه‌، به‌بێ کوردان هیچ پرۆژه‌یه‌ک سه‌رکه‌وتن به‌ده‌ست ناهێنێت، ئێمه‌ سیسته‌ێکمان ده‌وێت که‌ هه‌رکه‌س له‌ئامێز بگرێت و شوێنی هه‌رکه‌سی تێدابێتەوە.

(ئه‌وه‌ی بۆ ئێمه‌ گرنگه‌ سیسته‌مێکه‌ هه‌ر که‌س خۆی تێداببینێت)

له‌م چه‌ند ڕۆژەی دواییدا گفتوگۆ له‌سه‌ر گۆڕینی سیسته‌م له‌سوریا ده‌کرێت به‌تایبه‌تیشی فیدالیزمی دیموکراتیک له‌سوریا، ئێوه‌ کام سیسته‌متان پێ باشه‌؟

موسلم: پاش ئه‌وه‌ی شۆڕش لەسوریا ده‌ستیپێکرد تا ئێستا گۆڕانکاری و داوای دیموکراسیبوون هه‌بووه‌، هه‌رچه‌نده‌ پێنج ساڵه‌ ده‌ربازده‌بێت زۆر شت ئاشکرا بوو، ئه‌و شۆڕشه‌ی تا ئێستاکه‌ به‌رێوه‌ ده‌چێت سه‌رکه‌وتنێک بوو بۆ ئێمه‌، ئه‌زمونێک که‌ له‌سوریادا به‌جدی شوێنی خۆی گرت، ئه‌زموونی ئێمه‌ بوو، هه‌م وه‌کو پرۆژه‌ و هه‌میش وه‌کو پێکهێنانی پرۆژه‌که‌ ئێمه‌ به‌کرده‌ییمان کرد، بۆ پاراستنی به‌رژه‌وه‌ندی گه‌ل، رێکخستن کردنی گه‌ل، ‌بێگۆمان سیسته‌مێکی سه‌ره‌نج راکێش بوو له‌ناو شۆڕشی سوریادا، گۆڕانکاریه‌کی پێشکه‌وتوو بوو، زۆرلایه‌نی تریش له‌ناو شه‌ڕدا له‌شوێنی گۆڕانکاریه‌کی ده‌سه‌ڵاتداریه‌تیدا بوون، ده‌یانویست ده‌سه‌ڵات چۆڵی بکات شوێنی ئه‌وان بگرنه‌وه‌، به‌ڵام هیچ پرۆژه‌یه‌کیان بۆ سوریا نه‌بوو، ئه‌مڕۆکه‌ش ئاشکرابوو ئه‌و ئه‌زمونه‌ی کوردان پێشیان خستووه‌ باشترین ئه‌زمونی سه‌رکه‌وتوو بووه‌، ئه‌وه‌ش به‌واتای ئه‌وه‌یه‌ که‌ ده‌توانین ئه‌و پرۆژه‌یه‌ پێشبخه‌ین و بیکه‌ینه‌ پرۆژه‌یه‌ک بۆ هه‌موو سوریا، هه‌موو که‌سێک خۆی له‌ ناو ئه‌و پرۆژه‌یه‌دا ببینێت و سیسته‌مێکی وه‌ها ده‌خوازین، له‌مانگی ته‌مموزی 2012 له‌و هه‌رێمە ڕزگارکراوەکانی کوردان زۆر ئه‌زمون به‌ده‌ستخراوه‌، پاش ساڵێک خۆبه‌رێوه‌به‌ری دیموکراتیک دامه‌زرا، رۆژبه‌رۆژ پێش ده‌که‌وین به‌تایبه‌تی له‌و هێرشانه‌ی ئه‌م دوایه‌دا و به‌شداربوونی به‌رفراوان و گۆڕانکاریه‌کان له‌ئاستی جیهاندا، مرۆڤ ده‌بینێت که‌ دەبێت ئه‌و پرۆژه‌یه‌ پێش بخرێت، هه‌ر که‌س شتێک ده‌ڵێت، به‌ڵام ئه‌وه‌ی بۆ ئێمه‌ گرنگه‌ ئه‌وه‌یه‌ که‌ سیسته‌مێک دامه‌زرێت هه‌ر که‌س خۆی تێدا ببینێت و گوزارشت له‌هه‌ر که‌سێک بکات.

