هاوسەرۆکی پەیەدە: حکومەتەکانی عێراق و باشور بەرپرسن لە سەر مەخمور

هاوسەرۆکی پاتی یەکێتی دیموکراتی- پەیەدە، ڕایگەیاند: هەردوو حکومەتی عێراق و باشوری کوردستان بەرپرسن لەسەر هێرشی دەوڵەتی تورک بۆسەر کامپی مەخمور.


عایشە حسۆ، هاوسەرۆکی پاتی یەکێتی دیموکراتی- پەیەدە، لەگەڵ ئاژانسی هاوار چاوپێکەوتنێکی ئەنجامداوە، لەسەر هێرشی دەوڵەتی داگیرکەری تورک بۆسەر کامپی پەنابەرانی شەهید ڕۆستەم جودی لە مەخمور.

عایشە حسۆ، ڕایگەیاند: لەم دۆخەدا کە ڤایرۆسی کۆرۆنا بووەتە مەترسی لەسەر مرۆڤایەتی، دەوڵەتی تورک دڕندایەتی خۆی لەدژی کورد ئاشکرا دەکات و بە فڕۆکە هێرش دەکاتە سەر کامپی مەخمور، ئەمە شەرمەزارییە و ڕووڕەشییەکە بۆ هەموو وڵاتانی جیهان.

عایشە حسۆ، لە بەردەوامی قسەکانیدا، داوای لە دەسەڵاتدارانی پارتی دیموکراتی کوردستان - عێراق (پارتی) کرد کە گەمارۆی سەر کامپەکە هەڵگرن و لە بەرامبەر هێرشەکانی دەوڵەتی تورک بێدەنگ نەبن، ڕاشیگەیاند: نەتەوەیەکگرتووەکان و هێزە جیهانییەکان بەرپرسن لە هێرشەکانی دەوڵەی تورک بۆسەر کامپی مەخمور.

لە بەشێکی دیکەی قسەکانیدا، حسۆ، ڕایگەیاند: دەوڵەتی تورک لەجێی ئەوەی پێش لە بڵاوبوونەوەی ڤایرۆسی کۆرۆنا لە وڵاتەکەی بگرێت، هێرش دەکاتە سەر کوردەکان، دەوڵەتی تورک سەرقاڵبوونی جیهان بە ڕووبەڕووبوونەوەی کۆرۆناوە وەک هەل قۆستووەتەوە و هێرشەکانی بۆسەر باکور، ڕۆژئاوا و باشوری کوردستان بەردەوام دەکات، ئامانجیشی داگیرکارییە.

لە کۆتاییدا، هاوسەرۆکی پەیەدە داوای لە لایەنە پەیوەندیدارەکانی دۆسیەی سوریا و هەرێمی کوردستان کرد کە بەرامبەر هێرشەکانی دەوڵەتی تورک بێدەنگ نەمینن و ڕایگەیاند: پێویستە ڕێکخراوە نێودەوڵەتییەکان کە داوای ئاگربەستاین لە جیهان کردووە، هێرشەکانی دەوڵەتی تورک بوەستێنن، هەڵویستی عێراق تەواو نییە، حکومەتەکانی عێراق و هەرێمی کوردستان بەرپرسن لە هێرشەکانی دەوڵەتی تورک بۆسەر جوگرافیای باشور و عێراق، پێویستە عێراق ئاسمانی خۆی بەڕووی فڕینی فڕۆکەکانی تورکیا دابخات.

ک.س