ڕۆژنیوز-بەغدا
سیاسەتمەدارانی عێراق دەڵێن: پەکەکە پابەندە بە فەلسەفەیەک، كە پشتیوانیی و بەرگریی لە دۆزی کورد دەكات و دژی هەر سیاسەتێكە، كە هەوڵی لەناوبردنی ناسنامەی کورد بدات، بۆیە کاتی ئەوە هاتووە لە لیستی تیرۆر دەربهێنرێت.
دەستپێشخەریی دادپەروەریی نیودەوڵەتیی بۆ کورد، کەمپەینێکی واژۆ کۆکردنەوەی لە ٣٠ وڵاتی جیهان دەستپێکردووە و دەیەوێت، چوار ملیۆن واژۆ كۆبكاتەوە بۆ دەرهێنانی پەکەکە لە لیستی تیرۆری ئەمریکا و یەکێتی ئەوروپا.
کەمپەینەکە لەسەر ئاستی نێودەوڵەتیی بە بەشداریی هەزاران کەس بەڕێوەدەچێت و چەندین پەرلەمانتار و ئەکادیمی و فیلمساز و سەرکردە سیاسییەکان و نووسەران و چالاکوان تیایدا بەشدارن، هاوکات پشتیوانیش بۆ کەمپەینەکە بەردەوامە و لەو چوارچێوەیشدا سیاسەتمەدارانی عێراق پشتیوانی خۆیان بۆ كەمپەینەكە دەردەبڕن.
کازم حاج، شیکەرەوەی سیاسی عێراق بە ڕۆژنیوزی وت: تورکیا و وڵاتانی تر، بەڕاستی هەوڵ دەدەن ناسنامەی کورد لەناوببەن، بەڵام بێئاگا لەوەی كورد مێژوویەکی دوورودرێژیان هەیە لە ناوچەکەدا.
وتیشی: پەکەکە چەندین ساڵە بەرگریی لە دۆزی کورد و داخوازییە ڕەواکانی دەکات بۆ ژیانێکی سەقامگیر، ئەرکی هەموو ئەو وڵاتانەیە کە بڕیاری نێودەوڵەتییان هەیە لە لیستی تیرۆر بيسڕنەوە، زۆر شەرمنانەیە، کە پەكەكە یەکسانە بە ڕێکخراوە تیرۆریستییەکان لە لیستی ڕەشدا.
هەروەها، وائل ڕکابی، شیکەرەوەی سیاسی عێراق ستایشی بەرخۆدانی پەکەکە دەکات لە بەرگرییکردن لە سەروەریی عێراق لە هێرشە تیرۆریستییە داگیرکارییەکانی تورکیا و دەڵێت: پارتی کرێکارانی کوردستان سیستمێکی فکری هەیە کە باوەڕی بە ئازادیی بیروڕا و دادپەروەریی و یەکسانیی و داکۆکیی لەمافەکان هەیە، لەبەر ئەوە خستنە لیستی تیرۆری پەكەكەوە لەگەڵ عەقڵدا ناگونجێت.
ڕکابی ستایشی بیرۆکە و ڕێبازەکانی عەبدوڵا ئۆجالانی کرد، کە لەڕێگەیەوە داوای دیموکراسیی و ئاشتیی و بۆ كورد و بەرگریی لە گەلی کورد دەکات و بە پێویستی زانی، میدیای عەرەبی و کوردییەكان تیشک بخەنەسەر مەزڵومیەتی كورد و بەتایبەتی پەکەکە بە ئامانجی لابردنی لە لیستی تیرۆر.
س.س
