کامه‌ران به‌روارى: سیسته‌مى کۆنفیدرالیزم ده‌توانێ کێشه‌کان چاره‌سه‌ر بکات


رۆژنیوز ــ ناوه‌ندى هه‌واڵه‌کان

دکتۆر کامه‌ران به‌روارى ئه‌ندامى کۆنگره‌ى نه‌ته‌وه‌یی کوردستان که‌نه‌که‌ رایده‌گه‌یه‌نێـت که‌ ئه‌گه‌ر سیسته‌مى ده‌وڵه‌ت ــ نه‌ته‌وه‌ ، سیسته‌مێکى سه‌رکه‌وتووبوایه‌ ، ئه‌وا سه‌ده‌ى رابردوو ئه‌نجامێکى باشى ده‌بوو. به‌پێچه‌وانه‌وه‌ ده‌بینین، له‌ سه‌ده‌ى رابردودا ، کوشتن ، ماڵوێرانى و خراپه‌کانى ده‌وڵه‌ت ته‌واو نه‌بووه‌ و ئاماژه‌ بۆ ئه‌وه‌شده‌کات که‌ هۆکارى ئه‌وه‌ى له‌باشوورى کوردستان تا ئێستا کورد نه‌یانتوانیوه‌ ببنه‌ کیانێکى باش، لاوازبوونى ده‌سه‌ڵاتى کوردییه‌. هه‌رله‌سه‌ره‌تاوه‌ هه‌وڵى نه‌داوه‌ بتوانێت ببێته‌ خاوه‌نى ده‌ستوور ، یاسا و پرۆژه‌یه‌کى باش بۆ ئه‌وه‌ى مافه‌کانى مرۆڤ و ئازادى کۆمه‌ڵگه‌ تیایدا بچه‌سپێت.

له‌چاوپێکه‌وتنێکى تایبه‌تى رۆژنیوزدا ، دکتۆر کامه‌ران به‌روارى باس له‌گرنگى سیسته‌مى کۆنفیدرالیزم ده‌کات بۆ چاره‌سه‌رى سه‌رجه‌م قه‌یرانه‌کانى رۆژهه‌ڵاتى ناوه‌راست و هه‌رچواربه‌شى کوردستان، هاوکات ئاماژه‌ به‌ نه‌بوونى ده‌ستوور و نایه‌کسانى له‌هه‌رێمى کوردستان ده‌کات ، کامه‌ران به‌روارى ده‌ڵێت:" ماوه‌ى 100 ساڵه‌ کێشه‌کانى رۆژهه‌ڵاتى ناوه‌راست به‌رده‌وام ده‌که‌ن و چاره‌سه‌ر نه‌کراون. هه‌ربۆیه‌ ده‌بینین سیسته‌مى ده‌وڵه‌ت ــ نه‌ته‌وه‌ش سه‌رکه‌نه‌که‌وت. چاره‌سه‌رکردنى سه‌رجه‌م کیشه‌کانى رۆژهه‌ڵاتى ناوه‌راست پێویستى به‌فکر و به‌رنامه‌ و فه‌لسه‌فه‌ى رێبه‌ر ئاپۆهه‌یه‌."

ده‌قى چاوپێکه‌وتنه‌که‌:

به‌بۆچوونى ئێوه‌ چاره‌سه‌رى بۆ ئالۆزیه‌کانى رۆژهه‌ڵاتى ناوه‌راست چۆن ده‌بێت و چۆن چاره‌سه‌ر ده‌بن؟

