ماڵپەڕی پەیوەندییەكانی دەرەوە لە خۆبەڕێوەبەری باكور و ڕۆژهەڵاتی سوریا بڵاویكرردەوە، ئەمڕۆ ٣٢ منداڵ و ١٥ ژنی فەرەنسی ڕادەستی بەرپرسی قەیرانەكان لە حكومەتی فەرەنسا كراونەتەوە، دەشڵێن، ئێمە هاوكاری فەرەنسا و هەموو ئەو وڵاتان دەبین، کە دەیانەوێت خێزانى چەتەکانى داعش بۆ وڵاتى خۆیان بگێڕنەوە.
ماڵپەڕی فەرمی وەزارەتی پەیوەندییەكانی دەرەوە لە خۆبەڕێوەبەری باكور و ڕۆژهەڵاتی سوریا بڵاویکردەوە، ئەمڕۆ ئیدارەی خۆسەر لە قامیشلۆ پێشوازی لە شاندی دیپلۆماسی حكومەتی فەرەنسا بە سەرۆكایەتی ستیفان ڕۆمات، بەرپرسی قەیرانەکان لە حكومەتی فەرەنسا كرد و ٣٢ منداڵ و ١٥ ژنی فەرەنسی ڕادەستی بەرپرسی قەیرانەكان لە حكومەتی فەرەنسا كراونەتەوە.
باسلەوەشکراوە شاندە فەڕەنسیەکە لەلایەن هەردوو هاوسەرۆك فەنار كەیت و ڕوبێل باهۆ، خالد ئیبراهیم ئەندامی دەستەی كارگێڕی خۆسەرى و لانە حسێن، ئەندامی نووسینگەی یەپەژە پێشوازییان لێكراو لە کۆبونەوەکەدا جەخت لە بەهێزی پەیوەندییە هاوبەشەكان کرا.
جێگەى ئاماژەیە، كا‌مپی هۆل یەكێكە لە گەورەترین كامپەكان، كە خێزان و ئەندامانی داعشی تێدایە و دەكەوێتە رۆژئاوای كوردستان و نزیكەی ٧٠ هەزار هاوڵاتی سوری و هەڵگرانی رەگەزنامەی جۆراوجۆری وڵاتانی جیانی تێدایە، لەنێویاندا زیاتر لە ٣٠ هەزار كەسیان هەڵگری ڕەگەزنامەی عێراقین.
هـ.ئ