دوو سێ رۆژ پێش ئێستا کانتۆنه‌کان داوایان له‌پێکهاته‌کانی تر کرد له‌ده‌وری یه‌ک کۆببنه‌وه‌، کاتێک ئێمه‌ ده‌ڵێن فدرالیزم ده‌بێت له‌وانی پێشتر جیاوازتربێت، هه‌ر که‌س نوێنه‌رایه‌تی خۆی تێدا بکات، هه‌ندێک ده‌ڵێن ئه‌وه‌ش جیابونەوەیە، هه‌ندێکیش به‌هزرێکی زۆر ته‌نگ هه‌ڵسوکه‌وت ده‌که‌ن، به‌ڵام خه‌ڵکێکیش هه‌یه‌ که‌ وه‌کو ئێمه‌ بیرده‌که‌نه‌وه‌، ئه‌وه‌ش به‌گشتی به‌پێچه‌وانه‌ی پارچه‌بوونه‌ بۆ یه‌کپارچه‌یی و یه‌کێتی سوریایه‌، له‌به‌ر ئه‌و ئه‌زمونه‌ی ئێمه‌ هەمانە به‌پێویست بینرا به‌یه‌که‌وه‌ دانیشین، به‌یه‌که‌وه‌ بڕیار له‌سه‌ر پێکه‌وه‌ژیان بده‌ین، بێگۆمان ئه‌وانه‌ی دژ به‌مه‌ن هه‌ن و ده‌رکه‌ون، زۆر که‌س هه‌یه‌ که‌ به‌رژه‌وه‌ندی خۆیانی تێدا نابینن، هاوکات ده‌بێت هه‌موو پێکهاته‌کان، یاسا، گۆڕانکاری کۆمه‌ڵایه‌تی و ژن له‌نێو ئه‌م پرۆژه‌یه‌دا جێ خۆیان بگرن.

(ئێمه‌ بڕیار دەده‌ین که‌ داخۆ کانتۆن هه‌بێت یان نا)

ئه‌و پرۆژه‌یەی که‌ بۆ فیدراڵیزمی دیموکراتیک پێشبکه‌وێت ده‌ستنیشانی دەکات که‌ ره‌وشی کانتۆنه‌کان چۆن دەبێت؟

موسلم: ئێمه‌ ده‌ڵێن کانتۆنه‌کان خۆیان ئه‌و بانگه‌وازیه‌یان کردوه‌، شتێکی باشتر له‌کانتۆنه‌کان هه‌بێت ئه‌و کاته‌ کانتۆنه‌کان دەگۆڕدرێن و هه‌ڵگیردرێن، یان ئه‌وه‌ی که‌ له‌نێو ئه‌و فدرالیزمه‌دا جێگای خۆیان دەگرن، به‌ڵام شتێک که‌ هه‌ری باشه‌ ئه‌وه‌یه‌ به‌رپرسانی کانتۆنه‌کان ئه‌مڕۆ خۆیان ئه‌و بانگه‌وازیه‌ ده‌که‌ن و که‌سێک له‌ده‌ره‌وه‌ گۆشاری نه‌خستوه‌ته‌ سه‌ریان، خۆیان ده‌ڵێن وه‌رن با به‌یه‌که‌وه‌ گفتوگۆ بکه‌ین که‌ ئێمه‌ چی بکه‌ین باشتره‌، به‌یه‌که‌وه‌ کۆببینه‌وه‌ و بڕیارێکی هاوبه‌ش بده‌ین و من له‌و باوه‌ڕه‌دام که‌ سه‌رکه‌وتوو ده‌بێت.

(بڕیاری پێکه‌وه‌ژیانی هاوبه‌ش گه‌لان دەدرێت)

سنوری ئه‌و فدرالیزمه‌ چۆن ده‌ستنیشان دەکرێت، وه‌کو جۆگرافیایه‌ک دیارببێت یان گروپه‌ ئه‌تنیکیه‌کان له‌نێو ئه‌و فدرالیزمه‌دا چۆن جێگای خۆیان دەگرن؟