دواى هه‌ڵوه‌شانه‌وه‌ى ده‌وڵه‌تى عه‌باسى و دامه‌زراندنى ئیمپراتۆریه‌تى عوسمانى، نزیکه‌ى 600 ساڵ ده‌سه‌ڵاتداریان به‌رده‌وام کرد. دواى سایکس پیکۆ ، لۆزان و سیوه‌ره‌ک هه‌تا ساڵى 1923 ، سه‌فه‌وى و عوسمانى هه‌ڵوه‌شانه‌وه‌. ماوه‌ى 100 ساڵه‌ کێشه‌کانى رۆژهه‌ڵاتى ناوه‌راست به‌رده‌وام ده‌که‌ن و چاره‌سه‌ر نه‌کراون. هه‌ربۆیه‌ ده‌بینین سیسته‌مى ده‌وڵه‌ت ــ نه‌ته‌وه‌ش سه‌رکه‌نه‌که‌وت. چاره‌سه‌رکردنى سه‌رجه‌م کیشه‌کانى رۆژهه‌ڵاتى ناوه‌راست پێویستى به‌فکر و به‌رنامه‌ و فه‌لسه‌فه‌ى رێبه‌ر ئاپۆهه‌یه‌، چاره‌سه‌ر له‌ پرۆژه‌ دیموکراتییه‌کانیدایه‌ بۆ رۆژهه‌ڵاتى ناوه‌راست. ئۆجالان پێشنیارى کرد که‌ ده‌بێت له‌رۆژهه‌ڵاتى ناوه‌راست هه‌موو سنووره‌کان لاببرێن. له‌هه‌موو رۆژهه‌ڵاتى ناوه‌راست هه‌رێمێکى کۆنفیدرالیزمى دیموکراتى دابمه‌زرێت. ئورده‌ن، فه‌له‌ستین، سعودیه‌، لوبنان، یه‌مه‌ن ، تورکیا ، کوردستان و وڵاته‌کانى دیکه‌ له‌ناو ئه‌و یه‌کتییه‌ دابن. کۆنفیدرالیزمى دیموکراتى ئاوابکه‌ن. بۆنمونه‌ ئه‌گه‌ر تورکیا ناخوازێت پارچه‌ پارچه‌ ببێت و هه‌ڵوه‌شێته‌وه‌، ده‌بێت له‌تورکیا کۆنفیدرالیزمى دیموکراتى دامه‌زرێت، کورد ، ئه‌رمه‌ن، لاز ، چه‌رکه‌ز ، عه‌ره‌ب و هه‌موو نه‌ته‌وه‌کانى دیکه‌ بگه‌نه‌ مافه‌کانیان، بۆ سوریا و ئێران و ئێراقیش به‌هه‌مان شێوه‌.

ده‌وڵه‌ت نه‌ته‌وه‌یی ئێستا هه‌یه‌ ناتوانێت چاره‌سه‌رى کیشه‌کان بکات ، بۆچى سیسته‌مى کۆنفیدرالیزمى؟

