هاوكات، لەگەڵ بەردەوامی چالاكییەكانی سەرهەڵدانی “ژن، ژیان،ئازادی”، توێژە جیاجیاكانی كۆمەڵگاش، دژی خراپی گوزەران و دۆخی ئابووری بەردەوامن لە ناڕەزایەتی دەربڕین.
دوێنێ، لە دەیان شاری ڕۆژهەڵاتی كوردستان و ئێران، فەرمانبەران و خانەنشینانی بەڕێوەبەرایەتی گەیاندن و پەیوەندییەكان، گردبوونەوەی ناڕەزایەتییان ئەنجامدا.
بەشداربووانی گردبوونەوەكان، ناڕەزایەتییان دژی دواكەوتنی شایستە داراییەكانیان و هەروەها هەڵپەساردنی بەشێك لە دەرماڵەكانیان دەربڕی.
لە ڕۆژانی ڕابردووشدا، كرێكارانی كەرتی نەوت و غاز، لە زۆربەی پاڕێزگاكانی ئێران و ڕۆژهەڵاتی كوردستان، بە مانگرتن و گردبوونەوە، ناڕەزایەتییان لە دژی خراپی دۆخی گوزەران و بژێوییان دەربڕیبوو.
گرانی، هەڵاوسان و بەرزبوونەوەی ڕێژەی هەژاری، چەند ساڵێكە بەرۆكی هاوڵاتیانی ئێران و ڕۆژهەڵاتی كوردستانی گرتووە و هاوكات لەگەڵ دەستپێكردنی سەرهەڵدانی “ژن، ژیان، ئازادی” تا دێت مانگرتن، خۆپیشاندان و گردبوونەوەی ناڕەزایەتی مامۆستایان، كرێكاران، خانەنشین و توێژە جیاجیاكانی دیكە، دژی خراپی دۆخی بژێوی و گوزەرانیان زیاد دەكات.
بەردەوامی ئەو چالاكی و ناڕەزایەتییانە لەكاتێكدایە، دەسەڵاتی ئێران هەوڵی زۆر دەدات، لە ڕێگەی گوشار بۆ سەر چالاكوانان و گرتن و سەپاندنی سزای قورس بە سەر هاوڵاتیان، كۆتایی بە ناڕەزایەتییەكان بهێنێت.
هەر لەو چوارچێوەیەدا بڵاوكرایەوە، كە لە ماوەی دوو مانگی ڕابردوودا، لە شاری ورمێ ٢٥ كوڕ و كچی خوار تەمەنی ١٨ ساڵ، كە بە تۆمەتی ڕێكخستنی خۆپیشاندان و ناڕەزایەتییەكان لەو شارە دەستگیركرابوون، لە ژێر ئەشكەنجەدا ناچار كراون، كە خۆیان وەك “گەنجانی گەڕەكەكانی ورمێ” بناسێنن، كە لەماوەی ڕابردوودا بەشێك لە خۆپیشاندانەكانی شارەكەیان ڕێكخستبوو.
هاوكات لە شارەكانی دیكەی ڕۆژهەڵاتی كوردستانیش، هەڵمەتی هەڵكوتانە سەر ماڵان بەردەوامە و چەندین هاوڵاتی و چالاكوان دەستگیركران.
لە سەر ئاستی دەرەوەی ئێرانیش، تادێت پشتیوانیەكان لە خۆپیشاندەرانەكانی بەرفراوان دەبێت و هەریەك لە یەكێتی ئەوروپا، بەریتانیا و ئەمریكا بە تۆمەتی تێوەگلان لە سەركوتی خۆپیشاندەران، سزایان بەسەر دەیان فەرماندەی سوپای پاسداران و بەسیجدا سەپاند.
ڕ.ڕ