موسلم: ئێستا ئه‌و پرۆژه‌یه‌ی هه‌یه‌ ده‌توانرێت وه‌کو ئیشێکی سه‌ره‌کی ده‌ستنیشان بکرێت، هه‌ندێ پێکهاته‌ هه‌یه‌ که‌ ده‌بێت به‌یه‌که‌وه‌ بژین، ئه‌وه‌ فدرالیزمێکی جۆگرافی نیه‌ و بۆ ده‌ستنیشانکردنی سنور نیە، هه‌رچه‌نده‌ کۆبانێ و گردەسپی رزگاریش بوون، ئه‌نجومه‌کانیان هاتنه‌ لاییه‌کتر و ویستیان ببنه‌ یه‌ک، به‌ڵێ هه‌رکام بۆ خۆشی ئه‌نجومه‌نی تایبه‌تی خۆی هه‌یه‌، خۆیان بڕیاریان دا، به‌یه‌که‌وه‌ دانوستاندن ده‌که‌ن، ئێمه‌ ئێستا که‌ باس له‌هه‌ندێ شوێنی تریش ده‌که‌ین، کاتێک ئه‌وه‌ دروست ببێت ئه‌وا هه‌ندێ شوێنی تریش ئیمکانی هه‌یه‌ و ده‌بێت، ئێمه‌ باس له‌ره‌قا و مه‌نبج ده‌که‌ین، ئه‌وانه‌ سبه‌ینێ دوو سبه‌ینێ رزگاربوون ئه‌و پێکهاتانه‌ی ئه‌وێ بڕیاریان به‌ده‌ست خۆیان ده‌بێت، کاتێک ئه‌وان به‌شدارببن یاخود نا.

تا ئێستا له‌لایه‌ن ده‌ره‌وه‌ و ناوخۆی سوریاوه‌ هیچ پشتگیریه‌ک بۆ ئەو پرۆژه‌یه‌‌ دروست بووه‌؟

موسلم: ئێستا هێزی ئه‌و پرۆژه‌یه‌ ئه‌وه‌یه‌ که‌ که‌سێکی تر خاوه‌ن ئه‌و پرۆژه‌یەنیه‌، له‌و باوه‌ڕه‌دام هه‌ر که‌سێک بیه‌وێت چاره‌سه‌ری له‌سوریا پێکبێت پشتگیری پرۆژه‌که‌مان دەکات، ئه‌گه‌ر که‌سێک نه‌یه‌وێت سوریایه‌کی دیموکراتیک دابمه‌زرێت، ئه‌وا دژایه‌تی خۆی راده‌گه‌یه‌نێت، ئێمه‌ بۆ هه‌موو لایه‌کمان شرۆڤه‌ کردوه‌، به‌ڵام هاوکاریمان له‌که‌س نه‌ویست هاوکاریمان پێویسته‌ باوه‌ڕمان به‌چه‌ند که‌سێک کرد و بینیمان ده‌توانرێت له‌گه‌ڵیان بژین.

هه‌ندێ پێکهاته‌ی تر له‌سوریا بوونیان هه‌یه‌، چۆنی به‌باش ده‌زانن له‌ژێر چه‌تری سیسته‌مێکی فدراڵدا بژن، ده‌توانن فدراڵی خۆیان دامه‌زرێنن، خۆبه‌رێوه‌به‌ری خۆیان دامه‌زرێنن، واتا هه‌موو له‌ناو سیسته‌مێکی فیدراڵیدا ده‌توانن به‌یه‌که‌وه‌ دانوستان بکه‌ن.

وه‌کو په‌یه‌ده‌ ئێوه‌ له‌دژی پارچه‌بوونی سوریان؟

موسلم: ئێمه‌ بوونی خۆمان له‌سوریایه‌کی لامه‌رکه‌زیدا ده‌بینین، ئه‌و پرۆژه‌یه‌ی ئێمه‌ش بۆ هه‌موو سوریایه‌ و سوریاش به‌هێزتر دەکات، مرۆڤەکان زیاتر ئازادده‌بن، هه‌ر که‌س بۆ پاراستنی وڵاتی خۆی، بڕیاری خۆی دەدات و بۆ خۆشی خه‌بات و تێکۆشان دەکات.