ئه‌گه‌ر سیسته‌مى ده‌وڵه‌ت ــ نه‌ته‌وه‌ ، سیسته‌مێکى سه‌رکه‌وتووبوایه‌ ، ئه‌وا سه‌ده‌ى رابردوو ئه‌نجامێکى باشى ده‌بوو. به‌پێچه‌وانه‌وه‌ ده‌بینین، له‌ سه‌ده‌ى رابردودا ، کوشتن ، ماڵوێرانى و خراپه‌کانى ئه‌و چوارده‌وڵه‌ته‌ ته‌واو نه‌بووه‌. باشه‌ بۆ ؟ چونکه‌ له‌ ئێران تۆ بته‌وێت یان نا ، نه‌ته‌وه‌یه‌کى فارس له‌سه‌ر ده‌سه‌ڵاته‌ ، موسڵمانێکى سونه‌ ناتوانێت ببێته‌ سه‌رۆک کۆمارى ئێران، رێگه‌ ناده‌ن له‌ تاران مزگه‌وت هه‌بێت. له‌ئێراقیش تا ساڵى 2003 دواى ئه‌وه‌ى ده‌سه‌ڵاتى سه‌دام رووخا، تا ئه‌و کاته‌ هیچ کوردێک نه‌یده‌توانى له‌ئێراق ده‌سه‌ڵاتى به‌ده‌سته‌وه‌ بێت، یانیش عه‌ره‌بێکى شیعه‌ ببێته‌ سه‌رۆک کۆمارى ئێراق. له‌تورکیا و سوریاش هه‌مان نه‌ژادپه‌رستى هه‌یه‌. چونکه‌ سیسته‌م له‌سه‌ر بنه‌ماى ده‌وڵه‌ت ــ نه‌ته‌وه‌یه‌ و ناچاره‌ که‌ نه‌ته‌وه‌کانى دیکه‌ بنده‌ست بکات. سه‌ره‌جه‌م ماف و ئازادییه‌کان زه‌وت بکات. به‌ڵام له‌سیسته‌مى کۆنفیدرالیزمى دیموکراتى وانیه‌ ، وه‌ک ئێراق ئه‌گه‌ر له‌سه‌ر بناغه‌یه‌کى جوگرافى دابه‌ش بکرێت، ئه‌وا ده‌بێته‌ دووهه‌رێم، به‌ڵام ئه‌گه‌ر له‌سه‌ر بنه‌ماى تایفى ، یانیش مه‌زهه‌بى و نه‌ژادى دابه‌ش بکرێت، زۆر مه‌ترسیداره‌. ئه‌گه‌ر ده‌وڵه‌تى سونى ، شیعه‌ و کورد دروست بێت ، مه‌ترسیداره‌ ، بۆ ؟ چونکه‌ ئه‌و ده‌وڵه‌ته‌ سونه‌ییه‌ له‌سه‌ر خاکى کوردستان داده‌مه‌زرێت، ئه‌وکاته‌ زۆربه‌ى خاکى کوردستان له‌ژێر ده‌ستى کورد ده‌رده‌که‌وێت، پارێزگاى موسل ده‌چێت، به‌شێک له‌پارێزگاى دهۆک ، هه‌ولێر ، دیاله‌ و که‌رکوک ده‌چن. به‌ڵام ئه‌گه‌ر له‌سه‌ر بنه‌ماى کۆنفیدرالیزمى دیموکراتى بێت، هه‌موو نه‌ته‌وه‌کان به‌شێوه‌یه‌کى ئازادانه‌ له‌ناو ئه‌و سیسته‌مه‌دا ده‌ژین.

جیاوازى نێوان سیسته‌مى کۆنفیدرالیزمى و مه‌رکه‌زى چییه‌ و چۆن ده‌توانن له‌گه‌ڵ یه‌کتر مامه‌ڵه‌ بکه‌ن؟

