پاش ئەوەی دوێنێ کۆمسیۆنی باڵای سەربەخۆی هەڵبژاردنەکانی عێراق، ئەنجامی کۆتایی هەڵبژاردنە پەرلەمانیەکەی مانگی ١٠ ی ئەمساڵی بڵاوکردەوە، چوارچێوەی هەماهەنگی شیعەکان، بەتەواوی ئەنجامی کۆتایی هەڵبژاردن ڕەتدەکەنەوە دەڵێن: کۆمیسۆنەکە پێشوەختە ئەنجامی هەڵبژاردنی دیاریکردووە.
ڕۆژی ١٠ی تشرینی یەكەمی ئەمساڵ، هەڵبژاردنی پێشوەختەی عێراق ئەنجامدرا، دوای ڕاگەیاندنی ئەنجامە بەراییەكان، بەشێك لە لایەنە شیعییەكانی نزیك لە ئێران هەڵبژاردنەكەیان ڕەتكردەوە، دوای ٥٠ ڕۆژ لە ئەنجامدانی هەڵبژاردن دوێنێ كۆمسیۆن ئەنجامی كۆتایی هەڵبژاردنی ڕاگەیاند.
وەك یەكەم لایەنی ناڕزای چوارچێوەی هەماهەنگی شیعەکان، بەیاننامەیەکی لەبارەی ڕاگەیاندنی ئەنجامی کۆتایی هەڵبژاردن بڵاوکردەوە و لە ڕاگەیەندراوەکەدا هاتووە، بەتەواوی ئەنجامی کۆتایی هەڵبژاردن ڕەتدەکەینەوە، چونکە دەستەی دادوەری بەپێی چوارچێوەی یاسایی کارپێکراو مامەڵەیان لەگەڵ تانەکان نەکردووە، کۆمسیۆنیشیان بەوە تۆمەتبارکردووە، کە پێشوەختە ئەنجامی هەڵبژاردنی دیاریکردووە.
جەخت دەکەنەوە لەسەر هەڵوێستەکانیان لەبارەی “یاریکردن بە ئەنجامی هەڵبژاردن” و داوای هەڵوەشاندنەوەی هەڵبژاردن دەكەن، کە پێشتر پێشکەشی دادگای فیدراڵییان کردووە.
ئەو چوارچێوەیە پێكهاتوون لە، نوری مالیكی، عەمار حەكیم، حەیدەر عەبادی، هادی عامری و قەیس خەزعەلی، لەدوای ڕاگەیاندنی ئەنجامە بەراییەكان لەناو چوارچێوەی هەماهەنگیدا یەكیان گرتەوە و لایەنگرانیان بەردەوامن لە خۆپیشاندان و داوای ژماردنەوەی دەستی دەنگەكانیان دەكرد.
دوێنێك، کۆمسیۆنی باڵای سەربەخۆی هەڵبژاردنەکانی عێراق ئەنجامی کۆتایی هەڵبژاردنی پێشوەختەی عێراقی بەفەرمیی بڵاوکردەوە و ناوی کاندیدە سەرکەتووەکانی بۆ خولی پێنجەمی پەرلەمانی عێراق ڕاگەیاند، هەر بەپێی ئەنجامەکان، کۆی گشتی ژمارەی دەنگدەران لە پرۆسەکەدا گەیشتووەتە نۆ ملیۆن و ٦٢٩ هەزار و ٦٠١ دەنگ، ئەوەش دەکاتە ڕێژەی لە ٤٤٪ی کۆی ژمارەی دەنگدەرانی عێراق بۆ ساڵی ٢٠٢١، هەروەها، ٨٪ی دەنگەکانیش پووچەڵبوون، کە دەکاتە ٧٢١ هەزار و ٩٧٩ دەنگ.
ڕاگەیاندنی ئەنجامی كۆتایی هەڵبژاردن دوای ٥٠ ڕۆژ بۆ یەكەمجارە ئاوا دوابكەوێت لە دوای ساڵی ٢٠٠٥ەوە ئەوەش بە وتەی بەختیار شاوەیس، ئەندامی خولی چوارەمی ئەنجومەنی نوێنەرانی عێراق.
شاوەیس دەڵێت: پاش بڵاوکردنەوەی کۆتایی ئەنجامەکان کۆمسیۆن دەینێرێت بۆ دادگای باڵای فیدراڵی عێراق، دادگاکەش دەبێت لەماوەی ١٥ رۆژدا تانەکان ساغ بکاتەوە و ئەنجامەکان پەسەند بکات، ئەگەر ئەنجامەکان پەسەند کرا، ئەوا لەماوەی ١٥ رۆژی دیکەدا دەبێت پەرلەمانی نوێ کۆببێتەوە، کە دەکەوێتە ساڵی داهاتوو.
ئ.م