(ئێستا ئه‌وه‌ی له‌سوریا هۆشیاره‌ و خاوه‌ن پرۆژه‌یه‌ کورده‌)

به‌گوێره‌ی ئێوه‌ بەنه‌بوونی کوردان له‌جنیڤدا، دانوستانی جنیڤ به‌کوێ دەگات؟

موسلم: له‌سوریادا راستیه‌ک هه‌یه‌، هێزی چالاک و خاوه‌ن بڕیار هه‌یه‌، زۆر هۆشیاره‌، کاتێک تۆ ئه‌و هێزه‌ت له‌سوریا ده‌رخست، ئه‌و کاته‌ سوریا رێگای خۆی هه‌ڵه‌ دەکات، تا ئه‌و کاته‌ی سیسته‌مه‌ی به‌عس هه‌بوو، خه‌ڵکی ناهۆشیار و بێئیراده‌ کردبوو، بۆ ئه‌وه‌ش کێ له‌کوێوه‌ ده‌هات، گۆشاری ده‌خسته‌ سه‌ری، واتا هه‌ندێ که‌س له‌سوریا هه‌بوون که‌ به‌چه‌مک و هزری دوو هه‌زار ساڵ بیریان ده‌کرده‌وه‌، ئێستا ئه‌وه‌ی له‌سوریا هۆشیار بووه‌ته‌وه‌ کورده‌، خاوه‌ن پرۆژه‌ن و ده‌توانن خۆیان بپارێزن، کاتێک تۆ کوردت دورخسته‌وه‌ و مۆخاته‌بت نه‌گرت، ئه‌وه‌ به‌واتای ئه‌وه‌یه‌ که‌ تۆ ناته‌وێت چاره‌سه‌ری پێش بکه‌وێت. کاتێک تۆ کوردانت له‌ده‌ره‌وه‌ هێشته‌وه‌، ئه‌و کاته‌ تۆ ناته‌وێت چاره‌سه‌ری سیاسی بۆ سوریا پێکبێت. ئه‌وه‌ کێ ده‌بێت هه‌ر هه‌مان شته‌، کوردان به‌بوونی پرۆژه‌ی ئاکتیڤبوونی خۆیان ده‌توانن کێشه‌کانی سوریا چاره‌سه‌ر بکه‌ن، ئه‌مڕۆ کوردان له‌پرۆژه‌ی دیموکراتیکبوونی سوریا پێشه‌نگایه‌تی ده‌کات. کاتێک تۆ هێزێکی وه‌ها به‌کاریگه‌ری و ئاکتیڤت دوورخسته‌وه‌، ئه‌وه‌ به‌واتای ئه‌وه‌یه‌ که‌ تۆ ناته‌وێت چاره‌سه‌ری بۆ سوریا پێکبێت. له‌به‌ر ئه‌وه‌ش هه‌ر هه‌وڵ و کۆششێک که‌ کوردی تێدا به‌شدارنه‌بێت، سه‌رکه‌وتن به‌ده‌ست ناهێنێت.

ئه‌وانه‌ ده‌بنه‌ ئاسته‌نگ له‌به‌رده‌م به‌شدرابونی په‌یه‌ده‌ و مه‌سه‌ده‌ی به‌گشتی له‌دانوستانه‌کانی جنیڤدا؟

موسلم: هه‌موو ئه‌و هێزانه‌ی که‌ بابه‌ته‌که‌ ئیداره‌ ده‌که‌ن له‌وانه‌ روسیا، ویلایه‌ته‌یه‌کگرتووه‌کانی ئه‌مریکا و نه‌ته‌وه‌ی یه‌کگرتووه‌کان له‌گه‌ڵ ئه‌وه‌دان کورد به‌شداری بکات، رای زۆرینه‌ی ئه‌وان له‌گه‌ڵ رای ئێمه‌یه‌. ده‌ڵێن ده‌بێت کورد به‌شداربن و کورد چالاکن. ئه‌وانه‌ی که‌ چاره‌سه‌ری سوریایان ناوێت ئه‌و هێزه‌ رادیکاڵ و توندڕه‌وانه‌یان دامه‌زراند و کردنیان به‌بەڵا به‌سه‌ر هه‌موو گه‌لانی سوریاوه‌، ئه‌مڕۆکه‌ش ئه‌و هێزانه‌ چاره‌سه‌ریان ناوێت. وه‌ک تورکیا، سعودیە و قه‌ته‌ر و ...هتد. له‌به‌ر ئه‌وه‌ ئێمه‌ هیوادارین ئه‌وانیش چاو بەخۆیاندا بخشێننەوە، ئه‌و نه‌خۆشی و نه‌هامه‌تیانه‌ی به‌سه‌ر سوریادا دێت رووبه‌رووی ئه‌وانیش ده‌بێته‌وه‌. ئه‌گه‌ر چاره‌سه‌ریه‌کی سیاسی دروست نه‌بێت ئه‌وا ئه‌وانیش دەکه‌ونه‌ نێو ئه‌و ئاڵۆزیانه‌وه‌. ئه‌و کاته‌ عه‌ره‌بستان و قه‌ته‌ر و ئه‌وانیش تریش له‌ناو دەچن. له‌به‌ر ئه‌وه‌ش ئێمه‌ هیوادارین دوژمنایه‌تی خۆیان که‌م بکه‌ن‌.