سیسته‌مى کۆنفیدرالیزمى دیموکراتى له‌به‌ر ئه‌وه‌ى سیسته‌مێک نیه‌ له‌ژووره‌وه‌ به‌ره‌و ژێر بێت، به‌ڵکو سیسته‌مى له‌ژێره‌وه‌ به‌ره‌و ژووره‌، بڕیاره‌کان له‌ژێره‌وه‌ ده‌درێن. خه‌ڵک کۆبوونه‌وه‌کانى له‌ کۆڵان ، گه‌ره‌ک دروست ده‌که‌ن و به‌و شێوه‌یه‌ رێکخستبوونى خۆیان دروست ده‌که‌ن، گه‌ل له‌رووى ئابوور، سه‌ربازى ، ئاسایش خۆى به‌رێوه‌ده‌بات. کاتێک به‌رێوه‌به‌رى له‌ناو خه‌ڵک بێت ، گه‌لیش رێزى لێ ده‌گرێت و ئه‌ویش خزمه‌تى ئه‌و گه‌له‌ ده‌کات. کاتێک له‌ ده‌ستور ، گه‌ل ، سیسته‌م و وڵات دیموکراسى هه‌بوو، ئه‌وکاته‌ دیموکراسى له‌سه‌ر ئه‌و هه‌موو کۆمه‌ڵگا کاریگه‌رى ده‌کات. یانیش سیسته‌مى هاوسه‌رۆکایه‌تى زۆر گرنگه‌، کاتێک یه‌ک ژن و یه‌ک پیاوبێت ، ئه‌وکاته‌ یه‌کسانى کۆمه‌ڵگه‌ش دروست ده‌بێت و ئه‌مه‌ گرنگه‌. که‌سێک ناتوانێت به‌ته‌نیا خۆى دیکتاتۆرى به‌رێوه‌ببات، تۆ ناچارى حیساب بۆ که‌سه‌کانى دیکه‌ش بکه‌یت، هه‌تا ئه‌گه‌ر سه‌رۆکێکى دیکتاتۆر بێت توانێت تاسه‌ر به‌رده‌وامى بکات، چونکه‌ هێزى سه‌ربازى له‌پشت نیه‌، هێزى گه‌ل له‌پشتى نیه‌، هێزى ئابوورى له‌پشت نیه‌ چونکه‌ ئه‌مانه‌ هه‌مووى هی گه‌له‌. گه‌ل ده‌سه‌ڵاته‌ و ئه‌و بڕیار ده‌دات. به‌ڵام له‌سیسته‌مه‌کانی دیکه‌دا دیکتاتۆره‌ک دێته‌ سه‌ر ده‌سه‌ڵات، هه‌موو گه‌ل ده‌کاته‌ کۆیله‌ى خۆى. پاشانیش ئه‌و ده‌سه‌ڵاته‌ ده‌کاته‌ بنه‌ماڵه‌یی و که‌سوکارى سودى لێ ده‌بینین، ئیدى به‌و شێوه‌یه‌ هه‌موو شتێک گه‌نده‌ڵ ده‌بێت و له‌ لارێ ده‌رکه‌وێت. بۆیه‌ ده‌بینین ئه‌و سیسته‌مه‌ له‌رۆژهه‌ڵاتى ناوه‌راست کۆتایی دێت.

ئێوه‌ سیسته‌مى کۆنفیدرالیزم بۆ ئێراق ده‌ڵێن؛ به‌ڵام له‌ئێراق نه‌ک ته‌نیا نه‌ته‌وه‌یی جیاواز ، به‌ڵکو مه‌زهه‌بى جیاوازیش هه‌ن به‌هه‌زاران ساڵه‌ شه‌ڕى مه‌زهه‌بى له‌نێوان سونه‌ و شیعه‌ به‌رده‌وام ده‌کات ، سیسته‌مى کۆنفیدرالیزم ده‌توانێ کۆتایی به‌م شه‌ڕه‌ مه‌زهه‌بیه‌ش بهێنێت؟

کیشه‌ى عێراق و رۆژهه‌ڵاتى ناوه‌راست ، کێشه‌ى نه‌زانینه‌. ئێمه‌ له‌ناو کلتوورێکى خراپدا ده‌ژین. ئه‌م دژایه‌تییه‌ته‌نیا له‌نێوان سونه‌ و شیعه‌کاندا نه‌ماوه‌، ئیدى گه‌یشتۆته‌ سنوورى حیزب ، گوند و عه‌شیره‌ته‌کان. هه‌تا واى لێهاتوه‌ له‌مالێک سێ برا یه‌کێکیان یه‌کێتییه‌ ، یه‌کێک پارتییه‌ و یه‌کێکیش گۆران و شیوعى و په‌که‌که‌یه‌. ئه‌و برایانه‌ له‌مالێک ناتوانن بژین چونکه‌ له‌دژى یه‌کترى قسه‌ده‌که‌ن. بۆیه‌ ده‌بێت سیسته‌مێک و په‌یوه‌ندییه‌کى لێبورده‌ییمان هه‌بێت، گیانێکى یه‌کترقبولکردنمان هه‌بێت. سه‌یرکه‌ن ده‌بینین له‌ناو په‌که‌که‌دا چه‌ندین که‌س به‌یکه‌وه‌ن و هه‌ریه‌کیان له‌نه‌ته‌وه‌یه‌کن، به‌ڵام وه‌ک برا ده‌ژین، چونکه‌ لاى ئه‌وان ئه‌وه‌ گرنگه‌ که‌ تۆ بۆ ئه‌و گه‌ل و وڵاته‌ چى ده‌که‌ى ، کیشه‌ى ئایین و مه‌زهه‌ب نیه‌.

