ڕۆژنیوز- بەغدا
سیاسەتمەداران و چاودێرانی عێراق دەربارەی هێرشە داگیركارییەكانی دەوڵەتی تورك بۆسەر شەنگال دەڵێن، زانیاریی هەیە، کە چەند لایەنێك هەن كارئاسانی دەكەن بۆ داگركارییەكانی توكیا لە شەنگال و جەختدەكەنەوە لەوەی، توركیا مەبەستێتی لە ڕێگەی شەنگالەوە بێتە قوڵایی خاكی عێراق.
هێرشە داگیركارییەكانی دەوڵەتی تورك بۆسەر شەنگال بەردەوامە و دوێنێ، دەوڵەتی تورك لە ڕێگەی فڕۆكەی بێفڕۆكەوانەوە هێرشی كردە سەر شەنگال و لە ئەنجامدا فەرماندەیەكی یەبەشە و شەڕڤانێك شەهید بوون.
لەسەر ئەو هێرشە داگیركارییانە، وعد قدوە، سیاسەتمەداری عێراقی بە ڕۆژنیوزی وت: سوپای داگیرکەری تورکیا بە پاساوی جۆراوجۆر هەوڵ دەدات لە ڕێگەی شەنگالەوە بچێتە ناو قوڵایی خاكی عێراقەوە.
ئەو سیاسەتمەدارە وتیشی: بەرژەوەندیی هاوبەشی نێوان تورکیا و پارتی هەیە بۆ گەڕانەوەی ئەو دووانە بۆ شەنگال، بەڵام دانیشتوانی شارۆچكەكە گەڕانەوەی پەدەكە و هێرشەکانی تورکیا ڕەتدەكەنەوە.
باسی لەوەشكرد، حکومەتی عێراق ناتوانێت ڕووبەڕووی تورکیا بێتەوە و هیچ بژاردەیەکی نییە جگە لە بەکارهێنانی کەناڵە دیپلۆماسییەکان لەگەڵیدا و وتیشی: لەناو عێراق چەند لایەنێك هەن، کە ئاسانکاریی دەکەن بۆ چوونە ناوەوەی سوپای تورک و چوونە ناو ناوچەی شەنگالەوە بە دزەپێکردنی زانیاریی لەکاتی ئەنجامدانی هەر ئۆپەراسیۆنێکدا.
هەروەها، د. عەلا نشوع، شارەزای ستراتیجی و سیاسی بە ڕۆژنیوزی وت: ململانێی شەنگال ئەجێندایەکی نێودەوڵەتیی و هەرێمییە، تورکیا بەنیازە جێپێی لە باکوری عێراق قایمبکات.
نشوع داوا لە کازمی دەکات، شەنگال لە دەستێوەردانە دەرەکی و ناوخۆییەکان ڕزگار بکات و ئەوەشی وت: کە کازمی لاوازە لە چارەسەرکردنی بڕیارە گرنگەکان و بەرپرسیارە لەوەی ڕوودەدات.
س.س