پاش راگه‌یاندنی ئاگربه‌ست دیسانه‌وه‌ هێرش پێکدێت، هێزه‌کانی گرێدراو به‌ئۆپۆزسیۆن هێرشی هێزه‌کانی کورد و قه‌سه‌ده‌ ده‌که‌ن، به‌گوێره‌ی ئێوه‌ ئاگربه‌ست له‌چی‌ ئاستێکدایه‌؟ بۆ ئه‌وه‌ی ئه‌و ئاگربه‌سته‌ له‌ئاستی نێوده‌وڵه‌تیدا پشتگیری بکرێت هه‌وڵدانی ئێوه‌ چیه‌ ؟

موسلم: به‌ڵێ رۆژانه‌ی ئه‌و هێرشانه‌ی له‌شێخ مه‌قسود و چه‌ند ‌هه‌رێمی تر شه‌ڕ رووده‌دا ئێمه‌ بۆ رای گشتی رایده‌گه‌ینین، کۆمیته‌یه‌کی ئاگربه‌ست هه‌یه‌، ئه‌و کۆمیته‌ی له‌هەفته‌یه‌کدا دوو جار کۆده‌بنه‌وه‌، رۆژانه‌ ئه‌و شتانه‌ی رووده‌ده‌ن راپۆرت ده‌کرێت بۆ ئه‌و کۆمیته‌یه‌، له‌وێدا ناکۆکیه‌ک هه‌یه‌، ئه‌و هێزانه‌ی له‌حه‌له‌ب په‌لامار و هێرشی ئێمه‌ ده‌که‌ن و ئه‌وانه‌ی تا ئێستاش هیچ شه‌رێکیان نه‌کردوه‌ به‌ڵێنیاندا که‌ له‌نێو ئاگربه‌ستدا جێگای خۆیان بگرن. به‌ره‌ی نوسره‌ و داعش ئاگربه‌سته‌که‌ بن پێ ده‌که‌ن. ئه‌و ئاگربه‌سته‌ش وه‌کو ئه‌وه‌ی نه‌ته‌وه‌یه‌کگرتووه‌کانیانیش هه‌وڵیانده‌دا و ده‌یانویست پێکنه‌هات. جێگای ئه‌وان دیاره‌، به‌ڵام لێیان ناده‌ن، ئێمه‌ پێیان ده‌ڵێن که‌ له‌وێدا په‌لامار و هێرشی ئێمه‌ ده‌ده‌ن، ئه‌گه‌ر مه‌به‌ستیان نه‌بێت شتێکیش ناکه‌ن، به‌گشتی ئێمه‌ هه‌موو شتێکیان پێراده‌گه‌ینین، پێش ئاگربه‌ست ئێمه‌ به‌وانمان وتبوو وتمان؛ ئێمه‌ به‌یه‌که‌وه‌ دانیشین و له‌سه‌ر ئاگربه‌ست گفتوگۆ دەکه‌ین و به‌و شێوه‌یه‌ ئاگربه‌ست رابگه‌یەنرین، هه‌ستان ئه‌و ده‌وڵه‌تانه‌ بڕیاریاندا که‌ هیچ هێزێکیان له‌سه‌ر ئه‌رزی واقیع نیه‌ که‌ به‌دواداچوونی ئاگربه‌سته‌که‌ بکات و ئێستاکه‌ش ته‌نیا به‌گوێره‌ی راپۆرته‌کان به‌رێوه‌ ده‌چێت. ئێمه‌ش ئه‌و راپۆرتانه‌ راده‌ستیان ده‌که‌ین، دەمانزانی ئه‌و هێزانه‌ی هێرشمان ده‌که‌ن، هیچ رێز و حۆرمه‌تێکیان بۆ ئاگربه‌ست نیه‌.