هۆکارى ئه‌و ئاڵۆزیانه‌ى ئێستاى هه‌رێمى کوردستان چیه‌؟ پێتوایه‌ ده‌بێت چ ده‌ستورێک هه‌بێت و چاره‌سه‌ریه‌کى چۆن گونجاوه‌؟

هۆکارى ئه‌وه‌ى له‌باشوورى کوردستان تا ئێستا کورد نه‌یانتوانیوه‌ ببنه‌ کیانێکى باش، لاوازبوونى ده‌سه‌ڵاتى کوردییه‌. هه‌رله‌سه‌ره‌تاوه‌ هه‌وڵى نه‌داوه‌ بتوانێت ببێته‌ خاوه‌نى ده‌ستوور ، یاسا و پرۆژه‌یه‌کى باش بۆ ئه‌وه‌ى مافه‌کانى مرۆڤ و ئازادى کۆمه‌ڵگه‌ تیایدا بچه‌سپێت. هه‌ربۆیه‌ هه‌ر ماوه‌یه‌ و دروشمێک هه‌یه‌ ، ئۆتۆنۆمى ، هه‌ندێک جار مه‌رکه‌زى و هه‌ندێک جار لامه‌رکه‌زى و هه‌ندێک جار فیدرالى و هه‌ندێک جاریش کۆنفیدرالى. هه‌ر رۆژه‌ و شتێکه‌، کاتێک حیزبێک دروشمێک بۆخۆى دیار ده‌کات ، ئه‌وه‌ى دیکه‌ له‌دژى ده‌وه‌ستێته‌وه‌. له‌ساڵى 1981 دروشمى مافى چاره‌ى خۆنوسین ده‌ستى پێکرد، به‌س ئه‌و کاته‌ پارتى له‌دژى وه‌ستایه‌وه‌، ووتى ؛ ئێوه‌ بازرگانى به‌و دروشمه‌وه‌ ده‌که‌ن، به‌ئێمه‌ى ده‌ووت، بازرگانانى مافى خۆچاره‌نوس، ئه‌گه‌ر ئه‌و کاته‌ پارتى و یه‌کێتى و حیزبه‌کانى دیکه‌ خاوه‌نداریان له‌و دروشمه‌ بکردایه‌ دۆخى ئێستاش جیاواز ده‌بوو. به‌ڵام ئه‌و کات کورد هیچى نه‌کرد.له‌کاتى هه‌ڵبژاردنه‌کانى ساڵى 1992 وه‌ک پارتێکى گه‌ل ئه‌و کاته‌ ئێمه‌ دروشمى فیدرالیزممان به‌رزکرده‌وه‌، دیسان پارتى له‌دژى ئێمه‌بوو، خه‌ڵکى ده‌ستگیرده‌کرد، ئه‌شکه‌نجه‌ و شوێنبزرى ده‌کردن. ئه‌وان دروشمى ئۆتۆنۆمیان به‌رزکرده‌وه‌. زۆربه‌ى حیزبه‌کانى دیکه‌ش ده‌یان ووت، کاتى ئۆتۆنۆمى نه‌ماوه‌. هه‌ربۆیه‌ کورد له‌باشوورى کوردستان نه‌یانتوانیوه‌ له‌ ئاستى دیبلۆماسى، رێکخستنى ، نه‌ته‌وه‌یی و ... یه‌کریزى دروست بکه‌ن.

