ئەمینداری گشتیی عەسائیب ئەهلی حەق بەتووندیی لەسەر هێرشەکەی ئەمڕۆی دەوڵەتی تورک لە سنونێی شەنگال هاتەدەنگ و ڕایگەیاند، ئەو هێرشانە “بەهیچ شێوەیەک قبوڵ ناکرێن”، هاوکات ڕەخنەی لە بێدەنگیی حکومەتی کازمییش گرت بەرامبەر ئەو هێرشانە و وتی: هەرکەسێک دڵۆپێک غیرەتی هەبێت، نابێت بەرامبەر ئەو هێرشانە بێدەنگ بێت.
قەیس خەزعەلی، ئەمینداری گشتیی عەسائیب ئەهلی حەق ئەمشەو لە دوو تویت-دا لە تویتەری خۆی، دژی هێرشە ئاسمانییەکەی ئەمڕۆی سوپای تورکی داگیرکەر لە شارەدێی سنونێی شەنگال هاتەدەنگ و داوای هەڵوێستی کرد دژی تورکیا.
خەزعەلی دەڵێت: ئەو دەستدرێژییەی تورکیا کە ئەمڕۆ کردییە لەسەر شەنگال، بەهیچ شێوەیەک قبوڵ ناکرێت، هێرشی زەقی تورکیا بۆ سەر گەلەکەمان لە شەنگال هەرگیز ناکرێت لەلایەن هیچ عێراقییەکەوە کە دڵۆپێک غیرەتی هەبێت، قبوڵ بکرێت.
قەیس خەزعەلی دەشڵێت: ئەوانەی بێدەنگ دەبن وەک ئەوانەن کە لە گۆڕستانەکاندان، بەڵام ئێمە غیرەتمان زۆرە، بۆیە بێدەنگ نابین.
لە تویتەکەی دیکەدا ئەمینداری گشتیی عەسائیب ئەهلی حەق داوای لە هێزە سیاسییەکان و “حکومەتی کازمی” کرد، هەڵوێستیان یەک بێت بەرامبەر پێشێلکارییە بەردەوامەکانی تورکیا و وتی: ئێمە داوا لە حکومەت دەکەین کە بە هەنگاوێکی کردەیی بەرامبەر ئەم پێشلکارییە بەردەوامانەی تورکیا بووەستیتەو و کۆتایی بە ڕژاندنی خوێنی گەلی عێراق بهێنێت.
جەختیشیکردەوە، کە ئەگەر حکومەتی عێراق هەڵوێستی نەبێت بەرامبەر هێرشەکانی تورکیا، ئەوا خۆی دەخاتە بەردەم بەرپرسێارێتیی یاساییەوە، کە بێدەنگە بەرامبەر پێشێلکردنی سەروەریی وڵات.
ب.ل