له‌م دوایانه‌دا هێرشی تورک پێکهات و هێشتاش هێرشه‌کان به‌رده‌وامن، ئێوه‌ بۆ راوه‌ستاندنی ئه‌و هێرشانه‌ سه‌ردانی نه‌ته‌وه‌یه‌کگرتووه‌کان یان هیچ هێزێکی ترتان کردوه‌؟

موسلم: به‌ڵێ هه‌موویان ئاگادار ده‌که‌ینه‌وه‌، ئه‌و شتانه‌ی له‌سه‌رسنور پێکدێن هه‌موویان چاودێری ده‌که‌ن و له‌گه‌ڵ ئه‌وان قسه‌ده‌که‌ین وئاگاداریان ده‌که‌ینه‌وه‌، تا ئێستا هه‌ڵوێستی باشیان له‌و روه‌وه‌ نه‌بووه‌، به‌ڵام له‌گه‌ڵ ئه‌وه‌ش هه‌ڵوێستیان هه‌بووه‌، هه‌ره‌ دوایی دوێنێ وه‌زیری ده‌ره‌وه‌ی روسیا رایگه‌یاند که‌ تورکیا سنوری ده‌ربازکردوه‌، ده‌یانه‌وێت هه‌ندێ شت بگۆڕدرێت. ‌بێگۆمان ئه‌و کرده‌وانه‌ هیچ که‌سێک قه‌بوڵی ناکات. بۆ ئه‌وه‌ی ئاگربه‌ست خراپ نه‌بێت خۆمانمان بێده‌نگ کردوه‌ تا نه‌ڵێن له‌لایه‌ن هه‌ر دوولاوه‌ ئاگربه‌سته‌که‌ بنپێکراوه‌.

بۆچی ئه‌مریکا و دیمیستۆرا هه‌ڵوێستێکی تایبه‌ت نیشان ناده‌ن؟

موسلم: ئێمه‌ نازانین له‌نێوان ئه‌واندا چی ده‌گۆزه‌رێت، به‌ڵام ئه‌وه‌ی رووده‌دا مایه‌ی قه‌بوڵکردن نیه‌. پێویسته‌ له‌به‌رامبه‌ری راوه‌ستن.

(هیچ په‌یوه‌ندیه‌کی یه‌په‌گه‌ به‌ته‌قینه‌وه‌که‌ی ئه‌نقه‌ره‌وه‌ نیه‌)

له‌م دوایانه‌دا له‌ئه‌نقه‌ره‌ چه‌ند ته‌قینه‌وه‌ رووده‌ده‌ن، تورکیا هه‌وڵده‌دات ئه‌و ته‌قینه‌وانه‌ بخاته‌ ئه‌ستۆی یه‌په‌گه‌، بۆ چی ده‌وڵه‌تی تورک دژایه‌تیه‌کی وه‌ها ده‌کات؟