وه‌ک ئێوه‌ش باستان کرد هه‌رده‌م دروشمى جیاواز جیاواز ووتراونه‌ته‌وه‌، ئیستا ده‌بینین باسى سه‌ره‌به‌خۆیی ده‌کرێت، به‌ڵام تائێستا دووئیداره‌یی کێشه‌یه‌کى گه‌وره‌یه‌، له‌م دۆخه‌دا دروشمى سه‌ربه‌خۆیی یانیش ده‌وڵه‌تى کوردى چاره‌سه‌رى کیشه‌کان ده‌کات ، یانیش ئامانجێکى سیاسییه‌؟

ئه‌و سه‌ربه‌خۆییه‌ وه‌ک ئه‌وه‌یه‌ که‌ کۆمه‌ڵێک منداڵ له‌به‌ر به‌فر و باران بن و هیچیان نه‌بێت ، تۆ بڵێى وه‌رن قه‌سرێکتان بۆ دروست ده‌که‌م. به‌ڵام سه‌ره‌تا تۆ جارى یه‌که‌مین خیوه‌تێک دانێ، یانیش غورفه‌یه‌ک دروست بکه‌ و ئێمه‌ بچینه‌ ناوى و دواتر تۆ قه‌سرێک به‌دڵى خۆت دروست بکه‌. به‌رزکردنه‌وه‌ى دروشمێکى به‌و شێوه‌یه‌ش بازرگانى کردنه‌ به‌خه‌ڵک. هه‌ڵخه‌ڵه‌تاندنى رایگشتی خه‌ڵکى کوردستانه‌. له‌سه‌دا 56ى خاکى کوردستان له‌به‌رده‌ستى ئێراقدایه‌ ، گومان له‌سه‌ر ماده‌ى 140 هه‌یه‌، هه‌تا ئه‌مه‌ نه‌گه‌رێته‌وه‌ سه‌ر خاکى کوردستان تۆ ناتوانێ باسى ئازادى و سه‌ربه‌خۆیی بکه‌ى . ئه‌گه‌ر ده‌وله‌تێکیش دروست ده‌که‌ى له‌سه‌ر ئه‌و خاکه‌ نابێت، ئه‌مه‌ به‌واتاى ئه‌وه‌یه‌ تۆ وازت له‌نیوه‌ى خاکى کوردستان هێناوه‌. پارتى ناتوانێت له‌دهۆک و هه‌ولێر ده‌وڵه‌تى کوردى رابگه‌یه‌نێت، یاسایی بوونى سه‌رۆکایه‌تى هه‌رێمیش نه‌ماوه‌. پێویسته‌ ئه‌و یه‌کسان بوونه‌یان له‌گه‌له‌وه‌ وه‌بگرن. کوردستان ته‌نیا دهۆک و هه‌ولێر نیه‌. ده‌وروبه‌ریش ده‌وڵه‌تێک پێکهاتوو له‌دوو پارێزگا قبول ناکات، تۆ ده‌توانى بۆخۆت ناوى بنێى ده‌وڵه‌تى دهۆک، ده‌وڵه‌تى بارزان، به‌روارى مزوورى . به‌ڵام پێویسته‌ بۆ ده‌وڵه‌تى کورد باشوورى کوردستان هه‌مووى ببێته‌ یه‌ک و یه‌کێتى کورد دروست بکه‌ى و ئه‌وکاته‌ ده‌توانى بڵێى ئێمه‌ داواى ده‌وڵه‌تى باشوورى کوردستان ده‌که‌ین. چ هێزێک هه‌یه‌ خه‌ڵکى گه‌رمیان ، سلێمانى و که‌رکوک ناچارى بڕیاره‌کانى هه‌ولێر بکات. بۆیه‌ ده‌وڵه‌تى کورد به‌دروشم و قسه‌دروست نابێت.

کیشه‌کانى باشوورى کوردستان زۆرن، ئێوه‌ چاره‌سه‌رى ئه‌و کیشه‌ چۆن ده‌بینین ؟ ئێوه‌ وتیان؛ ده‌ستوور نیه‌ و که‌وایه‌ چاره‌سه‌رى له‌کوێ ده‌بێـت ؟

ئه‌وه‌ى راستى بێت پێویسته‌ سه‌ره‌تا سیسته‌م دیارى بکرێت، تۆ کامه‌ سیسته‌مت ده‌وێت فیدراڵ یانیش کۆنفیدرال. چونکه‌ به‌شه‌کانى ئه‌وانه‌ش زۆرن. هه‌روه‌ها چۆن له‌گه‌ڵ ئێراق ده‌ته‌وێ بژیت. ده‌ته‌وێت لێى جیابیته‌وه‌ یانیش فیدرال بیت و یان ئۆتۆنۆمى وه‌ربگریت. دواتریش سیسته‌مى پارێزگاکان دروست بکه‌ى یان نا . ئێمه‌ ده‌ڵێین ده‌بێت سیسته‌مێکى کۆنفیدراڵى باشوورى کوردستان له‌گه‌ڵ ئێراق هه‌بێت، سیسته‌مى کۆنفیدرالیزمى باشوورى کوردستان لا مه‌رکه‌زى بێت. یانیش سیسته‌مى کانتۆن ، یان خۆسه‌رى دیموکراتى و یانیش پارێزگاکان هه‌بێت. خه‌ڵک ئازاد بێت. هه‌رێمى تازه‌ دروست ببن و هه‌ریه‌ک له‌وانه‌ش به‌گوێره‌ى سیسته‌مى خۆیان ، یاسا و ده‌ستوورى خۆیان ده‌ستنیشان بکه‌ن. سه‌رباز ، ئاسایش و پرۆژه‌ى خۆیان هه‌بێت.

له‌ساڵى 1991.. بۆ 1992 ره‌شنوسى ده‌ستوورێک نوسرایه‌وه‌ و ئیستا کاتى به‌سه‌رچووه‌ و بۆ ئێستا گونجاو نیه‌، به‌تایبه‌تیش هه‌ندێک ماده‌ هه‌ن له‌و کاته‌دا زۆر به‌زانستیانه‌ دانراون وه‌ک ماده‌ى 64 که‌ ده‌ڵێت؛ هه‌رکه‌سێک ده‌توانێت له‌چوارساڵ بۆ چوار ساڵ ده‌توانێت ببێته‌ سه‌رۆکى هه‌رێم، به‌ڵام ئه‌وکاته‌ى ده‌ستوور ده‌که‌وێته‌ ده‌نگدانه‌وه‌. ماوه‌ى 26 ساڵه‌ ئێمه‌ بێ ده‌ستوورین. پێویسته‌ ده‌ستوورێکى دیموکراتى و پێشکه‌وتووهه‌بێت و حیزب نه‌ینوسێت، ده‌بێت ده‌ستوور له‌لایه‌ن که‌سانى شاره‌زا له‌و بواره‌وه‌ ، زانایانه‌وه‌ بنوسرێت. چونکه‌ ده‌ستوور چاره‌نوسى گه‌لێک دیارى ده‌کات، پێویست ناکات ده‌ستوور 100 ماده‌ بێت، ده‌توانێت شه‌ش ماده‌ش بێت، ئێمه‌ تائێستا نه‌مانتوانیوه‌ ده‌وڵه‌تى کوردى بناسێنین. ئێمه‌ نازانین ده‌وڵه‌تێکى بنه‌ماڵه‌یی ، گوندى ، فه‌قیرى ، سونه‌ ، شیعه‌ ، دیموکرات یان چینه‌یی بێت. ئه‌وانه‌ى ده‌ڵێن ، ده‌وڵه‌ت دروست ده‌که‌ین هیچ له‌ده‌وڵه‌ت نازانن ، باشه‌ فه‌رموون ، پرۆژه‌کانتان بۆ دروستکردنى ده‌وڵه‌ت ئاشکرابکه‌ن. سنووره‌کانى دیارى بکه‌ن، ده‌وڵه‌تێکى چۆنه‌ دیارى بکه‌ن.ده‌بێت شێوازى ده‌وڵه‌ت له‌باشوورى کوردستان دیارى بکرێت.

ک.ر