موسلم: ده‌مه‌وێت ئه‌وه‌ بڵێم، به‌راستی ئارامی تورکیا بۆمان گرنگه‌ و ده‌مانه‌وێـت له‌تورکیا ئارامی و ئاشتی به‌رقه‌رار بێت. ئێمه‌ ئه‌وه‌شمان پێیان وتووه‌. کاتێک به‌یه‌که‌وه‌ کۆبووینه‌وه‌ به‌شێوه‌یه‌کی ئاشکرا پێیانمان راگه‌یاند. بۆ ئارامی تورکیا چی له‌ده‌ستمان بێت ئێمه‌ ئاماده‌ین ئه‌نجامی بده‌ین، بۆ ئه‌وه‌ی ئاشتی پێکبێت. ئه‌گه‌ر ناوبژیوانیش پێویست بکات ئێمه‌ ئاماده‌ین ناوبژیوانیش بکه‌ین. ئاکه‌په‌ و ئه‌ردۆغان ئه‌و شته‌یان به‌گشتی قه‌بوڵ نه‌کردوه‌ و له‌بیانوو ده‌گه‌ڕێن. من له‌ماڵی خۆمدا دانیشم و خه‌ڵکی تاوانبار دەکه‌م ئەوە نابێت، ده‌توانم بڵێم ئه‌و ته‌قینه‌وه‌ی له‌ئه‌نکه‌ره‌ پێکهات و سی و حه‌وت که‌سی تێدا کوژران، ئه‌ردۆغان خۆی کردویه‌تی. ئاخۆ چی به‌ڵگه‌یه‌ک له‌ده‌ستدایه‌، به‌ڵگه‌ بوونی نیه‌. نیشاندانی یه‌په‌گه‌ وه‌کو بکه‌ره‌ی ته‌قینه‌کانی ئه‌نکه‌ره‌ش هه‌ر وه‌هایه‌. به‌و شێوه‌یه‌ش خۆی له‌رای گشتی و ناوخۆی تورکیا و راگه‌یاندنه‌کاندا به‌درۆ خسته‌وه‌. بۆ ئه‌م ته‌قینه‌وه‌ش به‌درۆ بخرێته‌وه‌، چونکه‌ هیچ په‌یوه‌ندیه‌کی ئێمه بەوه‌ به‌ته‌قینه‌وه‌ نیه‌ و لەپره‌نسیبی ئێمه‌ش به‌دووره‌، له‌شوێنی ئه‌وه‌ی که‌ ئێمه‌ بچینه‌ ئه‌نکه‌ره‌ و ته‌قینه‌وه‌ بکه‌ین، رۆژانه‌ ده‌بابه‌کانی ئه‌وان ئێمه‌ تۆپباران ده‌که‌ن و ئێمه‌ وه‌ڵامی ئه‌وان ناده‌ینه‌وه‌. من بۆچی بچم بۆ ئه‌نکه‌ره‌، پێویسته‌ ده‌ست له‌و پیلانانه‌ به‌رده‌ن، پێش ده‌یان ساڵ ئه‌و شتانه‌یان ئه‌نجامداوه‌ هه‌موو به‌ده‌ستی خۆیان پێکهاتووه‌، به‌رێگای میت و که‌سی تر ئه‌نجامیان داوه‌و هه‌وڵیانداوه‌ بیخه‌نه‌ ئه‌ستۆی که‌سی تر، با ده‌ست له‌و پیلانه‌ چه‌په‌ڵانه‌ به‌رده‌ن.

(ده‌یانه‌وێت ئێمه‌ بخه‌نه‌ خزمه‌تی ئه‌نه‌سه‌که‌ و لایه‌نه‌کانی تر به‌ڵام ناتوانن)

چه‌ند ساڵ پێش حکومه‌تی ئاکه‌په‌ بانگهێشتی ئێوه‌ی کرد بۆ تورکیا، ئێوه‌ش له‌گه‌ڵیان کۆبونەوە، بۆچی ئه‌و چاوپێکه‌وتنانه‌ به‌رده‌وام نه‌بوو؟ ئێستاکه‌ش په‌یه‌ده‌ و یه‌په‌گه‌ وه‌کو رێکخستنێکی تیرۆریستی به‌ناو ده‌که‌ن، بۆچی گه‌یشته‌ ئه‌م ئاسته‌؟

موسلم: تورکیا هه‌میشه‌ شتێک ده‌ڵێن و شتێکی تر ده‌که‌نه‌ بیانوو. ئه‌وه‌ی تورکیا پێکدی دێنێت ئه‌وه‌یه‌ که‌ گه‌لی کورد مافه‌کانی خۆی به‌ده‌ستنخات و نه‌گه‌هێننه‌ مافه‌کانیان. ده‌یانه‌وێت په‌یه‌ده‌ په‌ڵکێشی نێو رێبازه‌که‌ی خۆیان بکه‌ن و به‌کاریبهێنن، ئه‌وان وه‌ها بیرده‌که‌نه‌وه‌. ئه‌گه‌ریش پێکنه‌هات ئێمه‌ به‌پێچه‌وانه‌وه‌ به‌کاربهێنن، به‌ڵام شتێکیان ده‌ویست به‌ده‌ستیان نه‌هێنا. ده‌یانویست ئێمه‌ بخه‌نه‌ خزمه‌تی ئه‌نه‌سه‌ و لایه‌نه‌کانی تر، به‌ڵام نه‌یانتوانی. ئێمه‌ ئه‌وه‌مان نه‌کرد، ئێمه‌ وتمان ده‌بێت پێش هه‌ر شتێک هه‌بوونی خۆمان بپارێزین، به‌ڵام ئه‌وانیش ئه‌وه‌یان نه‌کرد. چونکه‌ ئێمه‌ نه‌که‌وتینه‌ ژێر فه‌رمان و خزمه‌تی ئه‌وان، بۆیه‌ ئێمه‌یان وه‌کو تیرۆریست به‌ناو کرد، ئێمه‌ وه‌کو دوژمن به‌ناوکرد و هه‌ڕه‌شه‌ی ده‌ستێوه‌ردانیان له‌ئێمه‌ کرد.

ئه‌گه‌ر وته‌یه‌ک ئێوه‌ له‌کۆتاییدا هه‌بێت فه‌رموون؟

بێگۆمان ئێمه‌ له‌قۆناخێکی مێژوویداین، تێکۆشانی سیاسیش وه‌کو تێکۆشانێک له‌سه‌ر زه‌مینی واقع به‌رێوه‌ ده‌چێت، گه‌له‌که‌مان باوه‌ڕیان به‌پێشه‌نگایه‌تی خۆیان هێناوه‌. له‌هه‌ر روویه‌که‌وه‌ ئێمه‌ مافێکی سروشتیمان هه‌یه‌ چی له‌جنیڤدا بێت و یان له‌هه‌ر شوێنێکی تر، ئێمه‌ ده‌مانه‌وێت وه‌کو مرۆڤ بژین و مافی دیموکراسی خۆمان به‌ده‌ستبهێنین. هیچ زۆڵمێکمان له‌که‌س نه‌کردوه‌. که‌سێکمان ئازار نه‌داوه‌، وڵاتی که‌سمان تاڵان نه‌کردوه‌. که‌سێمان له‌ماڵی خۆیدا نه‌کوشتووه‌، له‌به‌ر ئه‌وه‌ش هه‌م دۆزه‌که‌مان و هه‌م ئه‌و رێگایه‌ی پێێداده‌ڕوین ره‌وایه‌ و مرۆڤانه‌یه‌. له‌به‌ر ئه‌وه‌ش ئێمه‌ رۆژ له‌دوای رۆژ پێشده‌که‌وین. هیوادارین هه‌موو گه‌له‌که‌مان له‌گه‌ڵماندا بن، شتی باش بناسن، ئه‌و ئه‌رکه‌ی له‌سه‌ر ئه‌ستۆی ئێمه‌یه‌ له‌سه‌ر ئه‌وانیشه‌، ئه‌و ئه‌رکه‌ ته‌نیا ئه‌رکی سیاسه‌تمه‌داران نیه‌ و ئه‌رکی گه‌لیشه‌. له‌هه‌ر چوار به‌شی کوردستان هه‌یه‌ که‌ ده‌یانه‌وێت گه‌لی کورد له‌ناو ببات. ئێمه‌ ته‌نیا به‌یه‌کگرتوویی ده‌توانین له‌و مه‌ترسیه‌ رزگارمان ببێت، به‌ڵام ئه‌و قۆناخه‌ی تێدا ده‌رباز ده‌بین، بۆ گه‌له‌که‌مان زۆر دژواره‌. یا ئه‌وه‌تا ئێمه‌ خۆمان بۆ مێژوو بسه‌لمێنن یان ئه‌وه‌تا له‌ناو بچین. هیوادارم گه‌له‌که‌مان له‌هه‌ر کوێیه‌کی ئه‌م جیهانه‌دایه‌ له‌و به‌رپرسیاریه‌تیه‌دا بن. له‌و تێگه‌یشتنه‌دا بژین. دوژمن له‌نێو زۆر پیلاندایه‌ که‌ برا له‌دژی برا هانبدات، ئه‌و باوکه‌ی که‌ ده‌یه‌وێت کوڕه‌که‌ی له‌خۆی داببڕێت ده‌بێت ئه‌وه‌ بزانێت که‌ خۆشی بوونی نابێت، له‌و باوه‌ڕشدام که‌ سه‌رکه‌وتن هی ئێمه‌ ده‌بێت.

س.خ